Jọsua 6:4 - Edo Bible (E Baibol Ẹdo) Version 1996

⁴ Avbe ohẹn ihinrọn ne ọkpọkpa vbọ mu orhu mwẹ obọ, ghi ke odaro ne Ẹkpẹti Ile ọghe Nọyaẹnmwa. Vbe ikpẹdẹ ne ogihinrọn ke uwa kevbe ivbiyokuo ruẹ ghi khian lẹga ẹvbo nii igba ihinrọn, avbe ohẹn ghi gha si orhu nii khian.

Jọsua 6:4 ပူးပေါင်းရင်းမြစ်များ

Gẹnẹsis 2:3

Rẹn keghi fiangbe ikpẹdẹ ne ogihinrọn, ọ keghi zọe ye otọ zẹ vbe ẹdẹ kpataki, rhunmwuda ẹdẹ nẹdẹrriọ ọre ọ winna iwinna emwi ne ọ yi fo, ọ na dobọ iwinna yi.

I Ọba 18:43

Ọ keghi tama ọguọmwadia ẹre wẹẹ, “Ya ghe odẹ okun ghe.” Ọguọmwadia werriegbe rre, ọ keghi kha wẹẹ, “I ma bẹghe emwi rhọkpa.” Igba ihinrọn ọre Elaija gie ẹe ne ọ ya ghe ẹre.

II Ọba 5:10

Elaisia keghi gie ọguọmwadia ya tama rẹn wẹ ne ọ ya khuẹ igba ihinrọn vbe ẹzẹ e Jọdan, a gha vbe gbe emianmwẹ ne ọ rre ọre egbe fo fẹẹrẹ.

II Ọba 5:14

Ẹre Naaman na gha rrie Jọdan, ọ na dinmwi ye uwu ẹre igba ihinrọn vbene Elaisia wẹ ne ọ ru ẹe, egbe keghi wa rran rẹn giẹnrẹn. Efun egbe ẹre keghi deziẹn, emianmwẹ i ghi rrọọ, ọ kegha ye zẹ vbe ne ọghe ọmobọ ye.

II Krọnikol 13:12

Osanobua tobọ ẹre ọrọre ọkaolotu mwa, avbe ohẹn irẹn rre emwa na, iran viọ okpe mwẹ iran wa mu egbe ne iran kpe ẹre vbe ẹghẹ ne ọ rhirhi gha khin ne iran ya tie ima gha die okuo ne a ra gu uwa khọn. Izrẹl, wa ghẹ gu e Nọyaẹnmwa ne Osanobua avbe erha uwa odede gbinna. Obọ uwa i sẹtin ke okhunmwu.”

II Krọnikol 20:17

Ẹ i re uwa ọ re, ọ ra khọn okuọ na. Ma rhie ihẹ uwa ne uwa mudia, wa gha miẹn vbe Nọyaẹnmwa ra rhie akhọnmiotọ ne uwa. Ivbi e Juda kevbe Jerusalẹm, wa ghẹ si uhe ra ne afianma vbe fian uwa, wa ladian gha rrie okuọ, e Nọyaẹnmwa gha rrọọ yaba uwa!”

II Krọnikol 20:19

Ivbi uniẹn avbe Livai ọghe Kohat kevbe Kora, keghi kpaegbe, iran na ya urhu ne ọ la ẹsẹse rho e Nọyaẹnmwa ne Osanobua ọghe Izrẹl.

II Krọnikol 20:21

Ọ ghi gu avbe emwa nii zẹ iro nẹ, ọba keghi khama avbe ikpemaba wẹ ne iran viọ ẹwu ne iran ya do ugie yọ, ne iran khian ke odaro ne avbe ivbiyokuo, ne iran gha so ihuan na wẹẹ, “Wa rho e Nọyaẹnmwa. Etẹbitẹ ọre Itohan rẹn khin.”

Job 42:8

Banbanna nian, mu ẹmila ihinrọn kevbe ogho ihinrọn giẹ Job, ne uwe ẹre ya ẹe zọ ese ne egbe uwa. E Job gha na erhunmwu ne uwa, I gha vbe họn urhu ẹre, I i ghi ra vbe ru uwa vbene ọ te ma uwa. Wa ma ta ẹmwẹ ẹmwata vbe ekpa mwẹ zẹ vbene irẹn ru.”

Aizaia 27:13

Ọ gha sẹ ẹdẹ ne ẹdẹrriọ, a gha kpe okpe ne a ya tie ivbi Izrẹl hia ni rre iwe vbe Asiria kevbe Igipt gha die owa. Iran gha rre do ga e Nọyaẹnmwa vbe Jerusalẹm, vbe oke ẹre nọhuanrẹn.

Levitikọs 14:16

Ọ ghi fi ikpinhianbọ obọ erha ọmwa ọghọe yọ, ọ ghi sanmwẹ eso vbọ ye evba igba ihinrọn vbe sirra e Nọyaẹnmwa.

Levitikọs 4:6

“Ọ ghi fi ikpinhianbọ ẹre yọ igba ihinrọn, ọ ghi sanmwẹ ọẹn ye odaro ukpọn onurho ne ọ huansẹ nii.

