Maika 5:1 - Edo Bible (E Baibol Ẹdo) Version 1996

¹ Wa ne ivbi e Jerusalẹm, wa khẹ ye egbe! Ghe i ghẹ iran mu okuo gie ima. Iran gha gu ọkaolotu Izrẹl gbinna!

Maika 5:1 ပူးပေါင်းရင်းမြစ်များ

Gẹnẹsis 35:19

Ugbẹn vbe Rekiẹl ghi wu nẹ, a keghi re ẹre ye odẹ ne a la ye Efrat (ne ọ ghi re Bẹtlẹhẹm na).

Gẹnẹsis 49:10

E Juda gha mu ọkpọ ọba mwẹ uniẹn ọnrẹn ọ ra gha rriọba khian. Avbe okpẹvbo gha ya imuohan giẹẹ iran ghi ye a họn ẹmwẹ gbe uhunmwu kotọ nẹẹn.

I Ọba 22:24

Ere Zedekaia na sikẹ Makaia, ọ na gbe ubi ye ọre aro, ọ wẹẹ, “De ẹghẹ ne orhiọn e Nọyaẹnmwa ghi vbe ya sẹ imẹ rae ya gha gu uwẹ guan yi?”

II Ọba 24:2

E Nọyaẹnmwa keghi gie otu ni gbalọ abẹkpẹn vbe ivbi e Babilọn gha dee, e Siria, Moab kevbe Amọn, ne iran do dunmwu e Juda a, zẹ vbene Nọyaẹnmwa la unu avbe akhasẹ ta ẹe wẹ rẹn gha ru ẹe.

Job 16:10

Emwa gha niẹn ukpe da mwẹ, iran do lẹga mwẹ, iran kegha gbe ubi yọ mwẹ aro.

Itan 8:23

Okaro ọ re e Nọyaẹnmwa na yi mwẹ, vbe ẹghẹ okaro, vbe agbọn te suẹn.

Aizaia 10:6

Mẹ gie Asiria ne ọ do khọn ẹvbo dan ne ọ ya ohu mu mwẹ. I gie iran ne iran ya fu emwi viọ, ne iran ya rha, kevbe ne iran ya owẹ rrilo emwa mu otọ zẹ vbe iruẹn vbe adesẹ ore.”

Aizaia 33:22

Ugbalọmwẹ ne a gbalọ okọ nii, i mwẹ asa, ukpọn ne ẹhoho ya sua ẹre khian i gia tan. Ma gha viọ emwi ne avbe ivbiyokuo eghian mwa mwẹ, iran gha bun sẹ vberriọ wẹ uhin ghẹ te obọ avbe arọ gha vbe vba vbọ. E Nọyaẹnmwa tobọ ẹre ọ re ọ ra gha re ọba mwa. Rẹn ọ re ọ ra gha khaemwisẹ yan mwa, ọ ghi vbe gha degue mwa.

Aizaia 8:9

Wa ne uhunmwu ẹvbo, wa ya ohan si egbe koko! Wa danmwehọ, wa ne ẹvbo ni rre urria vbe otọ agbọn na. Wa mu egbe ne uwa ya gbinna. Sokpan, wa gie ohan gha mu uwa. Ẹn, wa mu egbe ne uwa ya gbinna, sokpan, wa gie ohan gha mu uwa.

Aizaia 9:5

Ibata avbe iyokuo ni mu okuo dee kevbe ẹwu iran ne esagiẹn gbe yi hia erhẹn gha giẹn ehia a.

Jerimaia 25:9

‘I khian gie ya tie avbe emwa ni rre odẹ okuọ hia rre, kevbe ọguọmwadia mwẹ ighe e Nebukiadneza ne ọba e Babilọn, I gha viọ iran rre, ne iran do gu e Juda kevbe emwa ni rre uwu ẹre gbinna. Kevbe avbe ẹvbo ni sikẹ ọre hia. I khian fuẹn uhunmwu ẹvbo na kevbe avbe uhunmwu ẹvbo ni lẹga ẹre, I ghi ya ehia khian itowa ẹdẹdẹmwẹdẹ, emwi ne ọ mu ohan ne ọ ye egbe ku ọmwa ohiọnhiọn. Mẹ ne Nọyaẹnmwa ọ re ọ tae.

Jerimaia 4:7

Zẹvbe oduma ne ọ ke ehe ne ọ lẹre yi dee. Onii ne ọ rẹnkhẹn ẹvbo ua la odẹ nẹ. Ọ dee do rẹnkhẹn e Juda. Te a ra ye avbe ẹvbo ni rre Juda khian itowa ọmwa ne ọ gha yin ẹnrẹn i ghi rrọọ.

Eve Orriara 3:30

Ọ gha khọn rẹn ne a gbe mwa ra ne a vbe rhovbiẹ mwa wa gie ima hẹko ya egbe miẹn ehia.

