Matiu 26:61 - Edo Bible (E Baibol Ẹdo) Version 1996

⁶¹ “Okpia na khare wẹẹ, ‘Mẹ gha sẹtin guọghọ Ọgua Osa Osanobua sẹ otọ, vbe iyeke ikpẹdẹ eha, I ghi vbe bọ ẹe.’ ”

Matiu 26:61 ပူးပေါင်းရင်းမြစ်များ

Gẹnẹsis 19:9

Sokpan iran keghi kha wẹẹ, “Kpa hin odaro mwa rre, wẹ ne igbọn na! Vbua khin ne u gha na gha tama ima emwi ne ima gha ru? Deghẹ ẹ i re erriọ, ma gha ru uwẹ emwi ne ọ khọrhiọn sẹ ọghe iran.” Iran keghi sua e Lọt ghe iyeke, iran keghi vẹ ghe odaro ne iran ya gbe urho.

I Ọba 22:27

Tama iran ne iran fi ẹe fi uwu ẹwẹdọ, ne ọ gha ye ebrẹd vbe amẹ koko ẹe I te rre vbe egbe hẹnnẹdẹn.”

II Ọba 9:11

E Jehu keghi bu avbe ọkaokuo ne ihua ẹre gha khian, iran nọ rẹn wẹẹ, “Deghẹ ọ ye ẹse? Vbe ọmwẹmwẹ nii ya a ru yi?” E Jehu keghi wanniẹn wẹẹ, “Wa rẹn emwi ne ọ ho.”

Aizaia 49:7

Osanobua nọhuanrẹn kevbe ọmiọnmwafan Izrẹl khama rẹn ighe ọmwa nii ne a kakabọ zan an ne avbe uhunmwu ẹvbo hia khuiwu ẹre, ne ọ vbe re ọguọmwadia iran ni khaemwisẹ wẹẹ, “Avbe ọba gha miẹn vbe a gha fan an yotọ, iran ghi kpa uhe ya yọghọ ne uẹn, avbe ivbi ọba debare gha vbe miẹn ọẹn, iran ghi ghughẹrre ẹsẹse ya yọghọ ne uẹn.” Ọ na gha sunu rhunmwuda, e Nọyaẹnmwa zẹẹ ọguọmwadia ẹre nẹ Osanobua nọhuanrẹn ọghe Izrẹl vbe mu eyan rẹn sẹ.

Aizaia 53:3

Ma zan rẹn a keghi vbe he ẹe yotọ. Ọ ziengbe oya kevbe obalọ, a ma miẹn orhiọnkpa ne ọ vbe tọn aro mu ghe ẹre ma keghi wa yangbe ẹe vbene a gha kha ighẹ ẹ i re emwi rhọkpa.

Matiu 12:24

Avbe Farisi ghi họn, iran wẹẹ, “E Bẹlzibọb ne ọkaolotu avbe orhiọn esu, ọre ọ rhie ẹtin ne ọ ya khulo orhiọn esu ladian nẹẹn.”

Matiu 26:62

Ogie Ohẹn keghi guakpao, ọ tama Jesu wẹẹ, “Wẹ ma miẹn ewanniẹn rhie ye ifi ẹzọ hia ne iran ba ruẹ re na?”

Matiu 26:71

Ọ keghi ladian gha rrie onurho ne a la la ore ni, Ọmọ okhuo ọvbehe, vbe uwu avbe eguọmwadia ghi vbe miẹn ọẹn, ọ tama iran ni rre evba wẹẹ, “Rẹn na vbe gha rrọọ yaba Jesu ne ovbi e Nazarẹt.”

Matiu 27:40

“Ẹ i re uwẹ ọre ọ wẹ, u gha guọghọ Ọgua Osa sẹ otọ, ne u vbe dọlọ ẹe bọ vbe ikpẹdẹ eha! A deghẹ Ovbi Osanobua u gele khin, fan egbe ruẹ fua nian. Tuorre vbe ugbugbe.”

Matiu 27:5

Judas keghi rhurhẹ igho nii ku otọ vbe Ogiukpo, ọ keghi sẹ ọe rae ye evba, ọ ghi ke evba kpao, ọ keghi ya zẹgbẹle.

Iyẹn ne ọ Maan Ọghe Mak 14:58

“Ma họn ẹn vbe ọ tae wẹ, ‘I gha guọghọ Ọgua Osa na ne emwa bọe sẹ otọ, vbe iyeke ikpẹdẹ eha, I gha bọ ọvbehe ne emwa ma bọ’ ”

Iyẹn ne ọ Maan Ọghe Mak 15:29

Avbe ilavbodẹ kegha fieghe uhunmwu, iran na gha ya ukpẹ sakan ẹn wẹẹ, “Ẹbẹe, U ma wẹ u gha dunmwu Ọgua Osa sẹ otọ ne u ya ikpẹdẹ eha mu ẹn kpa!

Iyẹn ne ọ Maan Ọghe Luk 23:2

Iran keghi ba ẹre ifi ẹzọ wẹ, “Ma mu okpia na vbe uwu ehe ne ọ na ruẹn ẹmwẹ ye emwa ima ẹko, ọ wẹ ne iran ghẹ ghi ha igho uhunmwu gie Nọgbaisi, ọ wẹ rẹn tobọ irẹn ọrọre Kristi ne Ọba.”

Iyẹn ne ọ Maan Ọghe Jọn 9:29

Ma rẹnrẹn ighe Osanobua gu e Mosis guan. Sokpan ma ma kue rẹn ehe ne oko na ke rre.”

Iwinna 17:18

Avbe ọmamwaemwi Epikurian kevbe Stoik eso keghi vbe guee gha muan ẹmwẹ. Eso vbọ kegha kha wẹ, “De emwi ne ole unu na vbe miẹn gha ta yi?” Eso vbọ keghi vbe kha wẹ, “Ọ ye vbe ẹmwẹ ẹbọ ne ima mannọẹn ọre ọ ta.” Emwi ne ọ ye iran ta ẹmwẹ na ọrọre wẹ te Pọl gha kpe orhu Jesu kevbe arhiọkpaegbe.

Iwinna 18:13

Iran keghi kha wẹ, “Okpia na ma emwa ẹre wẹ ne iran gha ga Osanobua vbe odẹ ne ọ lihan ne uhi.”

Iwinna 22:22

Vbe Pọl te do ta ẹmwẹ na, emwa nii kegha danmwehọ ẹre, sokpan ẹghẹ na nian, iran keghi wa gha go kha wẹẹ, “Wa mu ẹn fua mwa! Gbe ẹe rua! Ọ ma kei ne ọ di agbọn ya!”