Zẹkaraia 4:2

Rẹn keghi nọ mwẹ wẹẹ, “De emwi ne u bẹghe yi?” Mẹ keghi wanniẹn wẹẹ, “Erhan ne a mu ukpa yan ne a ye igoru ru. Ọkpan ne a sa ofigbọn yi rre odukhunmwu ẹnrẹn. Ukpa ihinrọn rre uhunmwu ọmukpa na, ukpa ọkpọkpa mwẹ uvun ihinrọn ne a rhie oru la.

Zẹkaraia 4:6

Odibosa nii keghi tama mwẹ ne I ta uhunmwu ne Nọyaẹnmwa gie gie Zerubabẹl na ma rẹn wẹẹ, “U gha khọnmiotọ, sokpan, ẹ i re vbe ekpa ẹtin ivbiyokuo ra ẹtin ọghe obọ ruẹ sokpan, orhiọn mwẹ.

Nọmbas 23:1

Ọ keghi khama e Balak wẹẹ, “Gba aka ihinrọn ye emwa mẹ ne u viọ ẹkhuia ẹmila ihinrọn kevbe ogho ihinrọn rre.”

Jọsua 6:3

Ke uwẹ kevbe ivbiyokuo ruẹ, wa ya ikpẹdẹ ehan khian lẹga e Jẹriko uhukpa vbe ẹdẹ.

Jọsua 6:5

“Ẹghẹ nii, iran ghi si ẹe uhukpa ne ọ kpẹe vbe otọ. Wa gha wa họn ọnii, emwa nii hia ghi wa davan, ekẹn ne a gbe lẹga ẹvbo nii gha wa de wiẹghẹ ye otọ. Dọmwadẹ ọghọe ghi wa khian ghe odaro la ore ẹvbo nii.”

Arhie Maan 1:20

Ọnọna ọrọre oro emwi ne a yae kha ighẹ orhọnmwẹ ihinrọn, ne u bẹghe vbe obọ erha ọmwa mwẹ, ke ẹe kevbe avbe erhan ọmukpa igoru ihinrọn nii, avbe orhọnmwẹ ihinrọn ni, ọrọre avbe odibosa avbe esọsi ihinrọn nii, avbe erhan ọmukpa ọrọre avbe esọsi ihinrọn nii.

Arhie Maan 1:4

E Jọn ọre ọ gie uhunmwu na gie avbe esọsi ihinrọn ni rre otọ Esia. Ẹsọhẹ kevbe ọfumwegbe ọrọre ọghe uwa ke ehe ne Osanobua ye gha dee, Ọmwa ne ọ rrọọ banbanna, ọmwa ne ọ ka gha rrọọ yi ke ne ọ khian vbe gha rrọọ, kevbe ke ehe ne avbe orhiọn ihinrọn ni rre odaro ẹkete ẹre ye ghe dee.

Arhie Maan 10:3

Ọ keghi ya urhu ne ọ la davan, ọ ye vbe urhu oduma ne ọ vanhiẹn. Ugbẹn vbe irẹn ghi davan nẹ, avbe avan nukhunmwu ihinrọn ni, keghi khuarha kegbe ya wanniẹn ọre ẹmwẹ werriegbe.

Arhie Maan 15:1

Iyeke ọnii, I keghi do bẹghe ama ọvbehe nọkhua kevbe ne ọ mu ọmwa ohan vbe ẹrinmwi, avbe odibosa ihinrọn ne egboghogbogho ihinrọn guẹ, ena ọrọre egboghogbogho ne okiekie, rhunmwuda iran ọrọre enokiekie vbe avbe odẹ ne Osanobua ya rhie izohu ẹre maa.

Arhie Maan 15:7

Ẹghẹ nii, ọkpa vbe uwu avbe emwi ne a yi ni ma wu nii, keghi viọ ọkpan igoru ihinrọn ne ọ vuọn ne izohu Osanobua ne ọ rrọọ ẹdẹdẹmwẹdẹ, ne avbe odibosa nii.

Arhie Maan 16:1

I keghi họn vbe ọmwa ọkpa wa vannọ okan ke uwu Ọgua Osa gu avbe odibosa ihinrọn nii guan wẹẹ, “Wa ya rhurhẹ ọkpa ihinrọn ọghe izohu Osanobua nii yan agbọn!”

Arhie Maan 5:1

I keghi bẹghe ebe ne a kiri ọkpa vbe obọ erha ọmwa ọmwa ne ọ tota ye uhunmwu ẹkete, a keghi wa gbẹnnẹ emwi vuọn rẹn obọ eva, a keghi ye emwi gba ẹe kugbe vbe ihe ihinrọn.

Arhie Maan 5:6

I keghi bẹghe Oteghe Ohuan ọkpa, ọ mudia ye adesẹneva ọghe ẹkete, emwi ne a yi ni ma he wu enẹ nii, kevbe avbe ediọn, keghi lẹga ẹre. Oteghe Ohuan nii keghi ye vbe ne a miẹn wẹ a gbe ẹe ua nẹ. Ọ kegha mwẹ igho ihinrọn kevbe aro ihinrọn, ena kegha re orhiọn ihinrọn ọghe Osanobua, ne a gie nẹ, gha rrie otọ agbọn hia.

Arhie Maan 8:2

I keghi dẹghe avbe odibosa ihinrọn ni mudia vbe odaro Osanobua, a keghi viọ okpe ihinrọn ne iran.

Arhie Maan 8:6

Ẹghẹ ni ọre avbe odibosa ni viọ okpe ihinrọn ni mwẹ ghi na mu egbe ne iran kpe ẹre.