Joẹl 2:28 - Edo Bible (E Baibol Ẹdo) Version 1996

²⁸ “Vbe okiekie, I gha hihiẹ orhiọn mwẹ yan dọmwadẹ emwa, ivbi uwa nikpia kevbe ivbi uwa nikhuo ghi gha ta uhunmwu ne I gie; avbe ọmaẹn ghi gha mina, avbe igbama ghi gha miẹn umian.

Joẹl 2:28 ပူးပေါင်းရင်းမြစ်များ

Itan 1:23

Wa gha danmwehọ vbe a gha gu uwa gui, I gha rhie ibude esi ne uwa, I ghi vbe ghae ne uwa vbe uwu irẹnmwi mwẹ.

Aizaia 32:15

Sokpan, Osanobua gha dọlegbe rhie orhiọn rẹn gie ima. Avbe otọ ni te fafaa gha dọlegbe gha maa emwiokọ, ugbo ghi vbe gha maa emwiokọ ẹsẹsẹmwẹse.

Aizaia 40:5

Ẹghẹ nii, a ghi rhie uyi e Nọyaẹnmwa ne a miẹn, emwa ne agbọn hia gha vbe miẹn ọẹn e Nọyaẹnmwa tobọ ẹre yan ọna yotọ nẹ.”

Aizaia 44:3

“I gha sa amẹ ne ọmwa ne ovbamẹ gbe, I ghi vbe wẹ ne ẹzẹ gha lẹ, vbe otọe ne ọ kae I gha hihiẹ ẹtin yan avbe ivbi uẹ kevbe afiangbe mwẹ yan ivbi uniẹn ruẹn.

Aizaia 49:26

I gha ru ẹe ne iran ni wọ ruẹ uhunmwu gha gbele egbe; ayọn izigha kevbe okuosu ghi gha gbe iran iran an. Ẹghẹ nii, emwa ne agbọn hia gha rẹn wẹ, mẹ ọrọre Nọyaẹnmwa ọmwa ne ọ miẹn ruẹn fan, ọ na fan an fua. Iran gha rẹn wẹ mẹ ọrọre Osanobua ne ọ mwẹ ẹtin ọghe Izrẹl.”

Aizaia 49:6

E Nọyaẹnmwa keghi tama mwẹ wẹẹ, “I mwẹ iwinna ne ọ sẹ ọna ne I wa ye otọ khẹ ruẹ ọguọmwadia mwẹ. Ẹire ne u viọ ivbi Izrẹl ni ghi kẹe werriegbe ye ihe ukpọlọmwẹ ọkpa; sokpan, I gha vbe ya a ru uwanmwẹ, ọghe avbe uhunmwu ẹvbo ne a sẹtin miẹn otọ agbọn hia fan.”

Aizaia 54:13

“Mẹ ọ re ọ ra tobọmwẹ ma emwa ruẹn emwi I ghi rhie ẹfe kevbe ọfumwegbe ne iran.

Jerimaia 23:25

I rẹn vbene iran kha hẹ ighe avbe akhasẹ nii, iran ni ya eni mwẹ ta ohoghe iran ghi do kha wẹ mẹ ọ re ọ gie iran uhunmwu vbe imina.

Jerimaia 23:28

Akhasẹ ne ọ minaẹn, giee kha ighe imina kẹkan nọ, sokpan akhasẹ ne ọ họn urhu mwẹ, we ne ọ ya ta uhunmwu ne I gie kpẹghẹ. De emwi ne a ye ihunhun ru vbe ehe ne ọka ye yi?

Ezikiẹl 36:27

I gha rhie orhiọn mwẹ ye uwu uwa, I ghi vbe miẹn wẹ wa ya uhi kevbe iyi mwẹ ru emwi.

Ezikiẹl 37:14

“I gha rhie uhiọnrọnmwẹ mwẹ ye uwu iran, I ghi huẹn iran kpaegbe, I ghi vbe gie iran yin otọe iran tobọ iran. Ẹghẹ nii, iran gha rẹn wẹ mẹ ọrọre Nọyaẹnmwa. I yan nẹ wẹ I gha ru emwi na, te I ra gele ru ẹe. Mẹ ne Nọyaẹnmwa tae nẹ.”

Ezikiẹl 39:29

I gha hihiẹ orhiọn mwẹ yan ivbi Izrẹl, I i ghi dọlegbe fi iyeke gbe iran ọvbehe. Mẹ ne Nọyaẹnmwa ne Udazi ọ re ọ tae.”

Daniẹl 7:1

Vbe ukpo ne okaro ne Bẹlsiaza rriọba e Babilọn, I minaẹn, I keghi miẹn umian vbe asọn. I gbẹn imina nii yotọ, vbene I miẹn ọẹn.

