Kọlose 2:8 - Edo Bible (E Baibol Ẹdo) Version 1996

⁸ Wa ghẹ gie ọmwaikọmwa ya ẹwaẹn akuọkan ne agbọn ya rẹrẹ ọmwa mu uwa oghunmwu, iruẹmwi la obọ dinna obọ, ọghe emwa, ọre ọ ke rre, kevbe obọ avbe eniwanrẹn asọn ni da kha vbe avbe ideghedeghe agbọn vbe ẹrinmwi, ighẹ ẹ i re obọ Kristi.

Kọlose 2:8 ပူးပေါင်းရင်းမြစ်များ

Ihuan Ne Ọ Sọọ Ihuan Hia 2:15

Munọ avbe umuọkhọkhọ nii, avbe umuọkhọkhọ negiẹrẹ nii, ne iran ghẹ ya rhia ima azara nii gbe obobo rua.

Jerimaia 29:8

Mẹ ne Nọyaẹnmwa ne Osanobua Izrẹl tama uwa nian, ne uwa ghẹ gie iran rẹrẹ uwa ighẹ avbe akhasẹ ni rre ehe ne uwa ye, fa avbe iran ni kha ighẹ iran gha sẹtin ta emwi ne ọ gha sunu akhuẹ ma ọmwa. Wa ghẹ vbe zẹdẹ danmwehọ imina ne iran wẹ iran mina.

Matiu 10:17

Wa yegbe, rhunmwuda emwa eso gha dekun uwa mu gha rrie iko, a gha vbe gbe uwa asan vbe Ọgua ediọn iran.

Matiu 16:6

Jesu keghi tama iran wẹẹ, “Wa mwẹ ẹwaẹn, ne u wa vbe gha begbe vbe obọ eyist avbe Sadusi kevbe Farisi.”

Matiu 7:15

“Wa gha ba avbe akhasẹ ohoghe. Iran gha mu akpa ohuan khuẹrhẹ yọ bu uwa rre, sokpan oduma dan iran wa khọ vbe uwu egbe.

Iwinna 17:18

Avbe ọmamwaemwi Epikurian kevbe Stoik eso keghi vbe guee gha muan ẹmwẹ. Eso vbọ kegha kha wẹ, “De emwi ne ole unu na vbe miẹn gha ta yi?” Eso vbọ keghi vbe kha wẹ, “Ọ ye vbe ẹmwẹ ẹbọ ne ima mannọẹn ọre ọ ta.” Emwi ne ọ ye iran ta ẹmwẹ na ọrọre wẹ te Pọl gha kpe orhu Jesu kevbe arhiọkpaegbe.

Iwinna 17:32

Ugbẹn vbe iran ghi họn vbe Pọl ya unu kan ẹmwẹ arhiọkpaegbe vbe idin orinmwi, eso kegha yae gbe ogiẹ, sokpan eso vbọ keghi vbe kha wẹ, “Ma gha ho ne u dọlegbe guan kan ẹmwẹ na.

Ebe ne Pọl gbẹẹn gie emwa Rom 16:17

Gun mwẹ tama uwa etẹn mwẹ, wa gha baba iran ni si iwannegbe rre ne iran na vbe mu iyayi emwa eso rhia ye iran obọ, iran ni ghe odan ye iruẹmwi ne uwa ka rhan obọ miẹn nẹ, wa gha lẹ ne iran.

I Kọrinti 10:12

Ọmwa ne ọ ro ighẹ rẹn mudia nẹ, ọ mwẹ ẹwaẹn ne ọ ghẹ ya de.

I Kọrinti 8:9

Sokpan, u ghi mwẹ ẹwaẹn ne u ghẹ ya ye rhunmwuda ighẹ u sẹtin ru emwi ne ọ khọn ruẹn ye ọmwa ne iyayi ẹre ma wo vbe egbe de ye orukhọ.

II Kọrinti 10:5

Ma guọghọ ẹe sẹ otọ ighẹ emwi idobo ọghe uhiomwẹ ne emwa mu ye odẹ irẹnmwi Osanobua, ma munọ iro ekhọe hia oghunmwu, a na ye iran uhunmwu rhanmwẹ otọ ne Kristi.

Galatia 1:14

I keghi ye ọrhẹnrhẹn gberra avbe Ju ne iho mwa vbe uwu ugamwẹ avbe Ju. I keghi wa mu ẹmwẹ emwi ne avbe erha mwa odede ru de ẹdẹ yan uhunmwu sẹẹ ẹsẹse.

Galatia 4:3

Erriọ vbe nọ, ma tobọ ima keghi te vbe gha re eviẹn avbe orhiọn ni kha yan agbọn na, rhinrin ma te do sẹ okpia vbe emwi ni re ọ ghe orhiọn.

Galatia 4:9

Sokpan wanwan na nian, vbene uwa ghi na rẹn Osanobua nẹ, ra ne I wa kha wẹ, vbene Osanobua ghi na rẹn uwa nẹ, vbe ọ zẹ ne uwa na ho ne uwa dọlegbe bu avbe orhiọn ẹwobi ne vburriẹ, ni khaemwisẹ ni, gha khian yi? Vbe ọ zẹ ne uwa na dọlegbe ho ne uwa gha re eviẹn iran?

Galatia 5:15

Sokpan deghẹ te uwa ru emwi vbe atita, vbe ne uwa na kuan egbe, ye akọn rri egbe, wa ghi khẹ ye egbe ne uwa ghẹ ya miẹn egbe uhunmwu.

