Jọsua 10:40 - Edo Bible (E Baibol Ẹdo) Version 1996

⁴⁰ E Jọsua keghi khọn mu otọe nii hia, ọ keghi khọn avbe ọba ni rre uhunmwu oke nii miẹn iran otọ, iwewe-Negev, ẹvbo ni rre ugboghodo kevbe ni rre ahọ oke kevbe ototọ oke vbe odẹ orrie deba ẹvbo ne amẹ i ye vbe odẹ ekẹn, ọ ma sẹ ọkpa rae ye agbọn. A keghi wa gbele ehia a. Erriọ ọ re Nọyaẹnmwa Osanobua Izrẹl gie.

Jọsua 10:40 ပူးပေါင်းရင်းမြစ်များ

I Ọba 15:29

Vbe ọwarọkpa nii, ọ keghi suẹn gha gbele emwa ni re ẹgbẹe Jeroboam hia. Zẹ vbene Nọyaẹnmwa la unu ọguọmwadia ẹre ighẹ Ahija ne akhasẹ ne ọ rre Silo ta ẹe, a keghi wa gbele ẹgbẹe ọghe Jeroboam fo, ọkpa ma vbe ke ẹe.

Nehimaia 9:24

Iran khọn otọ e Kenan. Obọ ruẹ gba emwa ni rre evba u rhie ẹtin ne emwa ruẹn. Ne iran gha ru vbene ọ khọn iran, vbe egbe emwa kevbe avbe ọba ọghe Kenan.

Psalm 9:17

Uwu ọrọre ne a zẹ khẹ emwa dan hia. Kevbe ọghe iran hia ni he Osanobua ye otọ.

Ẹksọdọs 34:12

Gie a miẹn wẹ u ma gu emwa ẹvbo ni rre ehe ne u rrie ru emwamwa kugbe rhunmwuda ọna sẹtin gbe uẹ uhunmwu.

Nọmbas 13:17

Ugbẹn vbe Mosis ghi gie iran ladian, ọ tama iran wẹẹ, “Wa la odẹ okuọ la odẹ ekẹn ọghe ẹvbo Kenan ya sẹ ẹvbo oke nii.

Diuteronomi 1:7

Wa kuọ agọ uwa sẹ otọ, ne uwa si okhian sikẹ odaro. Wa gha rrie ẹvbo ni rre uhunmwu oke ọghe Amọri kevbe avbe ehe ne avbe ẹdogbo iran hia ye vbe odẹ iya Jọdan, odẹ ẹvbo uhunmwu oke kevbe ẹvbo ni rre ugboghodo, ghe odẹ ẹvbo ni rre odẹ ekẹn kevbe eghute Meditẹrrenian. Wa gha rrie otọe Kenan kevbe gberra Oke Lebanọn, rhinrin yasẹ Ẹzẹ nọkhua ighẹ Yufretes.

Diuteronomi 2:34

Vbe uwu ẹre nii, ma keghi khọn ẹvbo ni rrọọ hia mu otọ, ma keghi gbele emwa hia a, ikpia kevbe ikhuo kevbe ibiẹka. Ma ma vbe sẹ ọkpa rae ye agbọn.

Diuteronomi 7:24

“Ọ gha viọ avbe ọba iran yan ẹtin uwa obọ. Wa gha gbele iran an, iran ghi vbe khian ne a mianmian. Orhiọnkpa ne ọ gha sẹtin gba ye odẹ ya da uwa obọ yi ẹ i rrọọ, te uwa ra fuẹn iran hia a.

Jọsua 10:35

Iran keghi khọn rẹn ẹdẹnẹdẹrriọ nii, iran na gbele emwa hia ni rre ẹvbo nii uan, zẹ vbene ọ vbe ru vbe Lakis.

Jọsua 10:37

Iran na khọn ẹnrẹn muotọ. Iran keghi gbe ọba ne ọ rrọọ kevbe emwa hia ni rre ẹvbo nii kevbe ẹvbo ni diake ẹe. E Jọsua keghi wa tie ẹvbo nii ehe ne a gha fuan fẹẹrẹ, zẹ vbene ọ vbe ru Ẹgiọn. A ma sẹ orhiọnkpa rae vbọ.

Jọsua 10:39

Ọ kevbe khọn mu ẹẹn ke ẹe kevbe ọba ẹre kevbe ẹvbo ni sikẹ ọre. Iran keghi gbele emwa ni rre evba nii hia a. E Jọsua keghi ru Debẹ kevbe ọba ẹre zẹ vbene ọ vbe ru Hibrọn, Libna kevbe avbe ọba iran.

Jọsua 11:16

E Jọsua keghi khọn otọe nii hia, ẹvbo oke nii hia, vbe odẹ okuọ kevbe odẹ ekẹn iwewe avbe otọ Gosiẹn hia, otọe ni kae vbe odẹ ekẹn kevbe Iya Jọdan.

Jọsua 12:8

Avbe otọ ni de ba ẹre keghi re ẹvbo oke, otọ uye Iya Jọdan, avbe ẹzi oke, vbe odẹ ekẹn. Emwa ni te ka re otọe na keghi rre emwa Hiti, Amọri, emwa Kenan, Pẹriz, Hivi kevbe Jebus.

Jọsua 18:21

Avbe okpẹvbo ni gha re ọghe avbe ẹgbẹe ni rre ẹwae Bẹnjamin ke gha re Jẹriko Bẹt Hogla, Emẹk Keziz,

Jọsua 6:17

Ẹvbo na kevbe emwi hia ni rre uwu ẹre, a yae fi ohan nẹ ne a fuẹn ọnrẹn uan zẹ vbe emwi ne a ya zọ ese ghe Nọyaẹnmwa. E Rehab ne ebabotu kevbe emwa owa ẹre ọkpa, ọre a ra sẹrae rhunmwuda, ọ keghi viọ emwa ne ima gie ẹre uhunmwu lẹre.

Jọsua 8:2

Zẹ vbene uwa ru Jẹriko ke ọba ẹre, erriọ wa gha vbe ru Eai ke ọba ẹre. Sokpan, vbe ọnọna, wa sẹtin viọ emwi ke ẹmila iran ya khian ọwua, wa mu egbe ne uwa ya khọn ẹvbo nii, wa ghi la iyeke do ẹe mu.”

Jọsua 8:27

Ivbi Izrẹl keghi viọ avbe ẹmila kevbe avbe emwi ne a khọn viọ vbe evba nii, zẹ vbene e Nọyaẹnmwa tama Jọsua.

Jọsua 9:24

Iran keghi wanniẹn wẹẹ, “Emwi ne ọ ya ima ru ẹe enọwanrẹn ọrọre wẹ ma họn ẹn wẹ emwata nọ, wẹ te Nọyaẹnmwa Osanobua ruẹ tama Mosis ne ọguọmwadia ẹre, ne ọ mu otọe nii hia ne uwa, kevbe wẹ ne uwa gha gbele emwa ni rrọọ khian, vbe ne uwa ya nana sikẹ odaro. Te ima ru ẹe rhunmwuda ohan uwa wa kakabọ gha mu ima, ohan uhunmwu ima ọ re ọ gha to ima.