Jọsua 15:8 - Edo Bible (E Baibol Ẹdo) Version 1996

⁸ Ọ kevbe laghe odukhunmwu gha rrie iya ivbi e Hinọn ne ọ rre odẹ ekẹn ọghe ọgbagba oke ọghe Jebus ehe ne Jerusalẹm ye. Uwu ẹre keghi gha khian ya sẹ uhunmwu oke ne ọ mu aro da Iya Hinọn vbe odẹ orrie vbe odẹ okuọ ọghe ehe ne Iya Refeim na fo.

Jọsua 15:8 ပူးပေါင်းရင်းမြစ်များ

II Samuẹl 5:18

Avbe Filistin kegha die Iya Refeim, iran na mu evba mwẹ.

II Samuẹl 5:22

Avbe ivbi e Filistin keghi werriegbe gha rrie Iya Refeim, iran na vbe ya dọlegbe mu ẹẹn mwẹ.

II Ọba 23:10

E Josaia ne ọba kevbe rhia e Tofẹt rua, ehe ne iran na te vbe ga ẹbọ vbe Iya e Hinọm, ne ọmwa ikọmwa ghẹ ghi miẹn ehe na giẹn ovbi ẹre ne okpia ra ovbi ẹre ne okhuo rua ya zọ ese ghe e Molẹk ne ẹbọ.

I Krọnikol 11:4

E Devid ne ọba kevbe ivbi Izrẹl hia keghi mu okuo gie Jerusalẹm, e Jebus ọ re a tie ẹre ẹghẹ nii, ivbi e Jebus ne ivbi ọmotọ he ye rre evba.

II Krọnikol 28:3

ọ kegha giẹn eturari vbe Iya Hinọm, uhin ighẹ te ọ ya ovbi ẹre ne okpia zọ ese ghe amazẹ, ọ kegha ya egbe ta uyinmwẹ ẹwia ọghe emwa ne Nọyaẹnmwa khulo kua vbe otọe nii vbe ivbi Izrẹl dee.

Nehimaia 11:30

e Zanoa, Adulam kevbe avbe igue ni lẹga avbe ẹvbo na. Iran kevbe gha rre Lakis kevbe avbe ugbo ni lẹga iran. Iran kevbe gha rre Azẹka kevbe avbe igue ni lẹga ẹre. Ọnii rhie ma wẹ emwa e Juda, otọ ne ọ rre ẹkpo Biẹsiẹba vbe odẹ ekẹn kevbe Iya e Hinọm vbe odẹ okuọ, ọ re iran yinrin.

Aizaia 17:5

Izrẹl ghi do ye vbe ugbo ne a na fian ọka rhọ emwiokọ ni rrọ nẹ. Ọ ghi dihoi rua zẹ vbe ugbo ni rre iya e Refeim vbe a ghi wa gbẹn ọẹn mu otọ nẹ.

Jerimaia 19:14

Ẹre I na kpao vbe Tofẹt rre, ehe ne Nọyaẹnmwa gie mwẹ gha rrie ne I na ya ta uhunmwu ne irẹn gie. I kegha rre ọgua nọkhua ọghe Ọgua Osa, I ke ya tama avbe emwa nii hia.

Jerimaia 19:2

ne I la Onurho Ọmakhe gha rrie, Iya Hinọm. Evba nii ọ re ọ wẹ ne I na ta uhunmwu ne irẹn gha gie mwẹ re.

Jerimaia 19:6

Rhunmwuda ọnii nian, ẹghẹ dee ne a i ghi ra na gha tie emwa na Tofẹt ra Iya e Hinọm. Sokpan a ghi gha tie ẹre Iya Ugbelemwẹ.

Jọsua 15:63

Sokpan emwa Juda ma sẹtin khulo ivbi e Jebus ni rre Jerusalẹm ladian. Ivbi e Jebus ye deba ivbi Juda gha rre Jerusalẹm.

Jọsua 18:16

Ọ na ghi ke evba gha rrie ọkpẹn oke ne a ke ghe Iya e Hinọm vbe odẹ ufomwẹ ne ọ muda okuọ ọghe iya Refeim. Ọ keghi lele Iya Hinọm la gha odẹ ekẹn, vbe odẹ ekẹn ọghe iya Jebus vbe odẹ Ẹnrogẹl.

Jọsua 18:28

Zẹla, Haelẹf, Jebus (ra Jerusalẹm) Gibea, kevbe kirriat Jearim; okpẹvbo iwenẹ deba ẹvbo ni kọnkọn ni rrọọ. Ena ọrọre otọ ni sẹ ẹgbẹe ni rre ẹwae Bẹnjamin obọ ne ọ gha re ọghe iran.

Giọgis 1:21

Sokpan ivbi ẹwae Bẹnjamin ma khulo emwa Jebus ni rre Jerusalẹm ladian. Wa ke ẹghẹ nii gha dee, te ivbi Jebus deba ivbi e Bẹnjamin gha rre Jerusalẹm.

Giọgis 1:8

Ivbi e Juda keghi mu okuo la e Jerusalẹm, iran na khọn rẹn. Iran gbele emwa ni rrọọ, iran mu erhẹn ye ẹvbo nii.

Giọgis 19:10

Sokpan, okpia na ma ghi ho ne Ọ ye gbe asọn ọvbehe vbe evba, ọ re irẹn vbe egbakhian na la odẹ. Iran mwẹ ekẹtẹkẹtẹ eva ne a gbalọ emwi ne a ya tota ye ore iyeke. Te ẹdẹ ghi ra mu vbe iran sẹ Jebus (ọnii nọ wẹ Jerusalẹm), ẹre ọguọmwadia nii na tama arowa ẹre wẹẹ, “Gia mudia ne a gbe asọn na vbe Jebus na?”