Nehimaia 12:27 - Edo Bible (E Baibol Ẹdo) Version 1996

²⁷ Ẹghẹ ne a na ye ekẹn ne a gbe lẹga Jerusalẹm fi ohan, a keghi ya viọ avbe Livai ke ehe ne iran a rhirhi a gha ye rre ne iran deba emwiukpo a ya fi ohan ni vbene iran gha na so ihuan ekpọnmwẹ deba isẹ kevbe akpata ne a kpee.

Nehimaia 12:27 ပူးပေါင်းရင်းမြစ်များ

II Samuẹl 6:12

E Devid ne ọba keghi do họn wẹẹ, e Nọyaẹnmwa wa fiangbe ẹgbẹe Obẹd Idọm kevbe emwi ne ọ mwẹ hia, rhunmwuda Ẹkpẹti Ile ọ keghi rhunmwuda ọnii ya mu ẹẹn vbe owa Obẹd rre ne ọ do kpee mu ẹẹn gha rrie Jerusalẹm.

I Ọba 8:63

Ọ keghi ya ẹkhuia ẹmila arriaisẹn eva yan ugie (22,000) zọ ese kevbe ohuan arriaisẹn iyehan (120,000) zẹ vbe ọghe isara. Erriọ ọ re ọba kevbe emwa nii hia na ya Ọgua Osa fi ohan ne a na gha ga e Nọyaẹnmwa.

I Krọnikol 13:8

Vbene Devid kevbe emwa nekpa na gha ya ẹtin iran hia iwu ne iran ya rhie ọghọ ne Osanobua. Iran kegha so ihuan iran na gha kpe avbe ẹzi kẹn, akpata ema, isẹ kevbe okpe.

I Krọnikol 15:12

Ọ keghi tama avbe Livai na wẹẹ, “Wa ọrọre olotu avbe uniẹn avbe Livai, wa họnmwẹ egbe uwa kevbe ọghe Livai ne ihua uwa, ne uwa miẹn ehe na mu Ẹkpẹti Ile ọghe Nọyaẹnmwa Osanobua Izrẹl gha die ehe ne I dọlọyi ye otọ khẹ ọre.

I Krọnikol 15:16

E Devid keghi tama olotu avbe Livai wẹ ne ọ zẹlẹ avbe Livai ne iran gha so ihuan kevbe ne iran vbe gha kpe akpata kevbe ukusẹ ọghe oghọghọ.

I Krọnikol 15:28

Ẹre ivbi Izrẹl hia na lele Ẹkpẹti Ile gha die Jerusalẹm deba uwemwẹ oghọghọ, kevbe urhu okpe, ẹkperẹ kevbe ukusẹ deba urhu akpata.

I Krọnikol 15:4

Vbe iyekọnii, ọ keghi gie ne a tie ivbi Errọn kevbe avbe Livai.

I Krọnikol 16:42

E Heman kevbe Jedutun ọ re ọ vbe gha gbearoghe avbe okpe kevbe isẹ kevbe emwi ne a kpe ọvbehe ni dekẹ hia ne a kpee vbe a gha so ihuan urhomwẹ. Ivbi uniẹn Jedutun ọ re ọ gha gbe aro ghe avbe onurho.

I Krọnikol 16:5

A keghi zẹ Asaf olotu iran, vbene Zẹkaraia na gha re ne ọ zẹ diake ẹe. E Jeiẹl, Siemiramot, e Jẹhiẹl, e Matitaia, Eliab, e Benaia, Obẹd Idọm kevbe Jeiẹl na gha re ni kpe akpata. Asaf ghi gha kpe isẹ.

I Krọnikol 23:5

Ọ keghi viọ arriaisẹn enẹ (4,000) yọ ne iran gha ba odẹ, iran arriaisẹn enẹ (4,000) ne iran gha rho e Nọyaẹnmwa, vbene iran gha na gha lo avbe emwi emaba kevbe ẹzi kẹn ne ọba viọ ye otọ ne a ya gha ru ọna.

I Krọnikol 26:31

E Jeraia ọre ogha re ọkaolotu ivbi uniẹn e Hibrọn. Ọ ghi rre ukpo iyeva ne Devid rriọba, a keghi do gualọ otọ vbene ivbi uniẹn e Hibrọn ya dee hẹ. A keghi do miẹn ivbi uniẹn na eso ni wa re ivbiyokuo ni hin usi vbe iran rre Jazẹ vbe otọe e Giliad.

