Levitikọs 26:16 - Edo Bible (E Baibol Ẹdo) Version 1996

¹⁶ I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

Levitikọs 26:16 ပူးပေါင်းရင်းမြစ်များ

I Ọba 8:37

“A deghẹ ukhunmwu ghi fi vbe otọe nii, ra te okpemianmwẹ ghi rrọọ, ra te okpe ẹhoho ghi dunmwu emwiokọ rua, ra deghẹ te eghian iran ghi zagha avbe emwa ruẹn kua, ra deghẹ te emianmwẹ ra ohuẹhuẹ la uwu iran,

Job 18:11

Emwi ne ọ mu ohan diakhẹ ọre lẹga ehe hia. Ọ keghi gha lele ẹre usomwẹ owẹ khian.

Job 20:25

Ifẹnmwẹ ha ikinnegbe ẹre ladian, esagiẹn ọnrẹn gha nọnọ kua vbe ukpe ọre ne ọ fi wainwain. Okpe udu ne ọ kpe ẹghele de gbe ẹre orhiọn.

Job 31:8

giẹ emwi fuẹn emwi okọ mwẹ hia a, ra ne emwa ọvbehe rri emwi okọ ne I kọe.

Psalm 109:6

Zẹ ọbuohiẹn dan, ne ọ ya bu ohiẹn avbe eghian mwẹ, ne u gie okpa vbe uwu avbe eghian rẹn guẹe gui.

Psalm 73:19

A fuẹn iran an vbe udomwurri, ufomwẹ iran keghi khọrhiọn.

Psalm 78:33

Rhunmwuda ọnii, ọ keghi fian iran ẹdagbọn uan, zẹ vbe uhiọnrọnmwẹ, kevbe arrọ ọghe iran vbe uwu ekpainkpain.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Itan 3:33

Te Nọyaẹnmwa fi owa emwa dan unu, sokpan, ọ keghi fiangbe owa emwa esi.

Aizaia 10:4

Iran gha gbele uwa a vbe okuo ra iran ghi silo uwa viọ gha rrie zẹ vbe oghunmwu. Ọ gha rhe ye rrio, ohu e Nọyaẹnmwa i he ye fo, obọ ẹre gha ye niẹn ladian ne ọ ya rria ikhi.

Aizaia 62:8

E Nọyaẹnmwa yan eyan akekhọerre nẹ ọ gha ya ẹtin irọẹn mu ẹẹn sẹ, “Ọka ruẹ i ghi re ne avbe eghian ruẹn gha ya gha koko egbe iran. Avbe ọrriọvbe i ghi ra dọlegbe gha rhie ayọn ruẹn da.

Aizaia 7:2

Ọba e Juda ghi họn wẹ okuo e Siria sẹẹ otọe e Juda nẹ, ohan mu irẹn kevbe emwa rẹn sẹrriọ wẹ iran ke gha mian gbẹghẹgbẹghẹ zẹ vbe avbe erhan ne ẹhoho hoho.

Jerimaia 12:13

Avbe emwa mwẹ kọ ọka, sokpan iran keghi ya rhọ irunmwu; iran kakabọ winna, sokpan, iran ma miẹn emwirhọkpa vbọ. Rhunmwuda ohu mwẹ ne ọ wegbe, emwiokọ iran ma maa.”

Jerimaia 15:3

“Mẹ ne Nọyaẹnmwa ta ẹe nẹ wẹ emwi ohan enẹ ọ re ọ ra rruan iran; a gha gbele iran vbe okuo, ekita gha silo ikun iran gha rrie, ahianmwẹ gha rri iran, aranmwẹ oha ghi rhie ni ghi kẹe.

Jerimaia 15:8

Ikhuo ni dẹgbẹ ni rre otọe uwa, bun sẹ ekhae ni rre ọkpẹn okun. I gbele avbe igbama uwa ye isẹrre I keghi ru ẹe ne usẹ gha sẹ iye iran, I ye akhiẹ nọkhua kevbe ohan fi iran emwi vbe udomwurri.

Jerimaia 20:4

E Nọyaẹnmwa tobọ ẹre khare wẹẹ, “Rẹn ra ya uwẹ khian ohan ne egbe ruẹ kevbe avbe ọse ruẹ hia, wẹ gha vbe miẹn iran vbe a ya umozo avbe eghian gbele iran hia. I ra do viọ ivbi e Juda hia yan ẹtin ọba e Babilọn obọ. Ọ gha viọ eso vbọ oghunmwu gha rrie ẹvbo irẹn, ọ ghi gbele ni dekẹe ua.

