Matiu 24:7 - Edo Bible (E Baibol Ẹdo) Version 1996

⁷ Ẹvbo na gha mu okuo gie nọkpa, otọ arriọba na ghi mu okuo gie nọkpa. Ukhumwu kevbe igbohiotọ ghi gha rre ehe hia.

Matiu 24:7 ပူးပေါင်းရင်းမြစ်များ

II Krọnikol 15:6

Ẹvbo ọkpa kegha zẹ ẹvbo nọkpa owẹ, ore ọkpa kegha zẹ ore nọkpa owẹ rhunmwuda, Osanobua keghi si ọlọghọmwa kevbe omẹ ye iran egbe.

Aizaia 19:2

E Nọyaẹnmwa khare wẹẹ, “I gha bọ Igipt ye igbinna owowa, I ghi viọ etẹn nikpia aro da etẹn iran nikpia, kevbe emwa ẹdogbo ẹre aro da emwa ẹdogbo ẹre ọvbehe. Avbe okpẹvbo ni gu egbe suan ghi gha gu egbe iran khọn, avbe ọba ni gu egbe suan ghi gba gha sinmwi ẹtin.

Aizaia 29:6

e Nọyaẹnmwa ne Oghodua gha ya okpẹhoho ne ọ wegbe kevbe ighohiotọ miẹn uwa fan, ọ gha gie ẹhoho amẹ kevbe erhẹn ne ọ to khian,

Ezikiẹl 14:21

Vbenian ọ re Nọyaẹnmwa ne Udazi khare: “I gha gie emwi ne I ya rri emwa oya enẹ ni khọ sẹ gha rrie Jerusalẹm, ena ọrọre okuo, ukhunmwu, aranmwẹ akọn, kevbe emianmwẹ, ne I ya fuẹn emwa nagbọn kevbe avbe aranmwẹ ba ẹre.

Ezikiẹl 21:27

Ọfuan, ọfuan, vbe ẹmwata, mẹ gha ya ore ẹvbo nii khian itowa. Sokpan ọna i ra sunu, a te do miẹn wẹ ọ rre ighe ọmwa ne I zẹe ne ọ do rri ẹvbo nii oya. Rọẹn nii ọre I ra mu ẹẹn ẹre na.

Zẹkaraia 14:13

Ọ gha sẹ ẹghẹ nii, e Nọyaẹnmwa gha fian otighi ne ọ sẹrriọ fi iran egbe ohan ghi vbe mu iran sẹrriọ wẹ dọmwadẹ ọghọe gha dobọ mu ọmwa ne ọ sikẹ ọre sẹ, ọ ghi suẹn gha gu ẹe gbinna.

Iyẹn ne ọ Maan Ọghe Luk 21:11

Igbohiotọ ọyan aro ua, ghi gha sunu, ukhunmwu kevbe okpemianmwẹ ghi gha rre ehe hia, ama nekhua kevbe ni gbe orrirri ghi gha rhie egbe maa vbe aro iso.

Iwinna 11:28

Ọkpa vbe uwu iran, ne a tie eni ẹnrẹn Agabus keghi kpaegbe, ọ keghi ya ẹtin Orhiọn ta ẹe ye otọ ighẹ ukhunmwu nọkhua ra do fi la otọ agbọn hia. (Emwi na gele sunu vbe ẹghẹ ne Klọdiọs na gha re Nọgbaisi.)

Iwinna 2:19

I gha rhie ọyunnuan ma vbe aro iso, kevbe iwinna ọyanaroua vbe agbọn vbe ototọ. Esagiẹn kevbe erhẹn kevbe ighogho nọ mwẹ imi.

Hibru 12:27

Ne ọ na kha wẹ, “dọlegbe,” wa rhie maa wẹ, emwi ne a yi hia ọre a gha mu rueghe, a ghi viọ iran hin rre, ne ọ miẹn ehe na do kẹe avbe emwi ne a ma mu rueghe.

Arhie Maan 6:12

I kevbe ya bẹghe vbe Oteghe Ohuan rhan emwi ne a gbae ne ogiehan. Igbohiotọ ọhanabe keghi wa gha rrọọ, owẹn keghi sie rua, ọ ye vbe ukpọn nekhui ne khuarakhuara, uki keghi wa fi werriẹ khian ne ọ baa fẹẹrẹ vbe esagiẹn.

Arhie Maan 6:5

Iyeke ọnii, Oteghe Ohuan keghi rhan ebe ne a gbae ne ogieha, I keghi vbe họn emwi ne a yi ne ọ ma wu ne ogieha, ọ wẹẹ, “Gha dee!” I ghi tọn aro mu, ya ghee ẹsin nekhui. Ọmwa ne ọ hin ẹnrẹn keghi viọ esike ne a ya mwa emwi eva mwẹ obọ.

Arhie Maan 6:6

I keghi họn emwi ne ọ ye vbe urhu ọmwa, ọ kegha ke ehe ne avbe emwi ne a yi ni ma wu enẹ nii ye rre, ọ wẹẹ, “Ovbi ọduẹki ọka ọkpa ọre a gha ya gha ha ọmwa osa iwinna ẹdẹ hoho, obọ eha vbe uwu enẹ ovbi ọduẹki ọka irhuarhua, ọre a gha ya gha ha ọmwa osa iwinna ẹdẹ hoho. sokpan ghẹ rhia iran uan ighẹ avbe ofigbọn oliv kevbe wain.”

Arhie Maan 6:8

I ghi tọn aro mu, I keghi bẹghe ẹsin ne egbe ẹre fua banbanban. Iran kegha tie ọmwa ne ọ hin ẹnrẹn khian, “Uwu.” Ẹrinmwi erhẹn keghi wa gha lele ẹre usomwẹ owẹ khian. A keghi rhie asẹ ne iran yan obọ ọkpa vbe vbe a gha wa agbọn ye ihe enẹ, ne iran ya umozo kevbe ukhunmwu kevbe emianmwẹ, kevbe avbe aranmwẹ ni khọ ni rre otọ agbọn, gbele emwa.