Jerimaia 5:17 - Edo Bible (E Baibol Ẹdo) Version 1996

¹⁷ Iran gha rri emwiokọ kevbe evbare uwa fo. Iran gha gbele ivbi uwa nikpia kevbe nikhuo, iran gha gbele avbe ohuan kevbe ẹwe uwa, iran gha dunmwu ogba azara kevbe erhan ohọ uwa hia a. Ẹvbo ne a gbe odin ga ne uwa mu ẹtin yan, ivbiyokuo iran gha guọghọ ẹe rua.

Jerimaia 5:17 ပူးပေါင်းရင်းမြစ်များ

Aizaia 62:8

E Nọyaẹnmwa yan eyan akekhọerre nẹ ọ gha ya ẹtin irọẹn mu ẹẹn sẹ, “Ọka ruẹ i ghi re ne avbe eghian ruẹn gha ya gha koko egbe iran. Avbe ọrriọvbe i ghi ra dọlegbe gha rhie ayọn ruẹn da.

Aizaia 62:9

Sokpan, wẹ ne ọ kọe, ne ọ vbe rhọ ọka nii ẹre ọ gha vbe rri ebrẹd ẹre, u ghi rho e Nọyaẹnmwa, wẹ ne ọ gbearoghe ne u na kọlọ azara nii ọ re ọ gha vbe da ayọn ẹnrẹn vbe ore Ọgua Osa mwẹ.”

Jerimaia 1:15

Rhunmwuda te imẹ ghi tie avbe uhunmwu ẹvbo hia ni rre odẹ okuọ wẹ ne iran gha dee. Avbe ọba iran ghi mu ẹkete iran gbọọ ye onurho e Jerusalẹm, kevbe lẹga ekẹn ne a gbe lẹga ẹre, kevbe yan avbe ẹvbo ni dekẹe vbe Juda.

Jerimaia 4:26

Otọe ne ọ te ma emwiokọ khian ato, ẹvbo nekhua, ni rrọọ khian itowa, rhunmwuda ohu nọkhua ọghe Nọyaẹnmwa.

Jerimaia 4:7

Zẹvbe oduma ne ọ ke ehe ne ọ lẹre yi dee. Onii ne ọ rẹnkhẹn ẹvbo ua la odẹ nẹ. Ọ dee do rẹnkhẹn e Juda. Te a ra ye avbe ẹvbo ni rre Juda khian itowa ọmwa ne ọ gha yin ẹnrẹn i ghi rrọọ.

Jerimaia 5:18

E Nọyaẹnmwa khare wẹẹ, “Uhin do sẹ egbe ẹghẹ ne a kha na, mẹ i ra ye wa fuẹn emwa mwẹ fo.

Jerimaia 50:17

E Nọyaẹnmwa khare wẹẹ, “Te ivbi Izrẹl yevbe ohuan ne oduma khu khian, ọ na vbe zagha iran an. Okaro, Ọgbaisi Asiria keghi dekun iran, vbe iyeke ọnii, e Nebukiadneza ọghe Babilọn keghi gbẹn ugboloko iran.

Jerimaia 50:7

A vba gbe ọ re iran ghi khin, avbe eghian iran khare wẹẹ, ‘Iran sẹ ẹmwẹ e Nọyaẹnmwa nẹ, rhunmwuda ọnii, ma ma ru a ghẹ i ru. E Nọyaẹnmwa ọ re avbe erha iran odede mu ẹtin yan, te ọ te kei ne iran vbe rhie ekhọe lele ẹe.’

Jerimaia 8:13

“Te I te ra si emwa mwẹ koko zẹ vbene ọmwa rhọ emwiokọ ẹre si koko, sokpan, iran yevbe azara ne ọ ma mọ ọmọ, kevbe erhan ohọ ne ọ ma mọ, uhin ighẹ ebe ni rrọ luẹluẹ nẹ. Rhunmwuda ọnii, I keghi fan obọ ẹre ne avbe ọrriọvbe ya otọe nii khian ọghe iran.”

