Nehimaia 10:34 - Edo Bible (E Baibol Ẹdo) Version 1996

³⁴ Ma kevbe avbe ohẹn kevbe avbe Livai gha yan uta yọ ukpukpo ne a ya rẹn ẹwae ne ọ gha ho erhan ne a ya giẹn ese ne a zọ ghe Nọyaẹnmwa ne Osanobua mwa zẹ vbene Uhi khare.

Nehimaia 10:34 ပူးပေါင်းရင်းမြစ်များ

I Krọnikol 24:5

A ghi miẹn wẹ emwa ni rre asẹ vbe uwu Ọgua Osa kevbe avbe ọkaolotu ẹmwẹ orhiọn wa bun vbe ivbi uniẹn Eliaza kevbe Itama a keghi yan uta yọ ya wa iwinna ne iran.

I Krọnikol 24:7

Vbene a ya wa iwinna ne dọmwadẹ ẹgbẹe enẹyan ugie ni ọre ọna khin: 1. Jehoiarib 13. Hupa 2. Jedaia 14. Jesebeab 3. Harim 15. Bilga 4. Seorim 16. Ima 5. Malkija 17. Hezẹ 6. Mijamin 18. Hapizez 7. Hakọz 19. Pitahaia 8. Abija 20. Jehezkẹl 9. Jesua 21. Jakin 10. Siekanaia 22. Gamul 11. Eliasib 23. Delaia 12. Jakim 24. Maazaia

II Krọnikol 2:3

E Solomọn keghi gie ne a tama e Hiram ne ọba e Taia wẹẹ, “Vbe gha do ẹki gun mwẹ zẹ vbene u vbe gha do ẹki gie erha mwẹ ighẹ e Devid ne ọba vbe ẹghẹ ne u na khiẹnnẹ igẹdu e sida ne ẹẹn ne ọ ya bọ ẹguae ẹre.

Ẹzra 3:5

Ye vbe deba ọnii, iran kevbe gha zọ ese ne a giẹn ikun ẹnrẹn hia, kevbe ese ne a zọ vbe ẹghẹ Emwiukpo Uki Ọgbọn, kevbe ẹghẹ ugamwẹ ni dekẹe hia ne a na si egbe koko ga e Nọyaẹnmwa; do deba avbe izọ ese ne a ya ọ kekhọerre zọ ghe Nọyaẹnmwa.

Nehimaia 11:1

Avbe ọkaolotu ni rrọ keghi yin e Jerusalẹm, avbe emwa ni dekẹe keghi yan uta ya zẹ ẹgbẹe ọkpa vbe uwu igbe ne ọ gha ya yin ẹvbo nọhuanrẹn ọghe Jerusalẹm vbene avbe nekpa na ya yin avbe okpẹvbo kevbe ore nekhua nekpa.

Nehimaia 13:31

I keghi mwamwa ẹn wẹ ne iran gha ho erhan ne a ya giẹn emwi izọ ese rre vbe ẹghẹ, kevbe wẹ ne emwi ni gha viọ emwi imuohan ọghe ọka ne a ka fian kevbe ọmọ erhan ne ọ ka vbọ rre. Ye ena hia rre Osanobua, ne u san mwẹ ẹse ẹre.

Itan 18:18

Erhanigberhan eva gha vbe egbe vbe iko ẹzọ, uta ne a yan ọ re a ra sẹtin ya ta ọfo yọ.

Aizaia 40:16

Avbe aranmwẹ ni rre ẹgbo Lebanọn ma sẹ ne a gha ya zọ ese uhukpa ghe Osanobua mwa, avbe erhan ma sẹ ne a gha ya hie erhẹn.

Levitikọs 24:5

U ghi mwa irhuarhua uwan enẹ yan ugie ne u ya ru ududu ebrẹd iweva.

Levitikọs 24:6

U ghi mwamwa ebrẹd nii ye uviẹn eva vbe uhunmwu eteburu ne a ya igoru ne a ma gua rhu vbe odaro e Nọyaẹnmwa, ehan vbe uviẹn ọkpọkpa.

Nọmbas 28:2

ne ọ tama ivbi Izrẹl wẹ ne iran gha viọ emwi izẹ ọhẹ evbare gie Nọyaẹnmwa vbe ẹghẹ ne a zẹ yọ, zẹ vbe ne ọ yẹ ọre.

Iwinna 1:26

Vbe iyeke ọna, iran keghi yan uta ne iran zẹ ọkpa vbe uwu eni iran eva. Ọ keghi mu Mataias, a keghi kae ba avbe ukọ ne owọrọ.

Jọsua 9:27

Sokpan, vbe uwu ẹre nii, ọ keghi ya iran ru ni rhọ erhan kevbe ni sa amẹ ne ivbi Izrẹl kevbe aka ọghe Nọyaẹnmwa. Erriọ iran ye ru ẹe do sẹ ẹdẹ nẹrẹ na. Iran ghi gha winna vbe ehe ne e Nọyaẹnmwa a rhirhi wẹ ne a na gha ga irẹn.