Levitikọs 14:7 - Edo Bible (E Baibol Ẹdo) Version 1996

⁷ Ọ ghi sanmwẹ esagiẹn nii yan ọmwa ne a ra khuẹ hin emwirregbekẹn rre, igba ihinrọn, ọ ghi ta ẹe wẹ ẹ i ghi mwẹ awua. Ọ ghi sẹ ahianmwẹ ne a ma gbe nii rae ne ọ tin la oha gha rrie.

Levitikọs 14:7 ပူးပေါင်းရင်းမြစ်များ

II Ọba 5:10

Elaisia keghi gie ọguọmwadia ya tama rẹn wẹ ne ọ ya khuẹ igba ihinrọn vbe ẹzẹ e Jọdan, a gha vbe gbe emianmwẹ ne ọ rre ọre egbe fo fẹẹrẹ.

II Ọba 5:14

Ẹre Naaman na gha rrie Jọdan, ọ na dinmwi ye uwu ẹre igba ihinrọn vbene Elaisia wẹ ne ọ ru ẹe, egbe keghi wa rran rẹn giẹnrẹn. Efun egbe ẹre keghi deziẹn, emianmwẹ i ghi rrọọ, ọ kegha ye zẹ vbe ne ọghe ọmobọ ye.

Psalm 51:2

Khuẹ emwi dan mwẹ hia kua ne u vbe khuẹ mwẹ huan hin orukhọ mwẹ rre.

Psalm 51:7

Khiẹn orukhọ mwẹ hin rre mẹ gha huan, khuẹ mwẹ mẹ gha fua sẹẹ isonorhọ.

Aizaia 52:15

Sokpan, te irẹn khian gha re ọyunnuan ne avbe uhunmwu ẹvbo nibun, avbe ọba gha yan unu uan, iran i miẹn ẹmwẹ ta. Iran gha bẹghe, iran ghi vbe rẹn otọ emwi ne iran ma he rẹn ẹdẹ.”

Ezikiẹl 36:25

I gha miẹn amẹ afọ yan uwa, awua ẹbọ ghi lahin uwa egbe rre, deba avbe emwi ọvbehe hia ne ọ te mu awua ye uwa egbe.

Daniẹl 9:24

“Ukpo ekigbesiyenẹ vbe ihe ihinrọn ọ re Osanobua bu yọ ne ọ gha na do fannọ emwa ruẹn kevbe ẹvbo ruẹ nọhuanrẹn hin obọ orukhọ kevbe ọkhọ rre. A gha ya orukhọ bọ emwa, a ghi mu ẹmwata etẹbitẹ gbọọ, ẹghẹ nii umian nii, kevbe ẹmwẹ akhasẹ nii ghi do sẹ, a ghi do do ugie ya dọlegbe rhie Ọgua Osa ye ihe.

Levitikọs 13:13

ohẹn ghi dọlegbe ghe ẹre, ọ gha miẹn wẹ, ọ gele wa gba ẹre egbe nẹ, ọ ghi ta ẹe wẹ ọmwa nii i mwẹ awua. Ikpakpa egbe ẹre khian nọfua nẹ, awua i ghi guẹe.

Levitikọs 13:17

Ọ ghi dọlegbe ghe ẹre egbe, a deghẹ ẹtẹ nii do gha fuọfua ẹi mwẹ awua, ohẹn ghi ta ẹe wẹ ẹ i mwẹ awua,

Levitikọs 14:51

Ọ ghi rhie erhan sida nii, ọ ghi fi ẹe ye uwu esagiẹn ahianmwẹ ne a gbe nii, kevbe amẹ ne a da sa ke ẹzẹ rre nii, ọ ghi miẹn rẹn ye owa nii igba ihinrọn.

Levitikọs 16:14

Ọ ghi rhie vbe esagiẹn ẹkhuia ẹmila nii, ọ ghi ya ikpinhianbọ ẹre sanmwẹ ọẹn ye odaro ugue ẹkpẹti nii, ọ ghi sanmwẹ eso ye odaro Ẹkpẹti Ile nii igba ihinrọn.

Levitikọs 16:19

Ọ ghi vbe ya ikpinhianbọ ẹre sanmwẹ esagiẹn yan rẹn igba ihinrọn. Odẹ vberriọ, ọre ọ gha ya họnmwẹ awua orukhọ ivbi Izrẹl hin rre, ọ ghi ya ẹe khian ne ọ huansẹ.

Levitikọs 16:22

Ẹwe nii ghi mu orukhọ iran hia; gha rrie otọ ne ẹvbo ma yin.

Levitikọs 4:17

Ọ ghi fi ikpinhianbọ ẹre yọ, ọ ghi sanmwẹ ọẹn ye odaro ukpọn onurho igba ihinrọn.

