Jerimaia 40:5 - Edo Bible (E Baibol Ẹdo) Version 1996

⁵ Ugbẹn vbe I ma ghi rhie ewanniẹn ne ẹẹn, e Nebuzaradan keghi kha wẹẹ, “Bu ẹre gha khian ighe e Gedalaia ne ovbi Ahikam ne ọ vbe re eyẹ e Siafan, ne ọba Babilọn ya ru ne ọkhaemwisẹ yan avbe ẹvbo e Juda. U sẹtin gu ẹe tota deba avbe emwa nii, ra u sẹtin gha rrie eheikehe ne ọ ghi khọn ruẹn wẹ u gha yo.” Ẹre ọ na do ya emwi mẹ, ọ kevbe viọ evbare mẹ ni viọ gha khian, ọ na sẹ mwẹ rae ne I kpao.

Jerimaia 40:5 ပူးပေါင်းရင်းမြစ်များ

II Ọba 22:12

Ọ keghi tie Hilkaia ne ohẹn, Ahikam ne ovbi e Siafan, Akbọ ne ovbi e Mikaia kevbe Siafan ne akọwe ẹguae, kevbe Asaia ne odibo ọba, ọ tama iran wẹẹ,

II Ọba 22:14

Ẹre Hilkaia, Ahikam, Akbọ, Siafan kevbe Asaia na ya gualọ otọ ẹmwẹ na vbe obọ okhuo ọkpa ne a tie ẹre Hulda, akhasẹ nọ, ọ kegha rre vbe a la Jerusalẹm fo. (Ọdafẹn ọnrẹn ighẹ Sialọm ne ovbi e Tikva kevbe eyẹ Hahas, ọ re ọ gha gbearoghe ehe ne a viọ ukpọn ne a ya mu egbe vbe Ọgua Osa yi.) Iran keghi na iyẹn emwi ne ọ sunu ma rẹn.

II Krọnikol 34:20

ọ keghi tama avbe Hilkaia, kevbe Ahikam ne ovbi Siafan, Abdọn ne ovbi e Milkaia, e Siafan ne ọgbenbe ẹguae, kevbe Asaia ne odibo ọba wẹẹ:

Ẹzra 7:27

Ẹzra keghi kha wẹẹ, “Wa rho e Nọyaẹnmwa ne Osanobua avbe erha mwẹ odede. Ọ ru ẹe ne ọgbaisi ya ọghọ ne Ọgua Osa e Nọyaẹnmwa ne ọ rre Jerusalẹm vbenian.

Ẹzra 7:6

Ẹzra kegha re ọgbẹn ebe ne ọ wa rẹn ọnrẹn ẹsẹse ighẹ Uhi ne Nọyaẹnmwa ne Osanobua Izrẹl rhie ne Mosis. Rhunmwuda ne afiangbe Nọyaẹnmwa ne Osanobua ẹre na gha rre Ẹzra egbe, Nọgbaisi keghi wa viọ emwi hia ne ọ nọrẹn ne ẹẹn. Ọ ghi rre ukpo ihinrọn ne Atakzaziz la ẹkete, Ẹzra keghi viọ ivbi Izrẹl eso ba egbe ke Babilọn gha die Jerusalẹm, avbe ohẹn eso kevbe Livai, avbe ọsian Ọgua Osa, iran ni khẹ Ọgua Osa kevbe emwa ni winna eso kegha rre nene usun.

Nehimaia 1:11

Rhunmwuda ọnii họn erhunmwu mwẹ kevbe ọghe eguọmwadia ruẹ nekpa ni yọghọ ne uẹn. Rhie ọdunna mẹ ẹrẹna, nẹ u gie ọgbaisi tohan mwẹ.” Vbe ẹghẹ nii, mẹ ọrọre ne ọ sa ayọn ne ọgbaisi.

Job 22:29

Osanobua si ọmwa itengbemu gbe otọ ọ keghi miẹn ne ọ mu egbe rriotọ fan.

