Jọsua 23:1 - Edo Bible (E Baibol Ẹdo) Version 1996

¹ Ọ ghi kpẹe fua, vbe Nọyaẹnmwa ghi rhie ọfumwegbe ne ivbi Izrẹl nẹ vbe obọ avbe eghian iran ni lẹga iran, e Jọsua vbe khian ọ maẹn ghẹghẹghẹ.

Jọsua 23:1 ပူးပေါင်းရင်းမြစ်များ

I Ọba 1:1

Te Devid ne ọba ghi khian ọmaẹn ẹsẹse, egbe ẹre i ghi sẹtin mwẹ ọghae, a gha rhe wẹ te a ya ye ukpọn ni mwẹ imi hin ẹnrẹn egbe.

I Krọnikol 23:25

E Devid keghi kha wẹẹ, “E Nọyaẹnmwa ne Osanobua Izrẹl rhie ọfumwegbe ne emwa rẹn nẹ, rẹn tobọ ẹre gha vbe gha rre Jerusalẹm rhinrin ẹdẹ.

I Krọnikol 27:1

Eni avbe ekaolotu Izrẹl ọ re ena khin zẹ vbe ọghe ẹgbẹe kevbe uniẹn kevbe emwa ni rre asẹ ni gha ye iwinna arriọba khian. Uki ọkpa ọ re a ya zẹ oka ughughan ne arhin arriaisẹn enẹyan ugie (24,000) ye ne iran gha winna vbe ototọ enọkhaemwisẹ vbe uki nii.

II Krọnikol 14:1

Abija ne Ọba keghi wu, a na re ẹre ye idin avbe ọba vbe Ẹvbo e Devid. Asa ne ovbi ẹre keghi rriọba lele ẹe, vbe ẹghẹ ne Asa na gha rre ẹkete, ọfumwegbe kegha rre ẹvbo nii la ukpo igbe.

II Krọnikol 14:5

Rhunmwuda ne ọ na wabọ avbe aro ẹbọ hiaa, kevbe aka ne a na giẹn eturari vbe otọ e Juda hia, ọfumwegbe kegha rre otọe nii vbe ẹghẹ ne ọ ya ẹe vbe ẹkete.

II Krọnikol 20:30

Ẹre Jehosiafat na gha re ọba vbe ọfumwegbe, Osanobua keghi gie ẹkun sẹ ọ re otọ vbe odẹ hia.

Psalm 46:9

Ọ dobọ okuo yi vbe uhunmwu otọ agbọn hia ọ bunnọ avbe uhanbọ ọ vbiolo avbe asoro ọ keghi vbe giẹn avbe asa a vbe erhẹn.

Aizaia 63:14

Zẹ vbene a viọ ẹmila gha rrie iya ne emwi na maa, erriọ ọ re Nọyaẹnmwa rhie ikẹtin ne emwa rẹn. Ọ su emwa rẹn ọ keghi rhie uyi gie egbe ẹre.

Diuteronomi 31:2

Ọ wẹẹ, “Ukpo iyehan ọ re i ghi ye na, mẹ i ghi ra sẹtin gha re olotu uwa ọvbehe. Ye vbe sẹ ọnii, e Nọyaẹnmwa tama mwẹ ne wẹ mẹ i ra fian Ẹzẹ Jọdan rra.

Jọsua 11:23

E Jọsua keghi khọn otọe ni hia fẹẹrẹ zẹ vbene Nọyaẹnmwa tama e Mosis. Ọ keghi muẹn ne ivbi Izrẹl ne ọ gha re ọghe iran, a na do gha ẹre ako ako, ọkpọkpa ne ẹwae ọkpọkpa. Ẹre emwa nii na ghi hẹwẹ vbe okuo.

Jọsua 13:1

E Jọsua keghi wa khian ọmaẹn ẹsẹse, e Nọyaẹnmwa keghi tama rẹn wẹẹ, “U khian ọmaẹn nẹ ẹsẹse, sokpan avbe ẹvbo ne a ra ye khọn wa ye bun.

Jọsua 21:44

E Nọyaẹnmwa keghi rhie ọfumwegbe ne iran vbe igie enenẹ zẹ vbe ne ọ yan ma avbe erha iran odede. A ma miẹn ọkpa vbe uwu avbe eghian iran hia ne ọ sẹtin da iran obọ yi, rhunmwuda, e Nọyaẹnmwa keghi gie ivbi Izrẹl khọnmiotọ vbe uhunmwu avbe eghian iran hia.

Jọsua 22:4

Banbanna nian, e Nọyaẹnmwa Osanobua rua rhie ọfumwegbe ne ivbi Izrẹl ne ihua uwa nẹ zẹ vbene ọ khare. Rhunmwuda ọnii, wa werriegbe gha rrie otọe uwa ne uwa mu ya khian ọwua, otọe ne ọ rre odẹ ahọ e Jọdan, ne Mosis ne ọguọmwadia e Nọyaẹnmwa mu ne uwa.

I Samuẹl 12:2

Banbanna nian, rẹn rre emwa ne ọ gha viọ uwa khian. Mẹ nian, I khian ọmaẹn nẹ, I vbe fu edẹ. Ivbi mwẹ vbe gu uwa rrọ. Mẹ ọ re ọ gha re ọkaolotu uwa ke ẹghẹ ọvbokhan kpao do sẹ wanwan na.