Ẹfisọs 2:2

Ẹghẹ nii, wa kegha lele ukpowẹ emwi dan ọghe agbọn na, wa kegha ru vbene ọ khare ighẹ ọmwa ne ọ rre ọdakha yan ẹtin avbe orhiọn ni rre ideghedeghe, orhiọn ne ọ sua iran nian ighẹ iran ne ẹ họn ẹmwẹ ne Osanobua.

Ẹfisọs 4:20

Wa ma ruẹ emwi vberriọ vbe ehe ne Kristi ye.

Ẹfisọs 5:6

Wa ghẹ gie ọmwa rhọkpa ya ẹmwẹ ọzuọ mu uwa rẹrẹ, usun emwi ne ọ si ẹe ne izohu Osanobua gha na rhurhẹ yan iran ne ẹ i họn ẹmwẹ nẹẹn, ọre ena khin.

Diuteronomi 6:12

Wa ghi gie aro uwa da ẹe we wa ma mianmian e Nọyaẹnmwa ne ọ viọ uwa ke Igipt ladian vbe ehe ne uwa na te re eviẹn.

Filipai 3:2

Wa gha ba iran ni ru emwi dan nii, avbe ekita nii, emwa ni mu yan rẹn wẹ te iran ra gha giagia egbe iran.

Kọlose 2:18

Ghẹ gie ọmwaikọmwa ne ọ wẹ irẹn sẹ ruẹ, rhunmwuda ighẹ rẹn miẹn umian suẹ gọọ, ne ọ gba ẹmwẹ imuegberriotọ ọghe abawẹ mu unu, deba avbe odibosa ne a ghoo. Egbe ọre ọ mu emwa vberriọ, vbe. ne ẹ i na vbe mwẹ emwi ne ọ si ẹe, rhunmwuda, erriọ iro ekhọe ẹre la ghe, zẹ vbe ọmwa kẹkan.

Kọlose 2:20

Wa deba Kristi wu nẹ, a keghi vbe fannọ uwa ye otọ vbe obọ avbe orhiọn ne ẹrinmwi, ni khaemwisẹ vbe ideghedeghe agbọn vbe ẹrinmwi. Vbọzẹ ne uwa na ruemwi yi zẹ vbene a miẹn wẹ ọghe agbọn na ọ re uwa ye khin? Vbọzẹ ne uwa na ye avbe uhi nii ru emwi yi, ni kha re wẹ,

Kọlose 2:22

A ghẹ ghi lo avbe emwi na hia nẹ, iran i ghi mwẹ e vbọ gie a ya ru ọvbehe. Ilele ne emwa ne agbọn mu gbọ kẹkan, kevbe ne iran vbe ma emwa ẹre ọre ena khin.

Kọlose 2:23

Vbe ẹmwata, ọ ghi ye vbe ne a miẹn wẹ, ẹwaẹn rrọọ vbe iran a gha ya obọ yẹn emwa ẹho, ne iran gha gho avbe odibo Osa, kevbe imuegberriotọ ọghe abawẹ, kevbe obalọ ne a ya rri egbe vberriọ, iran i mwẹ ẹtin ne a ya da ọmwa obọ orriarria egbe yi.

I Timoti 6:20

Timoti ye obọ da ẹe yi vbe ne a i na mwẹ ẹbe, ighẹ emwi ne a ka ye uẹ obọ. Ghẹ mwẹ obọ vbe ọta ne ẹ i mwẹ emwi ne ọ khọ ọghe Osanobua, kevbe imuaẹmwẹ ukọnmwẹ, egbe emwi ne emwa ukọnmwẹ tie ẹre “Irẹnmwi.”

II Timoti 3:13

Sokpan avbe emwa dan kevbe ayunukpaegbe ghi gha rhia yọ rhia yọ, iran ghi gha mu emwa ọvbehe rẹrẹ, a ghi vbe gha mu iran tobọ iran rẹrẹ.

Hibru 13:9

Wa ghẹ gie iruẹmwi ughughan ne a ma he ka rẹn, bi uwa hin urodẹ ẹmwata rre. Ọ kere ne a ya ẹsọhẹ Osanobua ye orhiọn ima khian ni wo vbe egbe, i ghẹ ẹ i re a ru emwi ne uhi kha re vbe ekpa evbare, iran ni ka ru vbene avbe uhi nii khare yi, ma miẹn emwi ọkpa ne iran miẹn vbọ.

Hibru 3:12

Etẹn mwẹ, wa mwẹ ẹwaẹn, ne a ghẹ ya miẹn arhiọnkpa vbe uwu uwa ne ọ mwẹ ekhọe dan, kevbe ne ẹ i yayi, sẹrriọ, ne ọ gha na fi iyeke gbe Osanobua ne ọ rrọọ.

I Pita 1:18

Rhunmwuda wa rẹn osa ne a hae ya dẹ uwa hin obọ ẹre rre ighẹ uyinmwẹ ne ẹ i mwẹ ere, ne uwa miẹn vbe obọ avbe erha uwa odede. Ẹ i re avbe emi ne ọ fafaa, vbe ne avbe igoru vbe esiliva ye.

II Pita 3:17

Sokpan wa ne ọse mwẹ rẹn ena nẹ, rhunmwuda ọnii khekherriọ, wa khẹ yegbe, ne ibibiodẹ emwa ne ẹ i lele uhi ru emwi ghẹ ya de uwa odẹ, ne uwa ghẹ ya dele hin ihe uwa ni de ziẹn nẹ rre.

II Jọn 1:8

Wa ghi khẹ yegbe nian khekherriọ, ne uwa ghẹ ya mu emwi ne uwa winna yi nẹ fua, sokpan ne ere ne ọ rrọọ sẹ uwa obọ vbe ne ọ vuọẹn.