Malakai 3:10 - Edo Bible (E Baibol Ẹdo) Version 1996

¹⁰ Wa viọ inu ne a ghae ye ihe igbe gele wa khin gha die Ọgua Osa, ne evbare miẹn ehe na kpọkua vbe evba. Wa ya ẹe danmwẹ mwẹ ghe, wa gha vbe miẹn wẹ I gha kie ewindo ẹrinmwi ye otọ, I ghi vbe rhurhẹ emwi ọmaa hia ku uwa gba erhan gba irri.

Malakai 3:10 ပူးပေါင်းရင်းမြစ်များ

Gẹnẹsis 28:22

Okuta ne I yi ẹre ama na ọre ọ khian gha re ehe ne a na gaa. I ghi vbe wa emwi ne u viọ mẹ hia ye ihigbe mu obọkpa nuẹn vbọ.”

Gẹnẹsis 7:11

Ẹghẹ ne Noa na gha rre ukpo arria eha (600), vbe ikpẹdẹ ehairrọvbugie ọghe uki nogieva, uhunmwu ẹzẹ ọghe okun nekhua hia ni rre uwe otọ keghi vuaa, uvun ni rre iso hia keghi kie rua.

II Ọba 7:19

Ne ọkaokuo nii na wanniẹn wẹẹ, “Ọnii i gba, ọ gha khọnrẹn ne e Nọyaẹnmwa tobọ ẹre tue ọka rre vbe ọwarọkpa!” Ọre Elaisia na vbe wanniẹn wẹẹ, “Ọ gha sirra ruẹ sunu, sokpan, u i ra danmwẹ vbe evbare nii.”

II Ọba 7:2

Ovbi ọkpọmwa ọghe ọba keghi wanniẹn tama Elaisia wẹẹ, “Ọnii i sẹtin sunu vberriọ, ọ gha khọnrẹn wẹ ne Nọyaẹnmwa tue ọka amẹ rre wanwanna.” Elaisia keghi wanniẹn wẹẹ, “Aro ruẹ gha sẹ ọe vbe ọ gha sunu sokpan u i ra re vbe evbare ni.”

I Krọnikol 26:20

Iran eso ọvbehe vbe avbe e Livai ne ihua iran kegha gbearoghe aza kevbe avbe ehe ne a viọ emwi ne a ya yo imuohan gie Osanobua yi.

Nehimaia 12:44

Vbe ẹghẹ nii, a keghi do viọ emwa yọ ne iran gha gbe aro ghe avbe aza ne a viọ emwi ne emwa viọ rrie Ọgua Osa yi, usun avbe aghaeyihigbe kevbe ọka ne a ka fian kevbe ọmọ erhan ne ọ ka vbọ ukpo ukpo. Iwinna iran na vbe nọ ne iran gha miẹn avbe ẹvbo ni sikẹ ugbo nii emwi ne iran viọ gie avbe ohẹn kevbe avbe Livai zẹ vbene Uhi khare. Emwa e Juda keghi gha ta ẹmwẹ avbe ohẹn kevbe Livai ne ọ maa.

Nehimaia 12:47

Vbe ẹghẹ e Zerubabẹl kevbe ẹghẹ Nehimaia, te ivbi Izrẹl hia gha zọhẹ ẹdẹgbegbe ne a miẹn ya gha gaga avbe ọsian kevbe abodẹ Ọgua Osa. Avbe emwa ni ghi gha zẹ ọhẹ iruemwi gie avbe Livai, avbe Livai ghi vbe viọ inu ne a mwamwa ẹn yi gie avbe ohẹn.

Nehimaia 13:5

Ọ keghi kue ne Tobaia gha rre ugha nọkhua ne a wẹ ne a viọ avbe ọka imuohan kevbe eturari yi deba avbe emadogua ne a lo vbe Ọgua Osa. Emwi ihaoko ne a viọ gie avbe ohẹn kevbe a ghae ye ihigbe ọghe ọka, ayọn, ofigbọn oliv ne a viọ ne avbe Livai, avbe ikpemaba Ọgua Osa kevbe avbe abodẹ Ọgua Osa.

Psalm 37:3

Mu ẹtin yan e Nọyaẹnmwa ne u gha ru emwi ẹse, vbe gha yin otọe nii vbe ne ai na mwẹ ẹbe.

Psalm 78:23

Sokpan, rẹn keghi gu iso guan vbe odukhunmwu, ọ na wẹ ne urho ẹre kie rua,

Asan-Ibo 11:3

Ehe ne erhan a rhirhi de ghe, ehe ne ọ de yi nii ọ re ọ ra gha ye. Amẹ gha bi, ọ ghi rhọ.

Ezikiẹl 34:26

I gha fiangbe iran, I ghi vbe gie iran gha rre ehe ne ọ lẹga oke mwẹ nọhuanrẹn. Evba nii ọ re I gha na gha ye amẹ ne ọ rhọ fiangbe iran vbe ẹghẹ ne iran ya gualọ ẹe.