Jerimaia 5:17

Iran gha rri emwiokọ kevbe evbare uwa fo. Iran gha gbele ivbi uwa nikpia kevbe nikhuo, iran gha gbele avbe ohuan kevbe ẹwe uwa, iran gha dunmwu ogba azara kevbe erhan ohọ uwa hia a. Ẹvbo ne a gbe odin ga ne uwa mu ẹtin yan, ivbiyokuo iran gha guọghọ ẹe rua.

Ezikiẹl 24:23

Wa i ra bannọ uhunmwu yotọ ra ne uwa gha ya owẹ mama otọ khian, ra ne uwa khiẹ ra ne uwa viẹ. Wa ghi gha rri ororo rhunmwuda orukhọ uwa, wa ghi gha rriakọn ma egbe.

Ezikiẹl 33:10

E Nọyaẹnmwa keghi gunmwẹ guan wẹẹ, “Ovbi ọmwa. Wẹ vbe ta ẹmwẹ ne ivbi Izrẹl ta khian ma iran wẹẹ: ‘Ihẹ orukhọ mwa khua mwa kevbe abaku ru mwa. Te ima ghi rri ororo. Vbe a ra ya miẹn uhunmwu hẹ vbe ọna.’

Emọs 5:11

Wa wọ avbe ivbiogue uhunmwu, wa keghi vbe do iran ọka viọ. Rhunmwuda ọnii, wa i yin owa okuta ne mose mose ne uwa bọlọe, ra na uwa da ayọn ne ọ ke ugbo azara ne uwa gbe rre.

Maika 6:15

“Wa gha kọ emwi, sokpan, wa i ra rhọ, wa gha minọ ofigbọn oliv, sokpan, wa i ra lo iran, wa gha ru ayọn, sokpan, wa i ra da ẹe.

Hagai 1:6

Wa kọ ọka ọrhẹnrhẹn, sokpan ekherhe wa miẹn fian. Wa miẹn evbare gha re sokpan ẹ i vuọn uwa ẹko. Wa miẹn ayọn gha da, sokpan ọ ma sẹ ọkẹn sẹ ne ọ gha gbe uwa. Wa mwẹ ukpọn, sokpan, ẹ i gbe uwa oni. Ọmwa ne ọ winna, igho ne ọ miẹn i sẹ ọe ya koko egbe.

Zẹkaraia 14:12

E Nọyaẹnmwa gha mu emianmwẹ ne ọ wegbe ku avbe uhunmwu ẹvbo hia ni mu okuo ye Jerusalẹm. Ikpakpa egbe iran gha kẹkẹ ua vbe iran ma he wu, aro iran kevbe aranmwẹ iran gha kẹkẹ ua.

Malakai 2:3

I gha rria ivbi uwa ikhi, i ghi ya uwa aro wiẹn isan avbe aranmwẹ ne uwa do ya zọ ese, a ghi vbe dada uwa ladian gha rrie otiku.

Diuteronomi 28:51

Iran ghi rri ẹmila kevbe emwiokọ uwa, ovbamẹ ghi gbe uwa la ẹrinmwi. Iran i ra sẹ ikpẹ ọka ọkpa rae ne uwa ra ayọn ra ofigbọn ọliv, ra ẹmila ra ohuan, wa ghi wulo.

Diuteronomi 32:25

Okuo gha gbele emwa ye ughe, ugborrirri ghi gbele emwa ye uwowa avbe igbama kevbe ivbialeke gha wulo, kevbe emọ obọ kevbe avbe ọmaẹn, ne a ra sẹrae i rrọọ.

Hibru 10:31

Ọkpan udu nọ, deghẹ a defi Osanobua nọ rrọọ obọ!

Giọgis 6:11

Ẹre odibo e Nọyaẹnmwa na do tota ye ototọ okan ne ọ rre igue ne a tie ẹre Ọfra ne ọ re ọghe Joas ne ovbi ẹwae Abiẹzẹ. Ovbi ẹre ighẹ Gidiọn kegha hẹko do khuọn ọka vbe okọ ne a na minọ ayọn ne emwa Midian i ghẹ bẹghe ẹre.

I Samuẹl 2:33

Sevba, I gha sẹ ọkpa vbe uwu ivbi uẹ rae ye agbọn, rẹn ghi gha ga mwẹ zẹ vbe ohẹn. Sokpan rẹn gha do rhu aro, ọ ghi hohua, ivbuẹ ni ghi dekẹe hia, uwu ọkpankpan iran ra wulo yi.