Ebram keghi rhie Sera ne amwẹ ọnrẹn, e Lọt ne ovbi ọtiọnrẹn, ẹfe ne irẹn mwẹ hia, ne iran khuan ẹn vbe Haran, kevbe eviẹn ọnrẹn hia iran keghi si okhian gha rrie Kenan.
Ọ keghi viọ iran ni miẹn uhunmwu vbọ hia gha rrie Babilọn, iran na ya gha ga ẹe kevbe uniẹn ivbi ẹre zẹ vbe eviẹn ọ te do sẹ ẹghẹ ne Arriọba e Pẹsia na la ukpo.
Ọ ghi rre ukpo igbe ne Zedekaia la ẹkete zẹ vbe ọba e Juda, ne ọ vbe re ukpo evairrọvbugie ne Nebukiadneza ke gha re ọba e Babilọn, e Nọyaẹnmwa keghi gunmwẹ guan.
Vbe ikpẹdẹ ne ogigbe ọghe uki ne ogisẹn vbe ọ rre ukpo okpa irrọvbugie ne Ọba Nebukiadneza rriọba e Babilọn, e Nebuzaradan ne arowa ivbiyokuo ẹre kevbe ne ọ gue ẹe zẹ iro keghi la ore Jerusalẹm.
Vbenian a gbẹnnẹ ẹmwẹ emwa ne Nebukiadneza viọ kpao zẹ vbe oleghan: ọ ghi rre ukpo ihinrọn ne ọ rriọba, ọ keghi viọ arhin ehayan ugie ọ ya yan arriaisẹn eha (3,023) kpao.