Jọsua 3:14 - Edo Bible (E Baibol Ẹdo) Version 1996

^14-15 Ẹghẹ emwiorhọ ọ re ghaa nọ, ẹzẹ ke wa ro, emwa nii keghi si kpao vbe agọ ne iran ya fian Jọdan rra. Avbe ohẹn keghi mu Ẹkpẹti Ile, iran na ke odaro. Iran ghi sẹ ọkpẹn Jọdan iran na viọ owẹ ye uwu ẹzẹ.

Jọsua 3:14 ပူးပေါင်းရင်းမြစ်များ

Psalm 132:8

Gha die Ọgua Osa Nọyaẹnmwa, yaba nene Ẹkpẹti Ile gha dee, ne ọ re ama ọghe ẹtin ruẹn ne u do gha rre emwa na ẹdẹdẹmwẹdẹ.

Jerimaia 3:16

Ẹghẹ nii, wa ghẹ ghi do gha bun nẹ vbe otọe nii, ẹghẹ nii, emwa i ghi ra, ye gha guan kan ẹmwẹ Ẹkpẹti Ile mwẹ. Iran i ghi ra ye gha mu ẹmwẹ ọnrẹn ro ra ne a ye ye ẹre rre. Iran i ghi ra vbe gha mwẹ emwi ne iran yae ru, ama ghi wẹ ne iran ye vbe kan ọvbehe.

Diuteronomi 31:26

“Wa rhie ebe uhi Osanobua na, ne uwa rhie ẹre ye ọkpẹn Ẹkpẹti Ile ọghe Nọyaẹnmwa Osanobua uwa, ne ọ sẹtin gha rre evba zẹ vbe osẹe ghe emwa ẹnrẹn.

Hibru 9:4

Uwu emwa ọre Ogiukpo ọghe igoru ne a na giẹn eturari, ke ẹe kevbe ẹkpẹti kevbe ne a ya igoru rhu. Emwi ni rre uwu ẹkpẹti na kegha re ovbi uru igoru ne a viọ e mana yi, ọkpọ erhan Errọn ne ọ gbe ukhu, kevbe uhanhan okuta eva ne agbẹnnẹ ẹmwẹ ile nii yi.

Jọsua 24:11

Wa keghi fian Jọdan rra gha die Jẹriko. Ivbi e Jẹriko kegha gu uwa gbinna vbene emwa Amọri, Pẹriz, Hiti, Gẹgas, Hivi kevbe Jebus vbe ru. I keghi rhie akhọnmiotọ ne uwa vbe uhunmwu iran.

Jọsua 3:3

Iran keghi tama emwa nii wẹẹ, “Wa gha bẹghe avbe ohẹn vbe iran a mu Ẹkpẹti Ile ọghe Nọyaẹnmwa Osanobua rua, wa rhọ emwi ne uwa lele iran.

Jọsua 3:6

Ẹre Jọsua na tama avbe ohẹn wẹẹ ne iran tọn Ẹkpẹti Ile nii mu ne iran ke odaro ne avbe emwa nii. Iran keghi ru vbene ọ khare.

Jọsua 6:6

Ẹre Jọsua na tie avbe ohẹn, ọ keghi tama iran wẹẹ, “Wa mu Ẹkpẹti Ile nii, wa ihinrọn ke odaro ne ẹẹn wa ghi viọ orhu mwẹ. Avbe ivbiyokuo ghi ke odaro ne uwa.”