Kọlose 1:27 - Edo Bible (E Baibol Ẹdo) Version 1996

²⁷ Rhunmwuda nene emwamwa ọghe Osanobua ọre ọna khin. Ne ọ we oro ẹre rua ma emwa irẹn, oro emwi ighobioye kevbe uyi ne ọ viọ khẹ emwa rẹn hia. Nene oro ọna khin: Kristi rre uwu uwẹ, ọnii rhie maa wẹ, te a ghi ra ghae su uẹ egbe vbe uyi Osanobua.

Kọlose 1:27 ပူးပေါင်းရင်းမြစ်များ

Matiu 13:11

Jesu wanniẹn tama iran wẹẹ, “Wa na ọre a ta ẹmwẹ oro Arriọba Osanobua ma ighẹ ẹ i re iran ni.

Iyẹn ne ọ Maan Ọghe Luk 17:21

A i vbe tama ọmwa wẹ, ‘Do ghe ẹre vbe eran!’ ra ọ ‘Rre odọọ!’ Rhunmwuda Arriọba Osanobua rre uwu uwa.”

Iyẹn ne ọ Maan Ọghe Jọn 14:17

Agbọn i sẹtin rhan obọ miẹn ẹnrẹn rhunmwuda ighẹ agbọn i sẹtin dẹghe ẹre amawẹ, ọ gha rẹn ọnrẹn. Sokpan wa rẹn ọnrẹn, rhunmwuda, ọ gu uwa ọ vbe rre uwu uwa.

Iyẹn ne ọ Maan Ọghe Jọn 14:20

Ọ gha sẹ ẹdẹ ne ẹdẹrriọ, wa gha rẹn ighẹ mẹ rre uwu Erha mwẹ, kevbe wẹ wa vbe rre uwu imẹ zẹ vbene imẹ rre uwu uwa.

Iyẹn ne ọ Maan Ọghe Jọn 14:23

Jesu wanniẹn wẹẹ, “Ọmwa ne ọ rhirhi ho ẹmwẹ mwẹ gha ru vbene I khare, Erha mwẹ gha ho ẹmwẹ ọnrẹn, kevbe imẹ kevbe Erha mwẹ ghi bu ẹre gha dee, ma ghi do di owa ẹre ya.

Iyẹn ne ọ Maan Ọghe Jọn 17:26

I rhie ma iran nẹ, erriọ ọre I khian ye gha ru ẹe khian, ne ahoẹmwọmwa ne u mwẹ ghe mwẹ sẹtin sẹ iran egbe, ne imẹ sẹtin gha rre uwu iran.”

Iyẹn ne ọ Maan Ọghe Jọn 6:56

Ọmwa ne ọ rri efun egbe mwẹ, ọ na vbe wọn esagiẹn mwẹ, rre uwu imẹ, mẹ vbe rre uwu irẹn.

Ebe ne Pọl gbẹẹn gie emwa Rom 11:33

U miẹn vbe ẹfe Osanobua bun hẹẹ! U miẹn vbene ẹwaẹn kevbe irẹnmwi ọnrẹn dinmwi hẹẹ! De ọmwa nọ gha sẹtin rhan otọ vbene ọ ta ẹmwẹ yi hẹẹ? Gha ọ rẹn vbene ọ ru emwi hẹẹ.

Ebe ne Pọl gbẹẹn gie emwa Rom 2:4

Ra te uwẹ miẹn ọẹn fo ighẹ itohan rẹn nọkhua kevbe ifuẹko kevbe i ziengbe ẹre? Wẹ ma rẹn ighẹ te Osanobua ziengbe ne ọ rhie ẹghẹ nuẹn ne u ya fiwerriẹ?

Ebe ne Pọl gbẹẹn gie emwa Rom 5:2

Rẹn keghi ye iyayi viọ ima gha die uwu ẹse ọhẹ Osanobua, ehe ne ima ghi mudia yi na. Rhunmwuda ọnii nian, te ima ghi ghọghọ vbe idanwehọ wẹ ma gha ghae vbe uwu uyi ọghe Osanobua.

Ebe ne Pọl gbẹẹn gie emwa Rom 8:10

A deghẹ Kristi rre uwu uwẹ, a gha rhe miẹn wẹ ikinnegbe ruẹ wu rhunmwuda orukhọ, sokpan, Orhiọn kegha re arrọọ nuẹn rhunmwuda a dọlọ uwẹ kugbe ba Osanobua nẹ.

Ebe ne Pọl gbẹẹn gie emwa Rom 9:23

Ọ keghi vbe gha ho ne ọ rhie ẹre ne a miẹn ighẹ ukpọlọmwẹ uyi ẹre ne ọ tue yan ima ne ọ wẹ ne irẹn tohan rẹn, ma ne ọ hannọ ye otọ nẹ ne uyi ẹre sẹ ima obọ.

I Kọrinti 3:16

Vbe ne ẹmwata, wa rẹnrẹn ighẹ, Ọgua Osa ọre uwa khin, kevbe wẹ, Orhiọn Osanobua di uwu uwa ya.

II Kọrinti 2:14

Sokpan, ekpọnmwẹ nọ ne Osanobua, rhunmwuda, vbe a kugbe ba Kristi, Osanobua ghi gha viọ ima khian zẹ vbe oghunmwu vbe uwu emwa ne Kristi viọ rre vbe okuo ne ọ na khọn miotọ. Zẹ vbe ori ne ọ winhin ne ọ gba ehe hia, Osanobua lo ima ya ye Kristi khian ne emwa hia rẹnrẹn.