Itan 16:7

U gha ru vbene ọ yẹ Nọyaẹnmwa, u gha sẹtin ya avbe eghian ruẹn khian ọse.

Itan 21:1

Vbene ẹ i lọghọ e Nọyaẹnmwa vbe ọ gha ta ehe ne ẹzẹ gha lẹ la, erriọ ẹre ẹ i vbe lọghọ vbe ọ a gha dia ekhọe ọba ye odẹ.

Jerimaia 15:11

E Nọyaẹnmwa, adeghẹ ma ma ga uwẹ ẹse, gie ihẹn ne iran tie sẹ mwẹ egbe. I ma he do rinmwian an ne avbe eghian mwẹ ẹdẹ vbe iran rre uwu ibaro kevbe akhiẹ.

Jerimaia 26:24

Sokpan ne Ahikam ne ovbi e Siafan na gha rre esa ọghomwẹ, a ma mu mwẹ ne emwa nii ne iran gbe mwẹ uan.

Jerimaia 39:14

Na do rhie mwẹ ke uwu ẹguae ladian. Iran keghi rhie mwẹ ne ẹẹn gha gbearoghe ighe e Gedalaia ne ovbi Ahikam kevbe eyẹ e Siafan, ne a wa vbe tama wẹ ne ọ miẹn wẹ I sẹ owa vbe egbe hẹnnẹdẹn Ẹre I na ghi gu avbe emwa nii tota ye evba.

Jerimaia 40:4

Banbanna nian, I ra rhan ọgiọrọ hin ruẹn urhu abọ rre ne I fan an fua. A deghẹ u ho ne u lele mwẹ gha rrie Babilọn, u sẹtin ru vberriọ, I gha gbearoghe ruẹ. Sokpan, a deghẹ u i ho ne u gha khian, ai ra vbe gba ru ẹe. Otọe ẹvbo na hia rre evba ne u gha na zẹ, u sẹtin gha rrie ehe ne ọ yẹ ruẹ.”

Jerimaia 41:1

Vbe uki ne ogihinrọn ọghe ukpo nii, Ismaẹl ne ovbi e Natanaia kevbe eyẹ Elisiama, okpa vbe uniẹn ivbiọba, kevbe okpa vbe uwu avbe ekhaẹmwẹ nekhua ọghe ọba, keghi viọ arhingbe ba egbe ne iran ya miẹn e Gedalaia ne Nọkhaemwisẹ. Ehe ne iran hia na wa gha rri evbare nii.

Jerimaia 41:2

Ismaẹl kevbe arhingbe ni gu ẹe rre evba nii keghi yuolo umozo iran ladian, iran na gbe Gedalaia a.

Iwinna 27:3

Ẹdẹ ne ọ lele ẹe, ma keghi sẹ Saidọn. Juliọs keghi tohan Pọl, ọ na giee ya miẹn avbe esiọ re, ne iran miẹn ehe na we ehe ye ọre ẹkpo.

Iwinna 27:43

Sokpan ovbiyokuo ne ọ rre asẹ nii keghi ho ne irẹn sinmwi uhunmwu e Pọl, rhunmwuda ọnii, ọ ma gie iran ruẹe vberriọ. Ọ na ghi wẹ ne iran ni gua ra khuẹ vbọ sannọ fi ẹzẹ ne iran ka khuẹ gha rrie oke.

Iwinna 28:10

Iran keghi ya emwi ni bun ha oko gie ima. Ma ghi la okọ, iran keghi viọ emwi ne ọ gha sẹ ima lo vbe okhian ẹzẹ ni ye ima okọ.

Hibru 13:6

Rhunmwuda ọnii, wa gie ima din ne a kha wẹẹ, “Nọyaẹnmwa ọrọre ne ọ yọ mwẹ obọ, ohan ighi mu mwẹ. De emwi ne ọmwa gha sẹtin ru mwẹ re?”