Zẹkaraia 12:10

“I gha ye orhiọn itohan kevbe orhiọn erhunmwu vuọn ivbi uniẹn e Devid ni rre Jerusalẹm kevbe ivbi Jerusalẹm ọvbehe. Iran gha ghe ọmwa ne a ya agbada bi gbe ua, iran gha vbe khiẹ ọre vbe ọmwa ne ọ khiẹ ukpọmọkpa ne ọ mwẹ. Iran gha viẹ eve orriara zẹ vbe ọmwa ne ọmọdiọn rẹn nokpia wu.

Nọmbas 11:17

I gha tuorre do guẹ guan vbe evba, I gha rhie vbe orhiọn ne I rhie ne uwẹ nẹ, I ghi rhie ne iran. Ẹghẹ nii iran ghi gha ru iyobọ ne uẹn ya gha gbe aro ghe avbe emwa na, ne ọ ghẹ ghi gha re wẹ wẹ ọkpa ọ re ọ mu uhunmwu da ẹre.”

Nọmbas 12:6

E Nọyaẹnmwa keghi kha wẹẹ, “Banbanna nian, danmwehọ ẹmwẹ ne I ra ta. A gha miẹn ighẹ akhasẹ rre uwu uwa, mẹ ghi rhie egbe mwẹ ma rẹn vbe umian, I ghi vbe gu iran guan vbe imina.

Iyẹn ne ọ Maan Ọghe Luk 1:67

Zẹkaraia ne erha ẹe keghi vuọn ne Orhiọn Ne Ọ Huanrẹn, ọ keghi guan zẹ vbe akhasẹ wẹẹ:

Iyẹn ne ọ Maan Ọghe Luk 3:6

Emwa ne agbọn hia gha miẹn imiẹnfan Osanobua!’ ”

Iyẹn ne ọ Maan Ọghe Jọn 7:39

Jesu ta ẹmwẹ na rhunmwuda Orhiọn ne a gha rherhe rhie ne iran ni ya ẹe yi. Ẹghẹ na, a ma he rhie Orhiọn ne ọmwarhọkpa rhunmwuda a ma he tọn Jesu mu la uwu uyi.)

Iwinna 2:33

A tọẹn mu gha rrie obọ erha ọmwa Osanobua, ne ọ ya miẹn ẹre Orhiọn Ne Ọ Huanrẹn ne Erha ẹe ve ẹre. Emwi ne uwa ghi bẹghe na nian, kevbe ne uwa vbe họn, emwi ne ọ ya ru ima ẹse nọ, ọ keghi hihiẹe yan ima.

Iwinna 2:39

Rhunmwuda, wa kevbe avbe ivbi uwa ọre Osanobua ve ẹre emwi na kevbe iran ni rre urria, kevbe avbe emwa hia fẹẹrẹ ne Osanobua gha tie rrie egbe.”

Iwinna 21:9

Rẹn keghi mwẹ ivbi ẹre ne uvbi enẹ ni kpe orhu ẹmwẹ Osanobua.

Galatia 3:28

Rhunmwuda ọnii, alughaẹn ne egbe i rrọọ vbe ẹkpo avbe Ju kevbe avbe iran ne ẹ i re Ju, eviẹn kevbe ne ẹ i re eviẹn, ikpia ra ikhuo, ọkpa wa hia khin vbe uwu a ya egbe ba Kristi Jesu.

Hibru 1:1

Vbe ẹghẹ ne ọ gberra, odẹ ughughan kevbe ẹghẹ ni bun ọre Osanobua ya gha gu avbe erha mwa odede guan, vbe ne ọ na gie avbe akhasẹ gie iran.

I Samuẹl 19:20

Ọ na gie emwa eso ne iran ya mu ẹẹn. Iran keghi do vba avbe akhasẹ eso, iran gha kuu, iran gha vannọ, e Samuẹl kegha re ọkaolotu iran. Ẹre orhiọn Osanobua na hin emwa e Sọl, iran kevbe suẹn gha ku iran na gha vannọ.

I Samuẹl 19:21

Ugbẹn vbe Sọl ghi họn ẹmwẹ na, ọ keghi vbe gie otu ọvbehe gha khian, iran na kevbe suẹn gha ku, iran na gha vannọ, ọ keghi vbe gie emwa ukpogieha erriọ ọre ọ vbe sunu vbe egbe iran.

I Samuẹl 28:6

Rhunmwuda ọnii, ọ keghi nọ e Nọyaẹnmwa emwi ne irẹn gha ru, sokpan, e Nọyaẹnmwa ma zẹdẹ rhie ewanniẹn ne ẹẹn, ọ re vbe imina nọ, ra uta, ra la obọ akhasẹ.