Jọsua 4:12 - Edo Bible (E Baibol Ẹdo) Version 1996

¹² Emwa ẹwae Riubẹn kevbe Gad kevbe a gha wa ẹwae Manasẹ ye ihe eva, keghi mu egbe ne a gha ya khọn okuo zẹ vbene Mosis tama iran.

Jọsua 4:12 ပူးပေါင်းရင်းမြစ်များ

Ẹksọdọs 13:18

Ye ihe ọnii, ọ ke rhie iran la odẹ ikhinkhian la odẹ ato ne ọ rre odẹ Okun Nọbaa. Ivbi Izrẹl keghi wa gbalọ egbe okuo ọhanabe.

Nọmbas 32:17

Ẹghẹ nii, ma gha mu egbe ne ima lele ivbi Izrẹl ne iho mwa gha rrie okuo, ma ghi vbe ke odaro vbe okuo nii a te do miẹn wẹ ma viọ iran sẹ otọe nii ne ọ gha re ọghe iran. Vbe ọghe banbanna, ibiẹka ima sẹtin gha rre ẹvbo ne a gbe ekẹn ga na, ehe ne obọ emwa ẹvbo na i ra na vba iran.

Diuteronomi 3:18

“Ẹghẹ ni ọ re I na vbe rhie igiodẹ na ne iran wẹẹ: ‘E Nọyaẹnmwa Osanobua mwa ọ re ọ mu otọe nii ne uwa vbe ahọ Jọdan ne uwa yin ẹnrẹn. Banbanna nian, wa gbalọ ivbi iyokuo uwa egbe okuo, ne uwa gie iran fian Jọdan rra ke odaro ẹwae ivbi Izrẹl nekpa ne iran ya yi iran obọ ya gbe ẹkun sẹ otọ yin otọe iran.

Diuteronomi 33:21

Iran keghi mu ehe ne ọ maa sẹẹ vbe otọe nii ne egbe iran, a na ghae oghae ọkaolotu ne iran. Iran ya uhi kevbe ilele Osanobua ru emwi vbe avbe ọkaolotu Izrẹl si koko.”

Jọsua 1:14

Avbe amwẹ uwa kevbe ivbi uwa kevbe ẹmila uwa gha mudia vbe otọe nii ne Mosis mu ne uwa, sokpan, avbe ivbi iyokuo ni rre uwu uwa gha gberra ne iran ke odaro ivbi Izrẹl ne ihua uwa iran ghi mu egbe ne iran ya ye iran obọ vbe okuo.

Jọsua 4:11

Ugbẹn vbe iran ghi fian ẹẹn rra nẹ, Ẹkpẹti Ile Nọyaẹnmwa kevbe avbe ohẹn keghi ke odaro ne emwa nii.

Jọsua 4:13

Vbene e Nọyaẹnmwa na gha ghe iran, arhunmwu arriaisẹn iyeva (40,000) ni mu egbe okuo, keghi fian ẹẹn gberra la otọe ne ọ rriẹe vbe ọkpẹn Jẹriko.