Jọsua 24:20 - Edo Bible (E Baibol Ẹdo) Version 1996

²⁰ Deghẹ wa fi iyeke gbe e Nọyaẹnmwa, wa na ya gha gho avbe ẹbọ ọvbehe, ọ gha mu aro da uwa, ọ ghi rri uwa oya. ọ gha fuẹn uwa a, a gha rhe miẹn wẹ ọ ka gha maa ne uwa de yi.”

Jọsua 24:20 ပူးပေါင်းရင်းမြစ်များ

I Krọnikol 28:8

“Rhunmwuda ọnii nian wa ne emwa mwẹ, vbe odaro Osanobua mwa kevbe asi koko ọghe ivbi Izrẹl hia na, I yan tae ma uwa nian ne uwa gha rhie owẹ lele emwi hia ne Nọyaẹnmwa ne Osanobua mwa yi ẹre iyi ne ima, ne otọe ne ọ maa na miẹn ehe na gha re ọghe uwa khian, ne uwa vbe fiẹe ye orre ni gha rri ukhu uwa otọ rhinrin ẹdẹ.”

I Krọnikol 28:9

Rẹn keghi tama Solomọn wẹẹ, “Ovbi mwẹ, I yan tama ruẹn nian ne u rhan obọ miẹn Osanobua erha a, ne u gha ya ekhọe ẹmwata ga ẹe kevbe orhiọn ne ọ ho. Ọ rẹn iziro ekhọe mwa kevbe emwi ne ima gualọ. A dẹghe u bu ẹre gha khian, ọ gha miẹn ruẹn yi, sokpan a dẹghe u fi iyeke gbẹe, ọ gha suẹ rae rhinrin ẹdẹ.

II Krọnikol 15:2

Ọ na bu Asa ne ọba gha khian. Ọ keghi datie ẹre wẹẹ, “Asa ne ọba, kevbe avbe uwa hia ni rre Juda kevbe Bẹnjamin, wa danmwehọ mwẹ. Ẹghẹ hia ne uwa mudia ke Nọyaẹnmwa la, e Nọyaẹnmwa gha vbe mudia ke uwa, a dẹghe wa gualọ ẹe, ọ gha ya egbe ne uwa miẹn, sokpan, dẹghe wa werriegbe, rẹn gha vbe he uwa ye otọ.

Ẹzra 8:22

Ekhue ma gunmwẹ nọ ọgbaisi wẹ ne ọ viọ ivbiyokuo ne ima ne iran gha su ima khian, rhunmwuda mẹ tama rẹn nẹ wẹ te Osanobua fiangbe, emwa hia ni mu ẹtin yan rẹn, sokpan, ọ ghi gha mu ohu emwa hia ni fi iyeke gbe ẹe, ọ ghi gha rri iran oya.

Psalm 89:31

a deghẹ iran fi iyeke gbe ẹmwẹ ne I tae, ighe iran ma rhie iyi mwẹ mwẹ,

Aizaia 1:28

Sokpan, emwa hia ni ru orukhọ, iran na vbe sọtẹ ghe ẹre, ọ gha dunmwu iran an, ọ gha gbele iran hia a ighe avbe emwa ni hee ẹe yotọ.

Aizaia 63:10

sokpan, iran keghi sẹmwẹ ọnrẹn, iran keghi gha rhia ẹre ẹko rua. Rhunmwuda ọnii, e Nọyaẹnmwa keghi khian oghian iran, Ọ keghi gu iran gbinna.

Jerimaia 17:13

E Nọyaẹnmwa, wẹ ọrọre idaehọ Izrẹl, ekhue gha mu iran hia ni he uwẹ yotọ a gha ho iran bẹkun zẹvbe eni ne a gbẹnnẹ ye ekhae rhunmwuda, iran hee uwẹ ne Nọyaẹnmwa yotọ nẹ, wẹ ne uhunmwu ẹzẹ amẹ ne ọ furre.

Ezikiẹl 18:24

“Sokpan, a deghẹ ọmwa esi dobọ emwi esi ne ọ ru yi, ọ na suẹn ya gha ru emwi osọnnọ dan ne avbe emwa dan ru, ọ gha miẹn uhunmwu ra? Hiehiere! A i ghi ye avbe emwi esi ne ọ te ka ru rhọkpa rre. Ọ gha wu ye a i ta ẹmwata kevbe orukhọ ẹre.

Iwinna 7:42

Sokpan Osanobua fi iyeke gbe iran, ọ keghi gie iran gha gho avbe orhọnmwẹ ni rre aro iso, zẹ vbene agbẹn ọẹn ye ebe avbe akhasẹ: “ ‘Wa ne ivbi Izrẹl, ẹ i re imẹ wa gbele aranmwẹ ya zọ ese na, la ukpo iyeva vbe uwu ato.

Diuteronomi 4:25

“A gha miẹn ighẹ ọ kpẹre ne uwa ghi sẹ otọ nii, ighẹ wa ghi na biẹlẹ emọ iwu ke eyẹ, wa ghẹ ya ma amazẹ emwikemwi hiehiere ne uwa ghẹ ya rukhọ. Emwi dan ọna khin vbe aro e Nọyaẹnmwa, ọ gha ya ẹe mu ohu.

Diuteronomi 4:26

Wa gha ru emwi na, I tie ẹrinmwi kevbe agbọn vbe osẹe ẹre na, wẹ wa gha rherhe gbẹro vbe otọ na. Wa i khian tọ vbe otọe ne ọ rre vbe a gha fian Jọdan rra ne uwa ra ya yin na. Te a ra wa fuẹn uwa fo fẹẹrẹ.

Hibru 10:38

Sokpan emwa ẹmwata mwẹ gha yayi, iran gha vbe fe. sokpan deghẹ ọmwaikọmwa vbe uwu iran werriegbe, ẹko mwẹ i ra rhiẹnrhiẹn ghe ẹre.”

Jọsua 24:21

Emwa nii keghi tama e Jọsua wẹẹ, “Ẹn o, e Nọyaẹnmwa ọ re ima gha ga.”

I Samuẹl 12:15

A i gha miẹn ighẹ wa ma họn ẹmwẹ e Nọyaẹnmwa, wa na gha rra uhi ẹre, ọ gha mu aro nọkhọ da uwa kevbe ọba uwa.

I Samuẹl 12:25

Sokpan deghẹ te uwa ghi ye gha ru orukhọ khian, a gha fuẹn uwa kevbe ọba uwa aa.”