II Krọnikol 29:25

Ọba keghi ru zẹ vbene Nọyaẹnmwa gie Gad ne akhasẹ ọba, re gie Devid ne ọba kevbe zẹ vbene ogie Natan, ne a khama Devid ne ọba, ọ keghi ya viọ avbe Livai ye Ọgua Osa, ọ na viọ akpata kevbe ukusẹ ba ẹre, ena kegha re emwi iku kevbe ihuan,

II Krọnikol 29:30

Ọba kevbe avbe iran ne ọkaolotu ẹvbo nii keghi tama avbe Livai ne iran so ihuan urhomwẹ ne Devid kevbe Asaf ne akhasẹ gbẹnnẹ, ghe Nọyaẹnmwa. Emwa hia keghi ye ẹko rhiẹnrhiẹn mwẹ gha so ihuan ghe Nọyaẹnmwa vbe ehe ne iran na diguẹ nii, iran na ga Osanobua.

II Krọnikol 7:6

Avbe ohẹn keghi mudia ye ehe ne a mwamwa ye otọ khẹ iran, avbe Livai keghi mudia viọ aro da iran, iran kegha ye emwi iku kevbe ihuan ne Devid viọ ye otọ gha rho e Nọyaẹnmwa, Iran kevbe gha so ihuan na, “Itohan rẹn i mwẹ ọfo!” zẹ vbe ne Devid ma iran re. Avbe ohẹn kegha kpe okpe vbene emwa nekpa hia na mudia.

Ẹzra 6:16

Ẹre ivbi Izrẹl hia, avbe ohẹn, avbe Livai, kevbe emwa nekpa hia fẹẹrẹ ni ke iwe rre, na ya oghọghọ ya Ọgua Osa ni fi ohan.

Nehimaia 11:20

Avbe ivbi Izrẹl ni dekẹe kevbe avbe Livai, iran kegha rre avbe okpẹvbo kevbe ore nekhua ni rre Juda, iran na tobọ iran gha koko egbe iran.

Nehimaia 12:43

Emwi ni bun ọre a ya zẹ ese ẹdẹ ne ẹdẹrriọ, ẹko kegha sẹ emwa hia ọyẹnmwẹ, rhunmwuda, Osanobua ọ re ọ rhie ọyẹnmwẹ ne iran. Avbe ikhuo kevbe ibiẹka keghi vbe deba emwiukpo na, a keghi gha họn urhu uwemwẹ iran ya sẹ arria ọvbehe.

Nehimaia 8:17

Iran hia fẹẹrẹ ni ke iwe rre keghi gbe irhu dia, okaro ne a he ya ruẹe ọ re ọ na khin ke ẹghẹ Jọsua ne ovbi e Nọn gha dee. Egbe keghi wa gha mu iran hia, iran na gha ghọghọ.

Psalm 149:3

Wa ya iku rho eni ẹnrẹn, wa kpe ema kevbe akpata ya gha rho ẹre.

Psalm 30:1

I rho ruẹ Nọyaẹnmwa, rhunmwuda u miẹn mwẹ fan nẹ, u ma gie avbe eghian mwẹ ghọghọ mwẹ.

Diuteronomi 16:11

Gha ghọghọ vbe odaro Nọyaẹnmwa, wẹ kevbe avbe ivbi uẹ, kevbe eguọmwadia ruẹ, kevbe avbe e Livai, avbe ọrriọvbe, emọ ne ẹi mwẹ erha kevbe avbe ẹgbẹ ni rre owa ruẹ. Wa ghi ru ọna vbe ihe ọkpa ni ne a na ga ẹe.

Diuteronomi 20:5

“Ẹghẹ nii, avbe ekaolotu ghi do gu emwa nii guan wẹẹ, ‘Arhin eso rre emwa na ra ne ọ bọ owa ne ọ ma he kie ẹre? A deghẹ ọ rrọọ, ọ sẹtin gha rrie. Ne a ghẹ miẹn wẹ, a gha gbe ẹe vbe okuo ọmwa ọvbehe ọ re ọ ghi ya kie owa ẹre.

Filipai 4:4

Wa gha ghọghọ vbe uwu Nọyaẹnmwa, I vbe dọlọ ta ẹe, wa gha ghọghọ.

Arhie Maan 5:8

Ugbẹn vbe ọ ghi wa ru vberriọ nẹ, avbe emwi ne a yi ni ma wu nii, kevbe ediọn eneyanugie nii keghi dele gbe otọ vbe odaro Oteghe Ohuan nii. Ọkpọkpa vbe uwu iran kegha mwẹ akpata kevbe avbe ọkpan igoru ne a ye eturari vuọn, ena ni re erhunmwu emwa Osanobua.