Jerimaia 9:25 - Edo Bible (E Baibol Ẹdo) Version 1996

^25-26 E Nọyaẹnmwa keghi kha wẹẹ, “Ẹghẹ dee ne I gha na rri ivbi Igipt oya kevbe Juda, Idọm, Amọn, e Moab, kevbe avbe iran ni rre ato ni gbe eto iran muotọ, iran na hia rhuẹre, sokpan iran i mu ilele ne a mwamwa yọ sẹ. Iran na hia, kevbe ivbi Izrẹl, ne ọ mu ilele mwẹ sẹ i rrọ.”

Jerimaia 9:25 ပူးပေါင်းရင်းမြစ်များ

Jerimaia 4:4

Wa ya ile ne uwa gu imẹ ne Nọyaẹnmwa uwa ta gha ru emwi, ne uwa ye egbe uwa fiohan mẹ, wa ne ivbi e Juda kevbe ivbi e Jerusalẹm. Adeghẹ wa ma ru vberriọ, ohu mwẹ gha vẹn zẹ vbe erhẹn rhunmwuda emwi dan hia ne uwa he ru. Ọ gha vẹn, orhunmwu ọkpa ne ọ gha dọ ẹre yọ irrọọ.”

Jerimaia 49:32

“Wa viọ e kamẹl iran kevbe ẹmila iran hia. I gha zagha iran lele ehe hia ighẹ iran ni gbe eto muotọ na, I ghi vbe gie ọkhọ egbe hia rruan iran.

Ezikiẹl 28:10

U gha wu zẹ vbe ekita vbe obọ avbe orhunmwuyẹn ne ẹ i mu ohan Osanobua. Mẹ ne Nọyaẹnmwa ne Oghodua ọ re ọ gie.”

Ezikiẹl 31:18

“Ọba Igipt ọrọre erhan ne a kha na, ke ẹe kevbe emwa rẹn hia. Avbe erhan ni rre Idẹni ma te tan vba iran ra ne iran sughe vba iran. Sokpan, banbanna nian, zẹ vbe avbe erhan ne ọ rre Idẹni, ọ gha tuorre gha rrie ẹvbo emwa ni wulo nẹ, ne ọ vbe ya deba avbe emwa dan, kevbe avbe emwa ne a gbele vbe okuo. I tae nẹ.” Erriọ e Nọyaẹnmwa ne Udazi khare.

Ezikiẹl 44:7

Iran ru awua Ọgua Osa mwẹ vbekpa ne iran na gie avbe iran ni ma rhuẹ, avbe orhunmwuyẹn ne ẹ i họn ẹmwẹ mẹ, gha la uwu Ọgua Osa vbe ẹghẹ ne a ya ye ẹvbi aranmwẹ kevbe esagiẹn zọ ese ghe mwẹ. Rhunmwuda ọnii avbe emwa mwẹ rra uhi mwẹ vbekpa uyinmwẹ osọnnọ ne iran yin.

Levitikọs 19:27

Ghẹ zẹ eto okhiẹ uhunmwu ra ne u gia ẹtu ruẹ ya gha khiẹ orinmwi.

Levitikọs 26:41

Ne I na rhunmwuda ọnii mu aro da iran, ne I na viọ iran oghunmwu gha rrie ẹvbo eghian iran. Ọ gha sẹ okiekie, vbe a ghi vbokho avbe ivbi uwa nẹ iran mu egbe rrie otọ nẹ, ighẹ iran vbe rri oya ye orukhọ kevbe isọtẹ iran nẹ.

Emọs 3:2

“Vbe avbe uhunmwu ẹvbo hia ni rre agbọn na, wa ọkpa ọre I rẹnrẹn, wa ọkpa ọre I vbe gbe aro ghe vbọ. Ọnii ọre ọ si ẹe ne orukhọ uwa na re emwi ne ọ mu ohan, ọnii ọ si ẹe ne a na miẹn wẹ ẹ i mwẹ I ma rri uwa oya yọ.”

Ebe ne Pọl gbẹẹn gie emwa Rom 2:28

Ne a ta ẹmwata, gha ọ re Ju ne Ju ne a gele rhuẹ yi? Ẹ i re Ju ne ọ ye ikinnegbe re Ju ne arhuẹ ọre re ọghe ikpakpa egbe kẹkan.

Ebe ne Pọl gbẹẹn gie emwa Rom 2:29

Sokpan e Ju ne ọ gele re Ju ọrọre ne ọ re Ju vbe ekhọe, ọnii nọ wẹ ne a rhuẹre vbe uwu ekhọe, emwi na keghi re iwinna ne Orhiọn Osanobua winna ighẹ ẹ i re Uhi ne a gbẹnnẹ ye otọ. Ọmwa vbe nian, Osanobua ọre ọ tian rẹn ighẹ ẹ i re emwa ne agbọn.

I Samuẹl 14:6

E Jonatan keghi khama igbama nii wẹẹ, “Gie ima fian ẹẹn rra gha rrie agọ avbe Filistin ne enigẹbọ na. Ọ gha kẹe, e Nọyaẹnmwa gha yi ma obọ, ọ gha ru vberriọ, emwi ọkpa ne ọ gha wẹ ne ima ghẹ khọnmiotọ i rrọ, vbe ne ọ khọnrẹn wẹ ne ima ru ibozẹghẹ sẹ.”

I Samuẹl 17:26

E Devid keghi nọ emwa ni mudia ke ẹe vbe evba wẹẹ, “De emwi ne a gha ru ne ọmwa ne ọ sẹtin gbe ọmwa na yi, ne ọ vbe ban ukpọn efaa na hin Izrẹl ẹkun rre? Vbe ọ ke rre ighẹ ọ na ghẹ ovbi e Filistin ne ukpikolo, ne ọ do gha fa iran an ighẹ ivbiyokuo Osanobua ne ọ rrọọ.”