Jọsua 22:6 - Edo Bible (E Baibol Ẹdo) Version 1996

^6-8 E Jọsua ghi ya erhunmwu zẹ iran na urrie nẹ, ọ keghi tama iran wẹẹ, “Ke uwa kevbe ẹfe ni bun ọre ọ ghi gba rrie owa na, ẹmila ọrhẹnrhẹn, esiliva, igoru, oze, ematọn kevbe ukpọn ni bun. Wa ghae ne ivbi Izrẹl ne ihua uwa vbe avbe emwi ne uwa miẹn avbe eghian uwa ẹre.” Iran keghi kpao gha rrie. E Mosis mu otọe eso vbe odẹ ahọ ne ẹwae Manasẹ nẹ vbe odẹ ahọ e Jọdan sokpan e Jọsua keghi mu otọ ne obọ nọkpa vbe orrie ọghe Jọdan deba ẹwae nekpa.

Jọsua 22:6 ပူးပေါင်းရင်းမြစ်များ

Gẹnẹsis 14:19

ọ keghi fiangbẹe vbe nian wẹẹ, “Te Osanobua Nọyosẹ, ne ọ yii ẹrinmwi kevbe agbọn, gha fiangbe Ebram!

Gẹnẹsis 47:10

E Jekọb keghi na erhunmwu ọ khian ẹdẹ hia ne Fero, ọ na kpao.

Gẹnẹsis 47:7

Ẹre Josẹf na rhie Jekọb ne erha ẹe do ma ọba, e Jekọb keghi fiangbe ọba.

II Samuẹl 6:18

Ọ ghi zọ ese fo nẹ ọ keghi ya eni e Nọyaẹnmwa ne Oghodua fiangbe emwa nii.

II Samuẹl 6:19

Ọ keghi mu ebrẹd ọkpọkpa ne dọmwadẹ ikpia kevbe ikhuo ni rre Izrẹl kevbe emiowo ne aranmwẹn deba ọmọ erhan eso ne a re. Ẹre dọmwadẹ ọghọe na gha rrie owa.

II Samuẹl 6:20

E Devid keghi dọlegbe gha rrie owa ya tuẹ emwa rẹn. E Mikal ne ovbi e Sọl nokhuo keghi ya khian vba ẹre, ọ tama rẹn wẹẹ, “Ọba Izrẹl wa vbe mu eni ne ọ hin usi ne egbe ẹre ẹrẹna. Ọ na wa bannọ egbe ua ye otọ zẹ vbe ọzuọ vbe odaro eguọmwadia ni ikhuo ọghe avbe emwa ni rre asẹ vbe ototọ ẹre.”

I Ọba 8:66

Vbe ikpẹdẹ ne ogierẹnrẹn, e Solomọn keghi zẹ. emwa ni hia urrie, iran hia keghi tian rẹn, iran kegha rrie owa vbe ne ọyẹnmwẹ na sẹ iran ye emwi esi hia ne Nọyaẹnmwa ya ne Devid ne ọguọmwadia ẹre kevbe ivbi Izrẹl ne emwa rẹn.

II Krọnikol 30:18

Vbe deba ọnii, ni bun vbe iran ni kevbe ẹwae Ifreim, Manasẹ, Isaka kevbe Zẹbulọn rre, ma họnmwegbe, rhunmwuda ọnii, iran kegha ru emwiukpo Alagberra vbe odẹ ne ọ ma gba. E Hẹzekaia ne ọba keghi na erhunmwu na ne iran:

Ẹksọdọs 39:43

E Mosis keghi ghe emwi hia ne iran ru ghe, ọ keghi miẹn wẹ zẹ vbene Nọyaẹnmwa khare ọre iran wa ru ehia. E Mosis keghi na erhunmwu ne iran.

Iyẹn ne ọ Maan Ọghe Luk 2:34

Simiọn keghi fiangbe iran, ọ keghi tama Meri ne iye ẹe wẹẹ, “Osanobua zẹ ọmọ na zẹ vbe ọmwa ne emwa eso gha la ekpa ẹre fuan kevbe ne enibun gha la ekpa ẹre miẹn imiẹnfan vbe Izrẹl. Rẹn gha re ama ne ọ ke obọ Osanobua rre, ama ne emwa ni bun gha gbe odan ghe.

Iyẹn ne ọ Maan Ọghe Luk 24:50

Ọ keghi viọ iran ladian ke ore ẹvbo ya sẹ Bẹtani, ehe ne ọ na viọ obọ ghe odukhunmwu, ọ keghi fiangbe iran.

Jọsua 14:13

E Jọsua keghi na erhunmwu ne Kelẹb ne ovbi Jefunẹ, ọ na mu Hibrọn ne ẹẹn ne ogha re ọghọe.

Jọsua 24:28

Ẹre Jọsua ghi na zẹ emwa ni urrie, dọmwadẹ ọghọe keghi gha rrie obọ ọghọe vbe otọe nii.

I Samuẹl 10:25

E Samuẹl keghi rhan otọ ẹre ma emwa nii, uyi ne ọ khẹ ke ọba kevbe iwinna ne ovbe khẹ ke ẹe ne ọ gha winna, ọ keghi gbẹnnẹ ọẹn ye uwu ebe, ọ na rhie ẹre hin rre ye ehe ne ọ huanrẹn. Ọ na wẹ ne emwa hia gha rrie owa.

I Samuẹl 13:2

E Sọl keghi viọ arriaisẹn eha vbe ivbi Izrẹl, ọ na wẹ ne enekpa gha rrie owa. Ọ keghi viọ arriaisẹn eva ke egbe vbe Mikmas kevbe Bẹtẹl ne ẹvbo uhunmwu oke, arriaisẹn ọkpa na vbe gha gu e Jonatan ne ovbi ẹre vbe Gibea vbe otọe ẹwae Bẹnjamin.

I Samuẹl 2:20

Ẹghẹ nii, Elai ghi fiangbe Ẹlkana kevbe ọvbokhan rẹn, ọ ghi khama Ẹlkana wẹẹ, “E Nọyaẹnmwa ne ọ gie okhuo na biẹlẹ emọ ọvbehe nuẹn ne ọ rhie ihe ọnọna ne u ya fi ohan ne ẹẹn na.” Iyeke onii, iran ghi werriegbe gha rrie owa.