Jerimaia 8:16

Avbe eghian ima sẹẹ ore Dan nẹ, ma họn vbe ẹsin iran hiọnrọn. Ẹvbo ni hia ọ re ọ mu rueghe vbe ẹsin iran a tu. Eghian ima rre nẹ, ne iran do rhia otọ ima kevbe emwi ni rrọọ hia a, ore ẹvbo mwa kevbe emwa ni rrọọ.”

Eve Orriara 2:12

Ohanmwẹ gbe iran, ovbamẹ gbe iran ehia gha tulo gbe iye iran, ehia dele vbe adesẹ ughe zẹ vbe emwa ne a kuan ẹre egbe, erriọ ehia ya wulo uwu ọyẹvbu ye avbe iye iran obọ.

Eve Orriara 2:2

E Nọyaẹnmwa wa rẹnkhẹẹn igue hia ni rre Juda a vbe ne a i na vbe mwẹ itohan ọ kevbe guọghọ odin ne a te gba ga ẹvbo nii uan ọ keghi vbe fa otọe arriọba nii kevbe avbe ọkaolotu ẹre ua.

Ezikiẹl 36:4

Rhunmwuda ọnii, wa ne oke nekhua kevbe negiẹrẹ, wa danmwehọ ẹmwẹ ne imẹ ne Nọyaẹnmwa ne Udazi tama uwa, kevbe uwa ne ivbi ẹzẹ kevbe iya, kevbe uwa ne ehe ne a ya khian itowa hia, kevbe uwa ne ore ẹvbo ne a lẹẹ sẹrae, ne a fu ẹre emwi hẹ, avbe ẹvbo ni yin lẹga ẹre na vbe yae gha gbogiẹ.

Hozia 2:12

I gha guọghọe rua ighe erhan ne ọ mọ ọmọ ne ọ ya ru ayọn, kevbe erhan ohọ hia, ne ọ khare ighe avbe esiọre ọ re ọ viọ ẹre ne irẹn, rhunmwuda iwinna ne ọ ye ne iran. I gha ya ogba azara ẹre kevbe erhan ohọ ẹre khian ẹgbo, aranmwẹ oha ghi rhia ẹre ua.

Hozia 8:14

“Avbe ivbi Izrẹl bọlọ ẹguae nibun, sokpan iran mianmian Ayi ne ọ yi iran. Ivbi e Juda bu ẹvbo nibun ne a gbe odin gaa, sokpan, I gha gie erhẹn ne ọ gha ya giẹn ẹguae iran kevbe ẹvbo iran an.”

Joẹl 2:3

Iran rri irunmwu uan zẹ vbe erhẹn, Vbe odaro iran, ugbo yevbe Ogba Idẹni sokpan, iran gha la ẹe gberra nẹ, ọ ghi yevbe ato ne emwi rhọkpa i ye. Emwiọkpa ne ọ lẹ iran fe i rrọọ.

Levitikọs 26:16

I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

Zẹfanaia 3:6

E Nọyaẹnmwa khare wẹẹ, “I ka gbe iyaẹvbo eso ogbefo yi. I dunmwu avbe okpẹvbo iran an, I keghi sẹ ekẹn iran kevbe owa ọkhẹ iran rae ye itowa. Emwa lẹ hin okpẹvbo iran rre, emwa i ghi rre ore iran, orhiọnkpa ma ke ẹe vbọ.

Malakai 1:4

Adeghẹ emwa Idọm ne ivbi uniẹn Isọ ghi vbe kha wẹẹ, “A guọghọ ima ẹvbo rua, sokpan, ma gha dọlegbe họlọ iran,” ẹghẹ nii, e Nọyaẹnmwa ghi vbe wanniẹn wẹẹ, “Gie iran dọlọ ẹe bọ, I gha dọlegbe dunmwu ẹẹn sẹ otọ. Emwa ghi gha tie iran ‘Ẹvbo dan’ kevbe ‘Uhunmwu ẹvbo ne ohu ẹre mu e Nọyaẹnmwa ẹdẹdẹmwẹdẹ.’ ”

Diuteronomi 28:33

Ẹvbo ẹrrẹe ghi viọ emwiokọ uwa ne uwa miẹn ẹsọn nọkhua yi ya kọ, vbene emwirhọkpa ina sẹ uwa obọ gberra ukpokpo ekugbakẹghẹrẹ kevbe obọ ne ọ tọn ne a ya mu uwa.