Ezikiẹl 21:32

Erhẹn gha fuẹn uwa a. A gha gbe esagiẹn uwa yotọ vbe ẹvbo uwa tobọ uwa, a i ghi vbe miẹn ọmwa rhọkpa ne ọ gha ye uwa rre ọvbehe.’ ” E Nọyaẹnmwa guaan nẹ.

Ezikiẹl 24:2

“Ovbi ọmwa, gbẹn ikpẹdẹ ne ẹdẹnẹrẹ na khin yotọ rhunmwuda ẹrẹna ọ re ọba e Babilọn ra suẹn gha gu e Jerusalẹm khọn.

Daniẹl 9:25

Yi ọna ẹro ne u vbe rẹn emwi ne a ya ẹe kha. Ke ẹghẹ ne a ya tae wẹ ne abọ e Jerusalẹm kpao do sẹ ẹghẹ ne ọkaolotu ne Osanobua zẹe gha ya rre, ukpo ekigbesiyenẹ vbe ihe ihinrọẹn gha gberra. A gha dọlegbe bọ e Jerusalẹm ke ẹe kevbe idunmwu ni rrọọ kevbe avbe ọkhẹ ne ọ wegbe ọ gha vbe gha rrọọ vbe ukpo eva yan iyeha vbe ihe ihinrọn, sokpan ẹghẹ ọlọghọmwa ọ re ọ khian gha khin.

Joẹl 3:9

“Wa ya ẹmwẹ na wewe, ma avbe uhunmwu ẹvbo wẹẹ, ‘Wa mu egbe okuo; wa si iyokuo uwa koko ne uwa khianmwu!

Emọs 2:3

I gha gbe ogie Moab kevbe ọkaolotu otọe nii hia.”

Habakọk 1:6

I ra dọlegbe viọ ivbi e Babilọn ye ukpo ẹtin, iran ne isanmwisan kevbe ekpakpasusu nii. Iran wa ladian, ne iran gbe agbọn na dunmwu, ne iran ya gha khọn ẹvbo ọvbehe khian.

Habakọk 3:16

I họn emwi na hia I kegha guọ, aranmwẹ mwẹ kegha guọ ne ohan. I zegbe zẹ mwẹ ye otọ owẹ mwẹ kegha mian gbẹghẹgbẹghẹ. I gha hẹko ziengbe khẹ ẹghẹ ne Ọ dee, ne Osanobua gha na rri iran oya ighe iran ni gunmwa gbinna.

Matiu 26:67

Ẹghẹ ni, iran na ghi gie asẹn ye ọre aro, iran keghi ya ugbemwẹ rhanmwẹ ọẹn. Iran ni gbe ubi ye ọre aro keghi vbe kha wẹẹ,

Matiu 27:30

Iran tu asẹn ku ọre, iran keghi rhie ọkpọ ne ọ rre ọre obọ, iran na gbẹe yọ re uhunmwu.

Matiu 5:39

Sokpan, mẹ tama uwa nian, ghẹ rria ọmwaikọmwa ne ọ ruẹ khọ ikhi. Ọmwa gha gbe ubi ye uwẹ irho obọ erha ọmwa, giee wa vbe gbe ye ọghe obọ iye ọmwa.

Iyẹn ne ọ Maan Ọghe Jọn 18:22

Jesu ghi ta ẹmwẹ na nẹ, ọkpa vbe avbe ọgbalegbe ni rre evba keghi gbe ubi ye ọre aro, ọ wẹẹ, “Ogie Ohẹn wẹ gu guan vberriọ!”

Iyẹn ne ọ Maan Ọghe Jọn 19:3

Iran bu ẹre gha dee, iran tuẹ ọe, “U gha tọ u kpẹre Ọba avbe Ju.” Iran keghi sikẹ ọre, iran keghi so ubi ye ọre aro.

Iwinna 23:2

Ananias ne Ogie Ohẹn keghi wẹ ne iran ni mudia ke Pọl gbe ubi ye ọre unu.

II Kọrinti 11:20

Wa gha wa rhie otọ ne ọmwa ne ọ ye uwa khian ọviẹn, ra ne ọ gbe uwa rhu, ne ọ khuẹn ifi mu uwa, ne ọ ma tie uwa ọmwa, ra ne ọ so ubi ye uwa aro.

Diuteronomi 28:49

E Nọyaẹnmwa gha mu okpẹvbo ke ehe ne agbọn sẹe gha dee, emwa ne uwa i họn ẹvbo ne iran zẹ, ọ ghi mu ẹre aro da uwa. Iran ghi siẹn rhu uwa zẹ vbe oghohọn.

Diuteronomi 33:27

Osanobua ọ re ne ọmiẹguan ne uwa de ẹdẹ ekuabọ etẹbitẹ ọ re, ẹre ọ da uwa yi. Ọ keghi khulo eghian uwa ladian vbene uwa ya sikẹ odaro. Ọ wẹ ne uwa wa dunmwu ehia a fẹẹrẹ.

Giọgis 17:7

Igbama ọkpa kegha rre Bẹtlẹhẹm vbe Juda, e Livai ne ọ ke Juda rre nọ.