Jerimaia 7:30 - Edo Bible (E Baibol Ẹdo) Version 1996

³⁰ “Ivbi e Juda ru emwi dan ọkpa, iran ya viọ amazẹ iran ne ọ sọnnọ mwẹ ye uwu Ọgua Osa mwẹ, iran keghi mu awua yọ.

Jerimaia 7:30 ပူးပေါင်းရင်းမြစ်များ

II Ọba 21:3

Ọ keghi dọlegbe bọlọ avbe aro ẹbọ Asiẹrra ne ẹbọ ne okhuo, zẹ vbene Ehab ne ọba Izrẹl vbe ru ẹe. E Manasẹ kevbe gha gho avbe orhọnmwẹ ba ẹre.

II Ọba 21:4

Ọ keghi mannọ Ogiukpo iran ni ga ẹbọ lele uwu Ọgua Osa, ehe ne Nọyaẹnmwa khare ighẹ a gha na gha ga irẹn.

II Ọba 21:7

Ọ keghi mu amazẹ Asiẹrra ne ẹbọ ne okhuo ye uwu Ọgua Osa, ehe ne Nọyaẹnmwa ta ẹmwẹ ọnrẹn ma e Devid kevbe Solomọn ne ovbi ẹre wẹẹ, “Emwa na, vbe uwu Ọgua Osa ne ọ rre Jerusalẹm na, ọrọre ehe ne I hannọ zẹ vbe uwu avbe ẹwae ọghe Izrẹl, zẹ vbe ehe ne a gha na gha ga mwẹ.

II Ọba 23:12

Ogiukpo ne avbe ọba e Juda te ma ye odukhunmwu owa ẹguae vbe ehe ne Ehaz gha a ye, e Josaia ne ọba keghi guọghọe kua, ke ẹe kevbe Ogiukpo eva ne Manasẹ ne ọba mannọ ye ẹghodo eva ne ọ rre Ọgua Osa, ọ keghi wa rẹnkhẹn avbe Ogiukpo ni uan, ọ na kpolo ẹe ku Iya e Kidrọn.

II Krọnikol 33:15

Ọ keghi vbe rhie ọkaokuo ne ọ mwẹ otu iyokuo ọkpa vbe ototọ ẹre ye ọkpọkpa vbe avbe ẹvbo ne a gba odin ga vbe Juda. Ọ keghi viọ avbe ẹbọ ẹrrẹe kevbe amazẹ ne ọ ta mu ye uwu Ọgua Osa hin rre, avbe aro ẹbọ ni gha rre uhunmwu oke ne a bọ Ọgua Osa yi, kevbe ihẹ ọvbehe hia vbe Jerusalẹm, ọ keghi viọ ehia lahin ore ẹvbo rre, ọ na ya hẹ kua.

II Krọnikol 33:3

Ọ keghi dọlegbe bọlọ avbe aro ẹbọ hia ne Hẹzekaia ne erha ẹe guọghuọ ua. Ọ keghi so avbe Ogiukpo ne a na gho e Baal, ọ na mannọ amazẹ ọghe Asiẹrra ne ọba ne okhuo, ọ na vbe gha gho avbe orhọnmwẹ.

II Krọnikol 33:7

Ọ keghi mu amazẹ ye uwu Ọgua Osa, ehe ne Nọyaẹnmwa ta ẹmwẹ ọnrẹn ma e Devid kevbe Solomọn ne ovbi ẹre wẹẹ: “Emwa na vbe Jerusalẹm, vbe Ọgua Osa na, ọ re ehe ne I zẹe vbe otọe ẹwae iweva ni rre Izrẹl, wẹ, a gha na gha ga mwẹ.

Aizaia 66:4

Rhunmwuda ọnii, I gha gie ọkhọ rruan iran, emwi nii ne ohan rẹn wa mu iran, rhunmwuda, ẹghẹ ne I na gha tie iran, a ma miẹn ne ọ khuẹnniẹn, ẹghẹ ne I na gha guan, a ma miẹn ne ọ danmwehọ mwẹ. Iran na wẹ te iran gha hẹ uhunmwu yọmwẹ obọ, ne iran gha ru emwi dan.”

Jerimaia 16:18

I gha ye iran ha osa ukhukhu eva ye orukhọ kevbe uyinmwẹ dan iran rhunmwuda, iran ya amazẹ ne ẹ i mwẹ arrọọ vbene ikun orinmwi ye, mu awua ye otọe mwẹ, iran keghi vbe ya ẹbọ ohoghe iran vuọn ehe hia.”

Jerimaia 23:11

E Nọyaẹnmwa khare wẹẹ, “Ke akhasẹ kevbe avbe ohẹn, ne ọ rẹn Osanobua i rrọọ I mu iran nẹ vbe iran ru emwi dan, vbe uwu Ọgua Osa tobọ ẹre.

Jerimaia 32:34

Uhin ighẹ te iran ya mu amazẹ ẹwia iran ye uwu Ọgua Osa, ehe ne a bọe ne a na gha ga mwẹ, iran mu awua yọ nẹ.

Jerimaia 32:35

Iran bọọ Ogiukpo ne Baal vbe Iya Hinọm, ne iran ya gha ya ivbi iran nikpia kevbe nikhuo zọ ese vbe evba ne ẹbọ ne a tie ẹre Molẹk. Mẹ ma tama iran ne iran ru emwi na, ọ ma vbe gha zẹdẹ rrọ mwẹ ekhọe wẹ ne iran ru emwi vberriọ, ne iran ya si emwa e Juda obọ fi orukhọ.”

Ezikiẹl 7:20

Ẹghẹ okpa, iran keghi gha ya ikpẹrọnmwọ itegbe iran ni mose hio, sokpan, iran keghi ya iran gha mannọ amazẹ ni hu ọmwa ẹko. Ọnii ọ si ẹe ne Nọyaẹnmwa na ya ẹfe iran khian ne ọ ghi sọnnọ iran.

Ezikiẹl 8:3

Ọ ke ghi niẹn emwi ne ọ yevbe obọ ladian, ọ na mu mwẹ eto. Vbe umian na, orhiọn Osanobua keghi tọn mwẹ mu ghe odukhunmwu ẹsẹse, ọ na mu mwẹ gha rrie Jerusalẹm. Ọ keghi rhie mwẹ gha rrie onurho ne ọ ke uwu ẹre vbe obọ ne ọ laghe odẹ ahọ vbe Ọgua Osa, ehe ne ẹbọ okpa ne ọ wa mu Osanobua ohu ye.

Daniẹl 11:31

Eso vbe ivbiyokuo ẹre gha ru awua vbe uwu Ọgua Osa, iran gha dobọ izọese ẹdẹgbegbe yi, iran ghi mu ‘Emwikhọ Ugborrirri’ gbọọ.

Daniẹl 9:27

Ọmwa ne ọ rre asẹ nii gha gu emwa nibun ke ọta ne ọ deziẹn la ukpo ihinrọn, a ghẹ ghi wa ẹghẹ ne a kha na ye ihe eva nẹ, ọ gha wẹ ne a dobọ ese ne a zọ kevbe izọhẹ yi. A gha ya mu Emwikhọ Ugborrirri. Ye ehe ne ọ mwẹ uyi sẹẹ vbe Ọgua Osa, ọ ghi vbe gha rre evba ọ te do sẹ ẹghẹ ne ọ gha ya rri ọghọe fo zẹ vbene Osanobua mwamwa khẹ ọre.”