Levitikọs 4:6

“Ọ ghi fi ikpinhianbọ ẹre yọ igba ihinrọn, ọ ghi sanmwẹ ọẹn ye odaro ukpọn onurho ne ọ huansẹ nii.

Levitikọs 8:11

Ọ keghi rhie vbe ori nii, ọ keghi sanmwẹ ọẹn igba ihinrọn yan aka kevbe emwi ne a ya ru emwi vbọ hia, deba ọkpan nọkhua kevbe emwi ne a mu ẹẹn yan, ne a miẹn ehe na ya ehia fi ohan ne Nọyaẹnmwa.

Maika 7:19

U gha dọlegbe tohan mwa uhukpa bare. U gha ya owẹ rrilo orukhọ mwa mu otọ u ghi kpolo ẹe ku ototọ okun!

Nọmbas 19:12

Ọ ghi ya ye amẹ akpehuan khuẹ egbe ẹre huan vbe ikpẹdẹ ne ogieha ke ikpẹdẹ ne ogihinrọn, rẹn keghi do gha re ne ọ huanrẹn, sokpan a deghẹ ọ ma khuẹ egbe ẹre huan vbe ikpẹdẹ ne ogihinrọn, ọ ghi gha re nọ ma huan.

Iyẹn ne ọ Maan Ọghe Jọn 19:34

Sokpan, ọkpa vbe uwu avbe ivbiyokuo keghi so asoro ẹre ye Jesu efẹn, esagiẹn kevbe amẹ keghi gbe kua. (

Hibru 10:22

Rhunmwuda ọnii, wa gie ima ye ẹkoata sikẹ Osanobua, ba iyayi ne aro dae, ke ẹe kevbe orhiọn ne a kpe huan hin ekhọe ne ọ rri abe rre nẹ, kevbe egbe ne a ye amẹ ne ọ hianrẹn khuẹ.

Hibru 12:24

Wa keghi bu Jesu gha dee, ọmwa ne ọ mwamwa ile ọgbọn nii ye otọ kevbe esagiẹn ne agbe kha kha, ne ọ vbe ta ẹmwẹ emwi ni maa sẹ esagiẹn ọghe Ebẹl.

Hibru 9:13

Esagiẹn ẹwe kevbe ẹmila nii, kevbe emuẹn ese ne a giẹn uan nii, a ghi bọnmwẹ ọẹn yan iran ni ma huan vbe ọghe ilawo iruemwẹ ugamwẹ, ọ ghi ya iran khian ni huanrẹn zẹ vbe ọghe ilawo iruemwi ugamwẹ.

Hibru 9:19

Okaro, Mosis keghi talọ ẹmwẹ uhi na ma emwa nii, zẹ vbene a gbẹn ye nene Uhi. Vbe iyeke ọnii, ọ keghi mu esagiẹn ẹmila ke ẹe kevbe amẹ, ọ keghi ye hisọp kevbe iku oru ododo, sanmwẹ ọẹn ku ebe nene Uhi kevbe avbe emwa nii.

Hibru 9:21

Erriọ vbe nọ, Mosis keghi vbe miẹn esagiẹn yan Ọgua ukpọn nii, kevbe avbe emwi ne a lo vbe ẹghẹ ugamwẹ.

Hibru 9:26

Akpawẹ erriọ nọ, ẹghẹ ni bun ọre ọ gha ya rri oya ke ne agbọn ya suẹn gha dee. Sokpan rẹn keghi ladian nian uhukpa ọghe ọfo vbe otọ, ne ọ do ya egbe ẹre zọ ese ya kpe orukhọ kua, vbe ẹghẹ na ne emwi hia ni rrọọ ghi na ye egbe rrie ufomwẹ.

I Pita 1:2

Te a hannọ uwa zẹ vbe emwamwa ekhọe ọghe Osanobua ne Erha, ne Orhiọn rẹn ye uwa khian emwa ni huanrẹn, ne uwa gha họn ẹmwẹ ne Jesu Kristi, ne esagiẹn ọnrẹn kpe uwa iruẹn kua. Ẹsọhẹ kevbe ọfumwegbe gha re ọghe uwa vbene ọ vuọn sẹ omwa fo.

I Jọn 5:6

Jesu Kristi ọrọre ọmwa ne ọ rre, ọ rre ke irẹn kevbe amẹ ọghẹ isamẹ ọnrẹn kevbe esagiẹn ọghe uwu ẹre. Ẹ i re rẹn vbe amẹ ọkpa ọre ọ rre, sokpan ke irẹn kevbe amẹ kevbe esagiẹn. Nene Orhiọn tobọ ẹre vbe se osẹe wẹ ẹmwata ọ na khin, rhunmwuda, ẹmwata ọre nene Orhiọn khin.