Levitikọs 26:6 - Edo Bible (E Baibol Ẹdo) Version 1996

⁶ “I gha rhie ọfumwegbe ne uwa vbe otọ rua, wa ghi vbe gha vbiẹ vbe ne uwa i na fian afianma, I gha fuẹn avbe aranmwẹ dan ni rre otọe nii, okuo i ghi ra vbe gha rrọọ vbe evba.

Levitikọs 26:6 ပူးပေါင်းရင်းမြစ်များ

II Ọba 2:24

Elaisia keghi fi egbe werriẹ, ọ ghe iran, ọ keghi ya eni e Nọyaẹnmwa rhovbiẹ iran. Ẹre akpakomiza amwẹ eva na ladian vbe uwu oha, iran na yanghan eva yan iyeva vbe uwu ibiẹka ikpia nii.

I Krọnikol 22:9

Vbene ọ rhirhi a gha ye hẹ, ọ ye yan ma mwẹ. Ọ wẹẹ, ‘U gha biẹ ọmọ okpia ọkpa ne ọ gha khaemwisẹ vbe ọfumwegbe, rhunmwuda, I gha rhie ọfumwegbe ne ẹẹn vbe obọ avbe eghian rẹn hia. Eni ẹnrẹn ọ re ọ gha re Solomọn, rhunmwuda I gha rhie ọfumwegbe kevbe ọrọkhọrhọ ne ivbi Izrẹl vbe ẹghẹ ọre.

II Krọnikol 20:30

Ẹre Jehosiafat na gha re ọba vbe ọfumwegbe, Osanobua keghi gie ẹkun sẹ ọ re otọ vbe odẹ hia.

Job 11:19

Afianma avbe eghian ruẹn i ghi ra fian an, emwa ni bun gha do nọ iyobọ vbe obọ ruẹ.

Job 5:23

A i ra miẹn okuta vbe oha ne u na mu ugbo, aranmwẹ akọn i ra vbe guẹ gbinna.

Psalm 144:14

Te ẹmila mwa gha biẹlẹ gba erhan gba irri, vbene ẹ i na zọrua ra ne ọ wi. Ai gha vbe miẹn okuo eve vbe idunmwu mwa.

Psalm 147:14

Ọ ruẹe ne ẹbe fo la ehe ne otọe uwa lae, ọ keghi vbe ye ọka ne ọ maa sẹẹ vuọn uwa ẹko.

Psalm 29:11

E Nọyaẹnmwa ọ re ọ rhie ẹtin ne emwa rẹn, ọ keghi ya ọfumwegbe fiangbe iran.

Psalm 3:5

Mẹ lovbiẹ, I keghi vbiẹ, e Nọyaẹnmwa keghi degue mwẹ la asọn hia fẹẹrẹ.

Psalm 4:8

I gha lovbiẹ, I ghi vbiẹ ua vbe ọfumwegbe wẹ ọkpa kẹkan, Nọyaẹnmwa, ọre ọ rhie mwẹ lẹre vbe ne a i na mwẹ ẹbe.

Psalm 85:8

I gha danmwehọ ẹmwẹ ne Nọyaẹnmwa ne Osanobua guan ọ ve ima ne emwa rẹn ọfumwegbe, a deghẹ ma ma dọlegbe gha rriẹ odẹ ukọnmwẹ ima.

Ẹksọdọs 23:29

Mẹ i ra khulo iran kua vbe ukpo ọkpa kẹkan, ne a ghẹ miẹn wẹ ẹvbo i ghi rre otọe nii, aranmwẹ akọn ghi do sẹ uwa abọ.

Itan 3:24

U i ra gha fian afianma vbe u a ra ya lovbiẹ, u ghi wa vbe vbiẹ khuẹrhẹ vbe asọn.

Itan 6:22

Emwi ne iran ma ruẹn re gha su uẹ vbe u a yo ehe, ọ gha degue ruẹ vbe asọn, ọ ghi vbe gha bu ruẹ ude vbe ẹghẹ avan.

Aizaia 35:8

Odẹ ne gbodoo gha la evba, a ghi gha tie ẹre “Odẹ uhuanmwẹ.” Ọmworukhọ i ra la odẹ nii ẹdẹ akpa i ra bibi emwa ni lae odẹ.

