Jerimaia 5:24 - Edo Bible (E Baibol Ẹdo) Version 1996

²⁴ Wa ma he zẹ ọe vbe iro ẹdẹ wẹ, wa gha ya ọghọ mẹ, vberriọ, mẹ ọ re ọ giẹ amẹ ahọ orhọ kevbe ahọ uyunmwu rre, I ghi vbe gha rhie ẹghẹ emwiorhọ ne uwa vbe ukpukpo.

Jerimaia 5:24 ပူးပေါင်းရင်းမြစ်များ

Gẹnẹsis 8:22

Ya sẹ omwa vbe ne agbọn gha ya gha rrọọ, ẹghẹ ikọ emwi kevbe ẹghẹ emwiorhọ gha rrọọ. Ẹghẹ okhuakhua kevbe owowo gha rrọọ, ẹghẹ uyunmwu kevbe ẹghẹ orhọ, asọn kevbe avan. Ena i ra fo ẹdẹ.”

I Ọba 17:1

Akhasẹ ọkpa ne a tie ẹre Elaija ne ovbi e Tisbi ne Giliad ke tama Ehab wẹẹ, “Vbe eni e Nọyaẹnmwa ne Osanobua Izrẹl ne imẹ ga, I tama ruẹn nian wẹ amẹ i ghi ra rhọ, evbu i ra ghi vbe tuo ọ te ya sẹ ukpo eha vbe ẹ i re te I fi ẹmwẹ na werriẹ ta.”

Job 29:23

emwa hia ọ re iran wa maa na, zẹ vbene amẹ maa ne ọwẹe vbe uyunmwu.

Job 38:37

De ọmwa ne ẹwaẹn gba na sẹrriọ yi ne ọ ka amẹ ikpakpa iso ne ọ vbe biẹe gọ ne amẹ rhọ,

Job 5:10

Ọ ghi rhọ amẹ ye otọe nii. Ọ ghi gbe amẹ khakha uwu oha.

Psalm 147:8

Ọ tan okuku amẹ gue iso, ọ gie amẹ rhọ ye otọ, ọ keghi gie avbe irunmwu zọ vbe avbe uhunmwu oke.

Psalm 65:9

U rhie maa vbene u gbe aro ghe otọe hẹ, vbene u na gie amẹ gha rhọ yọ u keghi ya ẹe gha maa ọ na vbe gha maa emwiokọ erriọ ọ re u ru ẹe.

Aizaia 64:7

A ma miẹn orhiọnkpa ne ọ ya erhunmwu dọlegbe ghe ehe ne u ye, a ma miẹn ne ọ bu ruẹ rre do nọ iyobọ. U rhie egbe ruẹ lẹre ne ima, u ke hee ima yotọ rhunmwuda orukhọ mwa.

Jerimaia 10:13

Amẹ ne ọ rre odukhunmwu iso ghi davan vbe irẹn a wẹ ne ọ ru vberriọ, ọ ghi ke ehe ne agbọn sẹe viọ okuku rre. Ọ ru ẹe ne ayan gha yan vbe amẹ rhọ ọ ghi giee ẹhoho ladian ke ehe ne ọ viọ ẹre lẹre yi gha dee.

Jerimaia 14:22

Ọkpa ne ọ sẹtin si amẹ i rre avbe amazẹ avbe uhunmwu ẹvbo, iso i sẹtin ye ẹtin obọ ẹre wẹ ne amẹ rhọ. Wẹ ọre ima mu ẹtin idaehọ mwa yan, e Nọyaẹnmwa Osanobua mwa rhunmwuda, wẹ ọrọre ọmwa ne ọ ru avbe emwi na hia.

Jerimaia 2:19

Emwi dan uwa ọ re ọ ra rri uwa oya ne uwa na fi iyeke gbe mwẹ ọ re ọ ra bu abe uwa. Wa gha ruẹ vbene ọ rriara hẹ kevbe, vbene ọ ma gba hẹ ne uwa na hee mwẹ yotọ mẹ ne Nọyaẹnmwa ne Osanobua rua; vbene uwa i ghi na vbe ya ọghọ mẹ. Mẹ ne Nọyaẹnmwa ne Udazi, ne Oghodua taa ẹe nẹ.”

Jerimaia 3:3

Ọnii ọ re ọ sii ẹe ne a na wẹ ne amẹ ghẹ rhọ, ne amẹ ahọ orhọ ma na ghi rhọ. Te uwe wa yevbe ebabotu, ekhue i vbe mu ẹẹn.

