Maika 7:12 - Edo Bible (E Baibol Ẹdo) Version 1996

¹² Emwa ruẹn gha dọlegbe ke ehe hia gha bu ruẹ rre, ke Asiria rre vbe owẹn owiẹ, ke Igipt rre vbe odẹ ekẹn, kevbe iwewe Ẹzẹ Yufretes rre, kevbe okun ne ọ rrei gha dee, kevbe ke oke ne ọ rre urria gha dee.

Maika 7:12 ပူးပေါင်းရင်းမြစ်များ

Aizaia 11:11

Ọ gha sẹ ẹdẹ nẹdẹrriọ, e Nọyaẹnmwa gha dọlegbe lo ẹtin ẹnrẹn, ọ ghi viọ iran gha die owa ighẹ avbe emwa rẹn ni ghi dekẹe vbe Asiria kevbe Igipt, vbe otọe Patros, e Sudan, Ẹlam, e Babilọn kevbe Hamat, deba ni rre avbe eghute kevbe avbe otọe ne amẹ lẹga vbe okun.

Aizaia 11:16

Odẹ nọ vbẹe ọkpa gha la Asiria ladian ne avbe ivbi Izrẹl ni miẹn uhunmwu vbe evba, zẹẹ vbene ọ vbe gha rrọọ ne avbe erha iran odede vbe iran kpao vbe Igipt rre.

Aizaia 43:6

I gha tama odẹ okuọ ne ọ gie iran gha rrie kevbe odẹ ekẹn wẹ ne ọ ghẹ da iran yi. Wa gie emwa ke otọe urria gha dee kevbe ehe hia vbe otọ agbọn gha dee.

Aizaia 49:12

Emwa mwẹ gha ke ehe ne ọ rrei gha dee, ke okuo kevbe orrie gha dee, kevbe ke Asuan ne odẹ ekẹn gha dee.”

Jerimaia 23:3

I gha si avbe emwa mwẹ ni dekẹe koko ke ẹvbo ne I zagha iran kui gha dee, I ghi viọ iran werriegbe gha die otọ iran. Iran gha biẹlẹ emọ nibun, iran ghi bun yọ vbe inu.

Jerimaia 3:18

Izrẹl gha deba e Juda, iran ghi gba ke iwe gha dee, ke ẹvbo ne ọ rre odẹ okuọ nii gha dee, iran ghi gha die ẹvbo ne I mu ne avbe erha uwa odede ne ọ gha re ọghe iran ẹdẹdẹmwẹdẹ.”

Jerimaia 31:8

I gha viọ ke odẹ okuọ gha dee, I ghi vbe si iran koko ke ufomwẹ agbọn gha dee, avbe arhuaro kevbe avbe arọe gha lele iran rre, ikhuo ni hanmwa kevbe iran ni gha ra biẹ iran gha werriegbe rre, uhunmwu ẹvbo nọkhua.

Jerimaia 46:27

“Wa ne emwa mwẹ, wa ghẹ gie ohan mu uwa. Ivbi Izrẹl, wa ghẹ runran. I gha fannọ uwa ke otọe ne ọ rrei nii gha dee, ke otọe ne uwa na re oghunmwu gha dee wa gha werriegbe rri owa. Wa ghi do gha rrọ vbe ọfumwegbe, ẹkun gha sẹ uwa otọ, ọmwa rhọkpa i ghi ra ye do runran uwa.

Ezikiẹl 29:21

“Ọnii ghẹ ghi sunu nẹ, I gha ru ẹe ne ivbi Izrẹl wegbe, I ghi vbe ru ẹe ne uwẹ ne Ezikiẹl guan ladian vbe ehe ne emwa hia gha na họn ẹmwẹ ruẹn, ne iran miẹn ehe na rẹn wẹ mẹ ọrọre Nọyaẹnmwa.”

Ezikiẹl 37:21

Iyekọnii, u ghi tama iran wẹ, mẹ Nọyaẹnmwa ne Udazi ra do viọ avbe emwa mwẹ ke ẹvbo hia ne iran gha rrie rre, I gha si iran koko, I ghi viọ iran gha rrie otọe iran tobọ iran.

Hozia 11:11

Iran gha ke Igipt gha dee, zẹ vbene ahianmwẹ tin, kevbe ke Asiria gha dee zẹ vbe idu. I gha dọlegbe viọ iran gha die owa iran. Mẹ ne Nọyaẹnmwa taa ẹe nẹ.”