Aizaia 35:9

Oduma i ra gha rre evba aranmwẹ ni khọ i ra la odẹ nii. Avbe emwa ne Nọyaẹnmwa dẹ werriegbe nẹ, gha la odẹ nii gha rrie owa.

Aizaia 45:7

Mẹ ọ re ọ yi uwanmwẹ kevbe ebiebi mẹ ọ re ọ gie afiangbe kevbe ọfuan rre, mẹ ne Nọyaẹnmwa ọ re ọ ru avbe emwi na hia.

Aizaia 9:7

Te ẹtin arriọba ẹre ra gha muan yọ, ọfumwegbe ọ re otọe arriọba ẹre ra gha ye vbe ẹghẹ hia te irẹn ra rriọba zẹvbe ọmwa ne ọ rriọba lele Devid ne Ọba ẹmwata kevbe uhunmwu ẹmwẹ ọ re irẹn ra ya gha mwẹ ẹtin; ke ẹghẹ na kpao ya sẹ ufomwẹ agbọn. E Nọyaẹnmwa ne Oghodua tae nẹ ighe erriọ rẹn ra ru ehia.

Jerimaia 30:10

“Wa ghẹ gie ohan mu uwa, wa ne emwa mwẹ wa ne ivbi Izrẹl, wa ghẹ fian afianma I gha dẹ uwa werriegbe ke odẹ ne ọ rrei ni rre, ke otọ ne uwa na re oghunmwu rre wa gha rri owa, wa ghi gha rre ọfumwegbe ẹkun gha sẹ uwa otọ, ọmwa rhọkpa ne ọ gha runran uwa i rrọọ.

Jerimaia 31:26

Ẹghẹ nii, emwa ghi gha kha wẹẹ, ‘I ya lovbiẹ, I keghi rhiọrre vbe egbe rọkhọmwẹ.’

Ezikiẹl 14:15

“Ra, adeghẹ I gie aranmwẹ akọn ne ọ ya gbele emwa nii, ne ọ gha gie otọe nii vuọn ne ẹbe sẹrriọ wẹ a i ghi miẹn ọmwa ne ọ la ẹe gberra.

Ezikiẹl 14:17

“Ra, I sẹtin mu okuo la ẹvbo ọkpa, I ghi vbe viọ emwi igbinna dan larọ, ne ọ ya fuẹn emwa nagbọn kevbe aranmwẹ,

Ezikiẹl 14:21

Vbenian ọ re Nọyaẹnmwa ne Udazi khare: “I gha gie emwi ne I ya rri emwa oya enẹ ni khọ sẹ gha rrie Jerusalẹm, ena ọrọre okuo, ukhunmwu, aranmwẹ akọn, kevbe emianmwẹ, ne I ya fuẹn emwa nagbọn kevbe avbe aranmwẹ ba ẹre.

Ezikiẹl 34:25

“I gha gu iran ta ile ne ọ gha rhie maa wẹ ẹkun gha sẹ iran otọ. I gha wabọ avbe aranmwẹ akọn dan hin otọe nii rre, ne avbe ohuan mwẹ sẹtin gha rrọọ vbe ne a i na mwẹ ẹbe vbe oha kevbe uwu ẹgbo.

Ezikiẹl 34:27

Avbe erhan gha mọ, ugbo gha ma emwiokọ, edọmwadẹ ọghọe ghi gha rre otọe ọghọe vbe ne a i na mwẹ ẹbe. Ẹghẹ ne I gha na bunnọ ọgiọrọ avbe emwa mwẹ kua, ne I vbe fannọ iran kua vbe obọ iran ni ya iran khian eviẹn, iran gha do rẹn wẹ mẹ ọrọre Nọyaẹnmwa.

Ezikiẹl 5:17

I ghi gie ohanmwẹ, kevbe aranmwẹ oha, ne iran gbele uwa emọ, I ghi gie ohanmwẹ, ọkhọ kevbe okuo ne iran gbele uwa a. Mẹ ne Nọyaẹnmwa ọre ọ taa ẹe.”

Hozia 2:18

Ogha sẹ ẹghẹ nii, mẹ gha gu avbe aranmwoha hia kevbe avbe ahianmwẹ ta ẹe kugbe, ne iran ghẹ kuan emwa mwẹ ọvbehe. I gha vbe viọ emwi igbinna okuo hia hin otọe nii rre, umozo kevbe uhanbọ hia I ghi gie emwa mwẹ gha rrọọ vbe ọfumwegbe kevbe ne a i na mwẹ ẹbe.