Jerimaia 5:22

Mẹ ọrọre Nọyaẹnmwa vbọzẹ ne uwa i na ya ọghọ mẹ? Vbọzẹ ne uwa i na guọ vbe odaro mwẹ? Mẹ ọ re ọ mu uzekhae ya ru ehe ne uwu okun lae. Uwu etẹbitẹ ne irẹn i sẹtin fian rra. Okun sẹtin gha vba kua sokpan, ẹ i sẹtin gberra, ulẹmwẹ okun sẹtin gha davan, sokpan ẹ i sẹtin hae gberra.

Jerimaia 50:5

Iran gha nọ odẹ ne a la ye e Zaiọn, iran ghi gha rrie odọ nii. Iran gha gunmwẹ ta ile ẹdẹdẹmwẹdẹ, iran i ghi ra vbe rra ẹre.

Hozia 3:5

Sokpan, ẹghẹ dee ne ivbi Izrẹl gha na dọlegbe bu e Nọyaẹnmwa ne Osanobua iran gha dee, iran gha vbe bu ovbi uniẹn e Devid rre zẹvbe ọba iran. Ẹghẹ nii, iran gha mu ohan e Nọyaẹnmwa, iran ghi vbe miẹn emwi ọhẹ vbe obọ ẹre.

Hozia 6:1

Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ?

Joẹl 2:23

“Ivbi e Zaiọn, wa gha ghọghọ wa hia ghọghọ ye emwi ne Osanobua uwa ru ne uwa. Ọ giee amẹ ne ọ sẹ ihe gie uwa vbe ẹghẹ vbe orhọ ma he suẹn, ọ bu amẹ fua ne uwa vbe okhuakhua, kevbe ẹghẹ orhọ, vbene ọ ka rhọ dee ẹdẹ.

Emọs 4:7

Ẹghẹ ne ọ wa kei ne amẹ na rhọ ye emwiokọ uwa. I keghi dobọ amẹ yi ne ọ ghẹ rhọ. I gha gie amẹ rhọ vbe ẹvbo ọkpa, I i ghi vbe gie ẹe rhọ vbe nọkpa.

Zẹkaraia 10:1

Wa nọ e Nọyaẹnmwa amẹ ne ọ rhọ vbe omuhẹn orhọ. E Nọyaẹnmwa ọ re ọ gie amẹ bi ne ọ na vbe rhọ ne ugbo na maa ne emwa hia.

Matiu 5:45

Ne uwa miẹn ehe na gha re ivbi erha uwa ne ọ rre ẹrinmwi. Rhunmwuda, ọ gie ovẹn ọnrẹn gha yunmwu ne emwa esi kevbe emwa dan, ọ ghi vbe gie amẹ gha rhọ ne iran ni ru emwi esi kevbe ni ru emwi dan.

Iwinna 14:17

Sokpan ẹghẹ hia ọre ọ ya gha rhie maa egbe ọmwa ne irẹn khin vbekpa emwi esi ne ọ ru. Ọ rhọ amẹ ke odukhunmwu ye otọ ne uwa, deba emwiokọ vbe ẹghẹ ne ọ ke yi, ọ rhie evbare ne uwa ne ọ gha ye ẹko sẹ uwa ọyẹnmwẹ.”

Diuteronomi 28:12

Ọ gha gie amẹ ke aza ọghe ọe vbe ẹrinmwi gha dee vbe ẹghẹ ọ re, ọ ghi fiangbe iwinna obọ uwa hia, sẹrriọ wẹ wa gha viọ ne ẹvbo ni bun mọmọ sokpan wa i ra rhie mọmọ vbe obọ iran rhọkpa.

Jems 5:7

Rhunmwuda ọnii, wa ne etẹn mwẹ, wa ziengbe khẹ ẹghẹ ne Nọyaẹnmwa gha ya rre. Wa ma miẹn vbe ne ọwẹe ziengbe hẹ vbe ọ gha khẹ ne otọ ẹre mọ ọmọ esi ladian. Ọ ghi hẹko, ziengbe khẹ amẹ ne okaro kevbe ne okiekie ne ọ rhọ.

Arhie Maan 11:6

Iran mwẹ asẹ ne iran gha ya khui iso, ne amẹ ghẹ rhọ vbe uwu ẹghẹ ne iran ya kpe orhu ẹmwẹ Osanobua. Debare, iran vbe mwẹ asẹ vbe uhunmwu avbe uhunmwu ẹzẹ, ne iran ya fi iran werriẹ khian esagiẹn, iran vbe mwẹ asẹ ne iran ya si egboghogbogho fi agbọn inugba ne ọ rhirhi khọn iran.