Jerimaia 46:10 - Edo Bible (E Baibol Ẹdo) Version 1996

¹⁰ Ẹdẹ Osanobua ne Udazi ne Oghodua ọ na khin ẹdẹnẹrẹ na, ọ ra kioya ẹdẹnẹrẹ na, ọ gha rria avbe eghian rẹn ikhi. Umozo ẹre gha rri iran ne ẹko vuọn ẹẹn ọ gha vbe wọn esagiẹn iran ẹko te do vuọn ẹẹn. Ẹdẹnẹrẹ na ọ re Oghodua ra ye avbe oghunmwu ẹnrẹn zọ ese vbe odẹ okuọ, vbe ọkpẹn e Yufretes.

Jerimaia 46:10 ပူးပေါင်းရင်းမြစ်များ

II Ọba 24:7

Ọba Igipt kevbe ivbi iyokuo ẹre ma ghi dọlegbe khọn ladian vbe Igipt ọvbehe, rhunmwuda, ọba e Babilọn ọ re ọ ghi gha khaemwisẹ yan avbe otọe hia ni te re ọghe Igipt kevbe ẹzẹ Yufretes kpao ya sẹ ehe ne Igipt sẹe vbe odẹ ahọ.

Job 24:1

“Vbọzẹ ne Osanobua na ma rhie ẹghẹ ibuohiẹn ye otọ yi. Ẹdẹ ohiẹn ata ne iran ni ga ẹe?

Aizaia 13:6

Wa gha tulo utumwẹ obalọ. Ẹdẹ e Nọyaẹnmwa sẹ otọ fo, ẹdẹ ne Oghodua ra mu ọfuan rre.

Aizaia 2:12

Vbe ẹdẹ nẹdẹrriọ, e Nọyaẹnmwa ne Oghodua gha hie uhunmwu emwa ni mwẹ ẹtin hia rriotọ, iran hia ni hio, kevbe ni ya obọ rra ẹwẹe.

Aizaia 31:8

A gha fuẹn Asiria a vbe okuo, sokpan ẹ i re ẹtin ọmwa nagbọn ọ re ọ ra ru ẹe. Ivbi Asiria gha lẹkua vbe okuo, a ghi munọ avbe igbama iran oghunmwu.

Aizaia 61:2

Ọ gie mwẹ ne I ya kha, wẹ ẹghẹ sẹ nẹ, ne Nọyaẹnmwa gha ya miẹn emwa rẹn fan. Ọ ghi vbe khọn eghian iran muotọ. Ọ giee mwẹ nẹ I ya fu iran ni khiẹ ẹko rre,

Aizaia 63:4

Te I khare wẹ, ẹghẹ sẹe nẹ ne I gha na miẹn avbe emwa mwẹ fan, ẹghẹ sẹe nẹ ne I gha na rri eghian iran oya.

Jerimaia 12:12

Emwa wa fian uhunmwu oke ato ni rra do fu emwi hẹ, I gie okuo ne ọ ya fuẹn otọe nii hia a, ọmwa ne ọ ra gha rre ọfumwegbe i rrọ.

Jerimaia 46:14

“Ya kha vbe ore ẹvbo Igipt, vbe Migdọl, Mẹmfis kevbe Tapanhes wẹẹ, ‘Wa mu egbe ne uwa ya gbinna ne egbe uwa; emwi ne uwa mwẹ, a gha fuẹn ehia vbe okuo!

Jerimaia 46:2

Ọ na suẹn ọnrẹn vbe egbe Igipt. Ẹmwẹ ne ọ tae vbekpa ivbiyokuo e Nẹko ne ọba Igipt ẹre ọ na khin, ọmwa ne Nebukiadneza ne ọba e Babilọn khọn mu Kakẹmis vbe ọkpẹn Yufretes ne Ẹzẹ vbe ukpo ne ogienẹ ne Jehoiakim yae vbe ẹkete e Juda:

Jerimaia 46:6

Iran ni sẹtin rhulẹ i ra lẹ fe, avbe ivbiyokuo i ra sẹtin lẹ fe, vbe odẹ okuọ vbe ọkpẹn Yufretes, iran rrua owẹ, iran keghi dele.

Jerimaia 50:15

Wa kpe orhu okuo lẹga ọre ẹvbo nii hia. Banbanna nian, e Babilọn de igue nẹ. A ha uvun la ekẹn ọnrẹn gberra, a keghi dunmwu ẹn ruan sẹ otọ. Te I ghi rria e Babilọn ikhi na. Rhunmwuda ọnii nian, wa vbe rria iran ikhi, ne uwa ru iran zẹ vbene iran vbe ru emwa ọvbehe.

Jerimaia 50:18

Rhunmwuda ọnii, mẹ ne Nọyaẹnmwa ne Oghodua, Osanobua Izrẹl, gha rri Ọba Nebukiadneza kevbe ẹvbo ẹre oya, zẹ vbene I rri ọgbaisi ọghe Asiria oya.

Jerimaia 51:6

Wa lẹ ladian vbe Babilọn! Wa lẹ rhie uhunmwu hin ẹbe rre! Wa ghẹ gie a gbele uwa ye orukhọ e Babilọn. Te imẹ rria ẹre ikhi na, I ra vbe rri ọre oya ne ọ ma ẹẹn.

Ezikiẹl 21:28

“Ovbi ọmwa, guan zẹvbe akhasẹ, ta ẹe ladian wẹ mẹ ne Nọyaẹnmwa ne Udazi ọ re ọ tama ivbi Amọn ni kpa unu ghe Izrẹl, tama iran wẹẹ, ‘Umozo mu egbe nẹ ọ ra ya fuẹn emwi. A kpee ẹe nẹ ọ gha gbe emwi, ne ọ gha fi wain zẹ vbe ayan,

Joẹl 1:15

Ẹdẹ e Nọyaẹnmwa bu otọe nẹ ẹdẹ ne Oghodua, gha na gie ọfuan rre. Wẹ miẹn ohan ne ọ gha rre ẹdẹ ne ẹdẹrriọ!

Joẹl 2:1

Wa kpe okpe, wa si orhu okuo vbe Zaiọn ne oke nọhuanrẹn Osanobua. Wa gha guọ ivbi e Juda! Ẹdẹ e Nọyaẹnmwa dee ẹgiẹgiẹ.

Zẹkaraia 6:6

Ikẹkẹ okuo ne avbe ẹsin nekhui si, keghi mu uhunmwu da odẹ okuọ gha rrie Babilọn. Avbe ẹsin nọfua keghi mu aro da odẹ orrie, iran ni gbẹnnẹ ekẹnnẹkẹnnẹ keghi mu aro da ẹvbo ni rre odẹ ekẹn.

Iyẹn ne ọ Maan Ọghe Luk 21:22

Rhunmwuda ‘Ẹdẹ Irriakhi’ nọ ne a ya mu ẹmwẹ ne Ebe tae hia sẹ.

Diuteronomi 32:42

Esagiẹn iran gha ke ifẹnmwẹ mwẹ lẹ ye otọ, umozo mwẹ gha gbele iran hia ighẹ iran ni gbe odan ghe mwẹ, mẹ i ra fan emwa ni gun mwẹ gbinna fua. Uhin ighẹ iran ni miẹn ikuanegbe kevbe eseghan gha wulo.’