Levitikọs 17:5 - Edo Bible (E Baibol Ẹdo) Version 1996

⁵ Emwi ne a ya emwamwa na kha ọrọre wẹ, emwi ne ivbi Izrẹl te ka gbe vbe adesẹ ore yi, te iran ghi khian gha viọ ehia bu e Nọyaẹnmwa rre. Te iran khian ghi gha viọ iran bu ohẹn rrie onurho Owa Ukpọn Ile, a ghi gbe ẹe zẹ vbe izẹọhẹ isara.

Levitikọs 17:5 ပူးပေါင်းရင်းမြစ်များ

Gẹnẹsis 21:33

Ebraham keghi gbọ erhan ikhinmwi ye Biẹsiẹba, ọ ke ga Nọyaẹnmwa ne Osanobua Etẹbitẹ.

Gẹnẹsis 22:13

Ebraham ghi tọn aro mu, ọ ke bẹghe ogho ọkpa ne ẹti gbalọ ẹre igho. Ọ na ya muẹn, ọ na ya zọ ese na giẹn uan ye ihe ovbi ẹre nokpia.

Gẹnẹsis 22:2

Osanobua keghi kha wẹẹ, “Rhie ovbuẹ, ovbuẹ ne ukpọmọkpa ighẹ Aizik ne u ho ẹmwẹ ọnrẹn, ne u gha rrie otọ Moraia. U ghi ya yae zọ ese na giuan, vbe uhunmwu oke ne I gha rhie ma ruẹn.”

Gẹnẹsis 31:54

Ọ keghi gbe aranmwẹ ne ọ ya zọ ese vbe uhunmwu oke. Ọ keghi tie emwa irẹn ne iran do rri evbare. Ugbẹn vbe iran ghi re nẹ, iran keghi gbe asọn nii vbe uhunmwu oke nii.

I Ọba 14:23

Iran keghi họlọ ehe ne iran na gho avbe ẹbọ ohoghe, iran keghi mannọ orre okuta kevbe ọkpọ erhan ni mwẹ irhu emwi ne iran gha ghoo, vbe uhunmwu oke kevbe ototọ erhan ni mwẹ irhu.

I Ọba 3:2

A ma he bọ Ọgua Osa ne Nọyaẹnmwa, rhunmwuda ọnii, ihe ughughan ni bun ọ re emwa na ye gha zọ ese.

I Ọba 3:3

E Solomọn keghi ho ẹmwẹ e Nọyaẹnmwa ọ keghi vbe gha ru vbene Devid ne erha ẹe tama rẹn, sokpan ọ yevbe gbele aranmwẹ, ọ kevbe ye iran zọ ese vbe Ogiukpo ughughan.

II Ọba 16:4

Ehaz kegha zọ ese, ọ na vbe gha giẹn eturari vbe ehe ne iran ni ga ẹbọ na ga hia, uhunmwu oke kevbe erhan ne ọ gbe irhu hia.

II Ọba 17:10

Iran keghi viọ amazẹ Asiẹrra kevbe orre ọre ne a ye okuta ru lele uhunmwu oke kevbe ototọ erhan ni mwẹ irhu hia.

II Krọnikol 28:4

Ehaz kegha zọ ese ọ na vbe gha giẹn eturari vbe aro ẹbọ ne iran ni ga ẹbọ mu ye uhunmwu oke hia kevbe ototọ erhan ni mwẹ irhu hia.

Ẹksọdọs 24:5

Rẹn keghi gie igbama vbe uwu ivbi Izrẹl, iran na ya zọ ese ne a wa giẹn uan, iran na vbe gbele ẹkhuia ẹmila ya zọ ese ghe Nọyaẹnmwa, zẹvbe izọese ọghe isara.

Ezikiẹl 20:28

I viọ iran gha die otọ ne I wẹ I gha mu ne iran. Iran ghi miẹn avbe oke ni yo kevbe avbe erhan ni mwẹ ebe nunuunu, iran kegha zọ ese vbe ehe ne ehia ye.

Ezikiẹl 22:9

Eso vbe uwu uwa mu ohoghe ba ọmwa ọvbehe, ne a miẹn ehe na gbele iran an, eso vbe uwu iran vbe rri avbe emwi ne a ya ru ẹbọ. Eso, orriarria ekhọe iran ọ re iran wa ya ru emwi.

Ezikiẹl 43:27

Uzọla ọkpa ghẹ ghi gberra nẹ, avbe ohẹn ghi suẹn gha zọ ese vbe ogiukpo nii, ese ne a gien uan kevbe ọghe isara ọghe emwa nii. Ẹghẹ nii, ẹko uwa hia ghi do gha rhiẹnrhiẹn mwẹ. Mẹ ne Nọyaẹnmwa ne Udazi ọ re ọ tae.”

Ezikiẹl 44:15

E Nọyaẹnmwa ne Udazi khare wẹẹ, “Sokpan, avbe ohẹn ni re ivbi ẹwae e Livai, ni rre ivbi uniẹn e Zadọk, wa ye ekhọekekhọe gha ga mwẹ vbe Ọgua Osa, vbe avbe ivbi Izrẹl nekpa fi iyeke gbe mwẹ nẹ. Rhunmwuda ọnii nian, iran ọ re ọ ghi ra gha re emwa ni gha ga mwẹ, iran ọ re ọ ghi ra vbe gha sẹ ehe ne I ye ne iran do gha ya ẹvbi aranmwẹ kevbe esagiẹn emwi ne a ya zọọ ese, zẹ ọhẹ mẹ.

Levitikọs 17:6

Ohẹn ghi rhurhẹ esagiẹn ọnrẹn ku ikinnegbe aka ne ọ rre onurho ne a la lao Owa Ukpọn, ọ ghi giẹn ẹvbi ẹre ne ọ miẹn ehe na winhin ladian uwinhinmwẹ ne ọ gha yẹ e Nọyaẹnmwa ladian.

Diuteronomi 12:2

Ẹre ena khin. Vbe otọ ne uwa ra mu nii, wa dunmwu ehe hia ne emwa nii na gho ẹbọ, vbe oke ni yo, oke ne giẹrẹ kevbe ototọ avbe erhan ni mwẹ ebe ọgbọn.