Maika 7:6 - Edo Bible (E Baibol Ẹdo) Version 1996

⁶ Vbe agbọn ne a ghi ye na, emọ ikpia ghi ru avbe erha iran zẹ vbe akpa, emọ ikhuo ghi mu aro igbinna da iye iran, igbama ne ikhuo ghi gha gu iye ọdọ iran gui ẹzọ, emwa ẹgbẹe ọmwa ọrọre eghian rẹn.

Maika 7:6 ပူးပေါင်းရင်းမြစ်များ

Gẹnẹsis 49:4

Te u yevbe ogbigbi amẹ ne ọ hẹ yo hẹ rre, sokpan wẹ i ra gha re ne ọ hiunkhuan sẹẹ, rhunmwuda u gu amwẹ erha ru emwi awua. U ru ukpo orọnmwẹ mwẹ awua, u keghi muẹn hin.

II Samuẹl 16:11

Ẹre Devid na tama Abisiai kevbe avbe ekhaẹmwẹ ọnrẹn hia wẹẹ, “Ovbi imẹ wẹ rẹn ra gbe mwẹ uan, vbọzẹ ne ẹmwẹ ovbi e Bẹnjamin na, na yan uwa unuan yi? Wa sẹ ọe rae ne uwa gie ẹe gha rhovbiẹ mwẹ, rhunmwuda, e Nọyaẹnmwa ọ re ọ gie ẹe.

Psalm 41:9

Uhin wẹ osẹ mwẹ ne ọ sikẹ mwẹ sẹẹ, ọmwa ne I mu ẹtin yan sẹẹ ọmwa ne ọ re vbe evbare mwẹ te ọ ghi mu aro da mwẹ.

Itan 30:11

Emwa eso rrọ ni tie ẹbọ ne erha iran, iran i vbe rẹn ẹse ne iye ru ne iran.

Itan 30:17

Ọmwaikọmwa ne ọ ya erha ẹe gbogiẹ ra ne ọ zan iye ẹe vbe ọ ghi khian ọmaẹn nẹ, ugu ọ re ọ kere ne ọ rri ọe, ra ne ahianmwẹ oha wọlọ ẹre aro kua.

Aizaia 3:5

Edọmwadẹ ọghọe ghi gha gbe ogieva ẹre rhu. Avbe igbama i ra ghi gha ya ọghọ ne eniwanrẹn, deba re avbe ivbivbi emwa nii i ghi ra gha yọghọ ne emwa ni sẹẹ iran.

Aizaia 9:19

Rhunmwuda ne ohu na mu e Nọyaẹnmwa ne Oghodua, ikhi ne ọ rria emwa re gha to vbe erhẹn vbe otọe nii hia, ọ kevbe gha fuẹn emwi nii hia a, ọ keghi do khian ne dọmwadẹ ọghọe ghi na sinmwi uhunmwu ẹnrẹn.

Jerimaia 12:6

Uhin ighe avbe etuẹn nikpia, emwa ẹgbẹe ruẹ rhie ruẹ ma, iran rhie obọ ba okhọn ne a gu uẹ khọn. Ghẹ mu ẹtin yan iran, ọ gha khọn iran ne iran gha ta ẹmwẹ ose.”

Jerimaia 20:10

I ghi họn vbe agbọn hia tae wẹẹ, “Ohan gba ehe hia, wa gia ya gu ẹe gui ma iran ni khaemwisẹ.” Uhin ghe te avbe ọse mwẹ ni sikẹ mwẹ sẹẹ, khẹ ẹghẹ ne I gha ya de, iran wẹẹ, “Wẹ wẹ ẹ ghi gia rẹrẹ, ẹghẹ nii, obọ ima ghi vba ẹre ne a rria ẹre ikhi.”

Jerimaia 9:4

Wẹ ne dọmwadẹ ọghọe khẹ yegbe ne ọ mwẹ ẹwaẹn vbe egbe ọsiọre a i ghi miẹn ne ọ sẹtin mu ẹtin yan ọtiọnrẹn rhunmwuda, te etẹn hia ghi guẹ erẹrẹ vba e Jekọb, edọmwadẹ ọghọe ta ọtiọnrẹn ọtakhọ.

Ezikiẹl 22:7

“Emwa ni rre avbe okpẹvbo, ne ọ ghi ya ọghọ ne avbe evbibiẹ iran i ghi rrọọ. Wa gbe avbe orhunmwuyẹn rhu, wa keghi mu avbe ẹgbẹe kevbe emọ ne ẹ i mwẹ erha vbuẹvbuẹ.

Obedaia 1:7

Iran nii ne uwa gba ye egbe khian hiẹ ruẹ. Iran khu ẹ hin ẹvbo ruẹ rre, iran ne uwa te gba rrọ kugbe vbe ọfumwegbe, ọ re ọ ghi do khọn ruẹn mu otọ. Avbe esiọ ne uwa gba rri evbare ọ re ọ ghi khuẹn ifi khẹ ruẹ. Ẹmwẹ ne iran ghi ta vbe ekpa ruẹ ọrọre: ‘Iguemwi ẹnrẹn ni hia ghi vbo yi?’

Matiu 10:21

“Emwa gha silo etẹn iran ladian ne a gbelua, erriọ ọre erha gha vbe ru emọ. Emọ gha mu aro da erha iran, iran ghi gbele iran an.

Matiu 26:23

Jesu wanniẹn tama iran wẹẹ, “Ọmwa ne ọ gunmwẹ ye ebrẹd rhanmwẹ vbe ọkpan, ọre ọra rhie mwẹ maa.

Iyẹn ne ọ Maan Ọghe Luk 12:53

Erha ghi gha gu emọ ikpia khọn, emọ ikpia ghi gha gu erha iran khọn. Iye ghi gha gu emọ ikhuo khọn, emọ ikhuo ghi gu avbe iye iran khọn. Iye ọdọ ghi gha gu amwẹ ọmọ khọn amwẹ ọmọ ghi gha gu iye ọdọ khọn.”

Iyẹn ne ọ Maan Ọghe Luk 21:16

Avbe evbibiẹ uwa kevbe etẹn ne ikpia, ẹgbẹe kevbe avbe ọse uwa, gha silo uwa ladian, iran gha gbele eso ua vbe uwu uwa.

Iyẹn ne ọ Maan Ọghe Jọn 13:18

“Ẹ i re uwa hia I kha. Mẹ rẹn iran ne I mẹ hannọ zẹ. sokpan ẹ i mwẹ ne ẹmwẹ ne ebe ne ọ huanrẹn khare ghẹ sẹ wẹ, ‘Ọmwa ne ọ re vbe evbare mwẹ mu aro igbinna da mwẹ.’