II Kọrinti 4:17

Ọlọghọmwa kherhe ne ọ rhie gberra khian ne ima ye na, gha rhie uyi nọkhua ọghe etẹbitẹ ne ọ kpọlọ sẹ ọlọghọmwa na ẹsẹse gie ima.

II Kọrinti 4:6

Osanobua ne ọ kha re wẹẹ, “Uwanmwẹ gha wan ke uwu ebiebi ladian,” ọre ọ vbe wan uwanmwẹ ọnrẹn ye ima ekhọe, ne ọ rhie uwanmwẹ ọghe a rẹn uyi Osanobua ne ima, zẹ vbe ne ọ wan ladian vbe ugbaro Kristi.

II Kọrinti 6:16

Vbe Ọgua Osa kevbe amazẹ ọghe iran nigẹbọ ra ya gue obọ egbe hẹ yi? Rhunmwuda Ọgua osa ọghe Osanobua nọ rrọọ, ọre ima khin. Zẹ vbe ne Osanobua tobo ẹre kha re: “I gha bọ owa mwẹ ye ehe ne iran ye. I ghi yin ehe ne iran ye. Mẹ ghi gha re Osanobua iran, iran ghi gha re emwa mwẹ.”

Galatia 2:20

Ọre a ghi na miẹn nian wẹ, ẹ i re imẹ ọre ọ ghi rre agbọn ọvbehe, sokpan Kristi ọre ọ rre agbọn vbe uwu imẹ vbene I ghi ya rre agbọn na nian, iyayi ọre I ghi ya rrọọ vbe uwu ovbi Osanobua, ọmwa ne ọ ho ẹmwẹ mwẹ, ọ na rhie ẹdẹ agbọn rẹn mẹ.

Galatia 4:19

Ivbi mwẹ ni ghan! Te emwi ubiẹmwẹ uwa ghi vbe ru mwẹ zẹ vbe okhuo ne ọ ra biẹ, rhinrin a te do miẹn wẹ ama emwi ne Kristi khin rhie egbe maa vbe uwu uwa.

Ẹfisọs 1:7

Rhunmwuda, vbe ekpa uwu Jesu Kristi, a keghi fannọ ima ye otọ, ọnii nọ wẹ a keghi vbe ya avbe orukhọ mwa bọ mwa. U miẹn vbe ẹsọhẹ, Osanobua kpọlọ hẹ,

Ẹfisọs 2:22

Vbene a na ku egbe kugbe ba irẹn, wa tobọ uwa vbe khian ne a ghi bọ deba iran nekpa hia nian, ne ọ do khian owa ne Osanobua gha la ekpa Orhiọn irẹn gha dia.

Filipai 4:19

Debare, Osanobua mwẹ ne ẹfe ẹre kpọkua vbe uwu Kristi Jesu, gha kpe emehe emwi ne uwa i mwẹ hia.

Kọlose 1:5

Ẹghẹ ne ikporhu ẹmwata nii, ighẹ Iyẹn Ne ọ maa na ka sẹ ehe ne uwa ye, wa keghi họn vbene ọ rhie idaehọ ne ọmwa hẹ. Rhunmwuda ọnii, iyayi kevbe aho ẹmwẹ ọmwa keghi re ne ọ hẹnhẹn egbe yan emwi ne uwa danmwehọ ẹre, emwi ne a dọlọ yi ye otọ khẹ uwa vbe ẹrinmwi.

Kọlose 2:3

Rẹn ọrọre isahẹn ne ọ sẹtin kie aza emwi ighobioye ne a viọ lẹre hia, ọghe irẹnmwi kevbe ẹwaẹn Osanobua.

Kọlose 3:11

Rhunmwuda ọnọna nian, ọmwa ne ẹ i re Ju ra ọmwa ne ọ re Ju i ghi rrọọ, ne ọ rhuẹre ra ne ọ ma rhuẹ, ighọnmighọn, edigue aranmwẹ oha, eviẹn ra iran ni yan egbe iran ẹ i ghi rrọọ, sokpan Kristi ọrọre ehia, Kristi rre uwu iran hia!

I Timoti 1:1

E Pọl ọmwa ne ọre ukọ Kristi Jesu, la ekpa iyi Osanobua ne Ọmiọnmwafan mwa, kevbe Kristi Jesu ne ọre idaehọ mwa, ọre ọ gbẹn ebe na.

Hibru 6:19

Ma keghi mwẹ idaehọ na, zẹ vbe okpo ne ọ da owa yi ọghe ekhọe mwa, ẹbe i rrọọ, te ọ vbe deziẹn gbain, ọ kevbe la ukpọn ne a ya fian ọgua Osa gberra gha, rrie ehe ne Ogiukpo nọkhua ye.

I Jọn 4:4

Sokpan, wa ne ivbi mwẹ, ọ ghe Osanobua ọre uwa khin, wa vbe munọ avbe akhasẹ ohoghe gbe otọ nẹ, rhunmwuda Orhiọn ne ọ rre uwu uwa wo vbe egbe sẹ orhiọn ne ọ rre uwu iran ni re ọ ghe agbọn na.

Arhie Maan 3:20

Dọ re! I mudia ye onurho gha so obọ, a deghẹ ọmwaikọmwa ghi họn, ọ na kie ẹre mẹ, I gha bu ẹre la owa, I ghi gu ẹe rri evbare, rẹn ghi vbe gun mwẹ rri evbare.