Nahum 2:3 - Edo Bible (E Baibol Ẹdo) Version 1996

³ Avbe ivbiyokuo eghian ni viọ asa ni baa mwẹ obọ, iran keghi vbe yọ ẹwu ukpọn ne ọ baa. Iran mu egbe ne iran ya hẹ rhu ẹe ikẹkẹ okuo iran gha kpannọ ogiọnmwẹ erhẹn zẹ vbe erhẹn. Avbe ẹsin iran gha vin yo vin rre!

Nahum 2:3 ပူးပေါင်းရင်းမြစ်များ

Job 39:23

Emwi igbinna ne ne ọ hin iran mu mwẹ, ghi gha gui ẹzọ ọ ghi gha kpannọ erhẹn kua vbe ovẹn.

Psalm 80:13

Avbe aranmwẹ oha ya owẹ rri ẹe ginna otọ, avbe aranmwẹ oha vbe rri oẹ.

Aizaia 14:8

Avbe ohia kevbe isida ni rre Lebanọn gha ghọghọ ọba ne ọ dee gbotọ nii, rhunmwuda, vbe ne irẹn ghi na kpao nian, ọmwa ne ọ gha tọnnọ iran gbotọ ighi rrọọ.

Ezikiẹl 23:24

“Iran gha ke odẹ okuọ suẹn gha guẹ gbinna, iran ghi ya ikẹkẹ okuo viọ ivbiyokuo nibun gha dee, deba okotọ ne a ya hẹ emwi gie iran. Iran mwẹ erhu ẹgere kevbe asa ne a ya khẹ egbe, iran gha lẹga ruẹ. I gha vbe rhie ruẹ ye iran obọ, iran ghi tie uhi iran ya bu ohiẹn ruẹn.

Ezikiẹl 26:7

E Nọyaẹnmwa ne Udazi khare wẹẹ, “I ra mu ọba ne ọ ghi wegbe sẹ ehia, ighẹ e Nebukiadneza ne ọba e Babilọn rre ne ọ do khọn e Taia. Ọ gha ke odẹ okuọ rre ke irẹn kevbe ivbiyokuo nibun kevbe avbe ẹsin deba avbe iran ni hin ẹsin.

Nahum 3:2

Gha họn vbene asan tu hẹ, owogho owẹ imọto, igiawẹ ẹsin ni vbọlọ ghe ukhunmwu edobidokpannọ ọghe ikẹkẹ okuo!

Zẹkaraia 1:8

Mẹ keghi bẹghe odibosa ọkpa ọghe Nọyaẹnmwa, ọ keghi hini ẹsin ne ọ baa. Ọ keghi yakọ vbe uwu ẹbu erhan eso vbe iya, avbe ẹsin ọvbehe eso keghi vbe rre ọre iyeke, ni baa, ni gbẹnnẹ ekẹnnẹkẹnnẹ, kevbe ni fuọfua.

Zẹkaraia 11:2

Wa gha kpe orhu eve, ne uwa viẹ egbe ua, wa ne avbe agba, avbe isida dele nẹ, a fuẹn ehia a nẹ ighẹ avbe erhan ni mwẹ eni nii, wa gha kpe orhu eve, ne uwa viẹ egbe ua, wa ne avbe okan ni rre Basian! A gbe ẹe sẹ otọ fẹẹrẹ ighẹ ẹgbo ne ọ wo nii.

Zẹkaraia 6:2

Ẹsin ni baa ọ re ọ gha si ikẹkẹ okuo nokaro khian; ne ogieva, avbe ẹsin nekhui;

Arhie Maan 12:3

Ama ọvbehe keghi vbe rhie egbe maa vbe iso. Ugbogiorinmwi ne gẹdẹgbẹ ọkpa ne ọ baa kegha rre evba, ọ keghi mwẹ uhunmwu ihinrọn, igho igbe, ẹde ọkpọkpa kegha rre dọmwadẹ uhunmwu ẹnrẹn.

Arhie Maan 6:4

Ẹsin ọvbehe keghi ladian, ọ na keghi baa. Ọmwa ne ọ hin ẹnrẹn, a keghi rhie ẹtin nẹẹn ne ọ ya si okuo ye agbọn, ne emwa ne agbọn gha gbele egbe iran uan, a keghi mu umozo nọkhua ye ọre obọ.