Ezikiẹl 44:30

Avbe ohẹn ọ re ọ kerre ne gha viọ avbe emwi ne ọ maa sẹ vbe emwi orhọ ne a ka gha rhọ hia kevbe avbe emwi ọvbehe ne a ya yo imuohan gunmwẹ hia fẹẹrẹ. Ẹghẹikẹghẹ ne emwa nii a rhirhi ya le ebrẹd, iran ghi gha mu ne okaro vbọ gie ohẹn zẹ vbe emwi ihaoko, afiangbe mwẹ gha vbe gha rre owa iran.

Hozia 2:21

Ẹghẹ ni, mẹ gha họn erhunmwu ivbi Izrẹl ne emwa mwẹ. I gha gie amẹ rhọ ye otọ, otọe ghi vbe ma ọka, alimo kevbe oliv.

Joẹl 2:19

Ọ zẹẹ ẹmwẹ wanniẹn iran wẹẹ: “Wanwanna nian, I ra do viọ avbe ọka kevbe ayọn, kevbe ofigbọn ne uwa. Ẹko gha vbe vuọn uwa ẹvbo ọvbehe i ra gha ye zan uwa ọvbehe.

Joẹl 2:24

Ọka gha vuọn ehe ne a na wiẹn ọka, uvun ni lẹga ehe ne a na min ayọn, ghi gha vuọn kpa kua, ne ayọn kevbe ofigbọn oliv.

Levitikọs 26:10

Emwiorhọ rua gha bun sẹrriọ wẹ, ọ gha gbe ukpo ohoho, a ghi vbe miẹn wẹ te uwa ghi kpolo ni dekẹe vbe ne uwa ka rhọ kua, ne uwa miẹn ehe na rhie otọ ne ne uwa da rhọ.

Levitikọs 26:3

“Deghẹ wa rhie owẹ lele uhi mwẹ wa na vbe gha ya ilele mwẹ ru emwi.

Levitikọs 27:30

A ghae ye ihe igbe ọghe emwi okọ hia, ọghe Nọyaẹnmwa nọ, ọ re ọka nọ ra avbe ọmọ erhan.

Hagai 2:19

A gha rhe miẹn wẹ, ọka kevbe avbe emwiokọ ni khọe i ghi rrọ, avbe erhan azara erhan ohọ, e pomegranẹt, kevbe oliv, ne ọ he mọ i rrọ, sokpan ke ẹghẹ na kpao te I ra gha fiangbe uwa.”

Nọmbas 18:21

E Nọyaẹnmwa keghi kha wẹẹ, “A ghae ye ihe igbe ne ivbi Izrẹl hẹ gunmwẹ, I ya ne avbe Livai. Ọ na ọrọre osa ne a ha iran re ye iwinna ne iran winna ya gbearoghe Owa Ukpọn Ile.

Matiu 6:33

Emwi ne uwa gha ru ọrọre ne uwa ka mu aro ye ẹmwẹ Arriọba Osanobua kẹe kevbe emwi ni lelẹe khian nẹ, rẹn gha ye emwi ni ghi dekẹe hia sẹ uwa ọkẹn.

Diuteronomi 12:6

Evba wa gha na gha zọ ese uwa na gha giẹn uan, kevbe izọ ese ọwua nekpa, kevbe a ghae ye ihe igbe ọghe uwa kevbe izẹọhẹ uwa, emwi ihaoko ne uwa ve Nọyaẹnmwa ẹre, izẹọhẹ a ke ekhọe rre kevbe emọ ọdiọn ọghe ẹmila kevbe ohuan uwa.

Diuteronomi 14:22

“Rhie ọkpa vbe igbe ye otọ, obọ ọkpa vbe a ghae emwiokọ ne u miẹn vbe ugbo ruẹ vbe ukpo ni hia ye ihe igbe.

Diuteronomi 14:29

Evbare na. ọghe avbe Livai nọ vbe ne a na miẹn wẹ iran imwẹ emwi obọ iran, kevbe avbe orhunmwuyẹn, emọ ne ẹ i mwẹ erha, kevbe avbe ẹgbẹ ni rre ẹvbo uwa. Iran ghi rre do gha viọ emwi ne iran imwẹ hia. Wa ghi ru ọna, e Nọyaẹnmwa Osanobua rua gha vbe fiangbe uwa vbe emwi ne uwa ru hia.

Diuteronomi 28:12

Ọ gha gie amẹ ke aza ọghe ọe vbe ẹrinmwi gha dee vbe ẹghẹ ọ re, ọ ghi fiangbe iwinna obọ uwa hia, sẹrriọ wẹ wa gha viọ ne ẹvbo ni bun mọmọ sokpan wa i ra rhie mọmọ vbe obọ iran rhọkpa.