Hozia 2:20

I gha mu eyan mwẹ sẹ, I ghi ya uwẹ khian ọghomwẹ, wẹ ghi vbe miẹn imẹ zẹ vbe Nọyaẹnmwa ruẹn.

Levitikọs 25:18

“Gha rhie owẹ lele uhi kevbe emwamwa ọghe Nọyaẹnmwa ne u miẹn ehe na yin otọ nii vbe ne a i na mwẹ ẹbe.

Levitikọs 25:19

Otọ nii gha mọ, wẹ gha vbe mwẹ sẹ vbene u gha re, ne u vbe gha rri ọe vbe ọfumwegbe.

Levitikọs 26:22

I ghi gie aranmwẹ oha dan la uwu uwa, iran ghi gha gbele avbe ivbi uwa, iran gha fuẹn avbe ẹmila uwa a, wa ne ọ gha sẹ rae ghi gha re ibozẹghẹ sẹrriọ wẹ a i ghi ra gha miẹn emwa vbe urodẹ rua.

Levitikọs 26:25

I ghi si okuo yi uwa egbe ne I ya rri uwa oya ye ne uwa na rhie obọ gberra ile ne ima gba ta, wa na ya si egbe koko ye ẹvbo uwa ne obọ ghẹ vba uwa, I ghi gie emianmwẹ nẹ i mwẹ ukhunmwu gie uwa, ẹ i re aro sẹẹnrẹn wa gha ya de ye igue vbe odaro avbe eghian uwa.

Levitikọs 26:7

Wa gha khọn avbe eghian uwa hia muotọ.

Maika 4:4

Edọmwadẹ ọghọe gha rrọọ vbe ọfumwegbe vbe ugbo azara kevbe oliv ẹre, ọmwarhọkpa i ghi vbe runran ẹẹn. E Nọyaẹnmwa ne Oghodua ru eyan na nẹ.

Zẹfanaia 3:13

Ivbi Izrẹl ni miẹn uhunmwu vbọ i fu ọmwa, iran i ra tọlọ ọmwa, iran i ra ta ohoghe ra ne iran mu ọmwa rẹrẹ. Agbọn gha ma iran, ẹkun gha vbe sẹ iran otọ vbene iran i na mu ohan ọmwa ikọmwa.”

Hagai 2:9

Ọgua Osa ne ọgbọn na gha mose sẹẹ Ọgua Osa nẹdẹ, evba ọ re imẹ gha na rhie ne emwa mwẹ wẹ ne agbọn ma iran kevbe ne iran gha rre ọfumwegbe.” Erriọ Nọyaẹnmwa ne Oghodua khare.

Zẹkaraia 9:10

E Nọyaẹnmwa khare wẹẹ, “I gha viọ avbe ikẹkẹ okuo hin otọe Izrẹl rre. I ghi viọ avbe ẹsin hin e Jerusalẹm rre; avbe uhanbọ ne a lo vbe okuo, a gha bunnọ ehia a. Ọba ruẹ gha ru adọlọ ọfumwegbe ye ẹbu avbe uhunmwu ẹvbo; ọ gha khaemwisẹ ke okun ya sẹ okun ke Ẹzẹ Yufretes kpao yasẹ ehe ne agbọn sẹe.”

Iyẹn ne ọ Maan Ọghe Jọn 14:27

“Ọfumwegbe ọre I ya we uwa, ọfumwegbe mwẹ ọre I ya we uwa, ẹ i re. Vbene agbọn ya we ọmwa ọre I ya we uwa. Wa ghẹ fian afianma, wa ghẹ gie ohan mu uwa.

Iwinna 12:6

Asọn ne ọ lele ẹdẹ ne Hẹrọd te ra rhie Pita gie avbe emwa, Pita kegha vbiẹ vbe adesẹneva ivbiyokuo eva. A keghi ya eghan eva rro ẹre, emwa eso keghi vbe gha khẹ odẹ vbe onurho ẹwẹdọ nii.

Ebe ne Pọl gbẹẹn gie emwa Rom 5:1

Vbene a ghi na miẹn wẹ a la ekpa iyayi ya ima khian emwa ni gu Osanobua mudia ẹse, te ima ghi mwẹ ọfumwegbe vbe ehe ne Osanobua ye vbekpa Nọyaẹnmwa Jesu Kristi.