Jerimaia 31:23 - Edo Bible (E Baibol Ẹdo) Version 1996

²³ E Nọyaẹnmwa ne Oghodua, ne Osanobua Izrẹl khare wẹẹ, “I gha dọlegbe viọ avbe emwa nii gha die otọ iran, iran gha ye do tae vbe otọ nii wẹẹ, “ ‘Te Nọyaẹnmwa gha fiangbe oke nọhuanrẹn ọghe Jerusalẹm ehe nọhuanrẹn ne irẹn dia.’

Jerimaia 31:23 ပူးပေါင်းရင်းမြစ်များ

Psalm 128:5

Te Nọyaẹnmwa gha fiangbe uẹ ke Zaiọn rre, te u gha miẹn umamwẹ Jerusalẹm vbe ẹdẹ agbọn ruẹn hia.

Psalm 129:8

Ai miẹn ọmwa ne ọ gha la evba gberra, ne ọ khama rẹn wẹẹ, “Te Nọyaẹnmwa gha fiangbe uẹ! Ma fiangbe uẹ vbe eni e Nọyaẹnmwa.”

Psalm 134:3

Te Nọyaẹnmwa ne ọ yi ẹrinmwi kevbe agbọn, gha fiangbe uẹ ke Zaiọn rre.

Psalm 28:9

Miẹn emwa ruẹn fan Nọyaẹnmwa ne u vbe fiangbe emwa ni re ọwuẹ. Gha re ọsuohuan iran, ne u vbe gha gbearoghe iran ẹdẹdẹmwẹdẹ.

Aizaia 1:21

Ẹvbo ne ọ te ka mwẹ uyinmwẹ ne ọ gbae yi, ọ re ọ ghi yin uyinmwẹ ohọhọ na, vbe ẹghẹ okpa emwa ẹmwata ọ re ọ wa gba re, sokpan, banbanna nian avbe izigha ọ re ọ ghi kẹe.

Aizaia 1:26

I gha viọ iran ni khaemwisẹ kevbe iran ni gu ọmwa zẹ iro ne uwa, vbene uwa te ka mwẹ ọnrẹn ẹghẹ nẹdẹ. Ẹghẹ nii, a ghi do gha tie Jerusalẹm, ẹvbo ne uyinmwẹ ọnrẹn gbae ke ne ọ ru emwi ẹmwata.”

Aizaia 11:9

A i ra miẹn emwi dan okpa ra emwi ne ọ kuan ọmwa egbe vbe Zaiọn, ne oke nọhuanrẹn ọghe Osanobua. A rẹn e Nọyaẹnmwa gha vuọn otọe nii zẹ vbene amẹ vuọn okun.

Aizaia 32:16

Ohiẹn ẹmwata kevbe uhunmwu ẹmwẹ ghi do khian ne a ta vbe otọe nii.

Aizaia 33:5

U miẹn vbene Nọyaẹnmwa kpọlọ hẹ. Rẹn ọ re ọ khaemwisẹ yan emwi hia. Ọ gha ya ohiẹn ẹmwata kevbe ekhọe ne ọ maa vuọn Jerusalẹm.

Aizaia 60:21

Emwa ruẹn hia gha ru emwi ne ọ kere iran gha vbe yan otọe nii ẹdẹdẹmwẹdẹ. Mẹ ọ re ọ kọ iran, mẹ ọ re ọ yi iran ne I ya rhie ukpọlọmwẹ mwẹ ma ehia.

Jerimaia 29:14

Ẹn, erriọ I tae wẹ wa gha gualọ mwẹ miẹn. Mẹ ghi viọ uwa ya ye ihe vbe otọe uwa. I gha si uwa koko ke dọmwadẹ ẹvbo, kevbe dọmwadẹ ehe ne I zagha uwa gha rrie, I ghi viọ uwa gha die otọe nii ne I ke viọ uwa kpao gha rrie iwe. Mẹ ne Nọyaẹnmwa tae nẹ.’

Jerimaia 30:18

E Nọyaẹnmwa khare wẹẹ, “I gha viọ emwa mwẹ werriegbe rri otọ iran I gha vbe mwẹ itohan ghe dọmwadẹ ẹgbẹe, a gha dọlegbe họ Jerusalẹm, a ghi rhie ẹguae ẹre dọlegbe ye ihe.

Jerimaia 32:44

Emwa gha dẹlẹ ọe, a ghi vbe gbẹnnẹ ebe, a ghi gha rhie obọ yọ, a ghi vbe gha ru osẹe yọ. Ena hia gha sunu vbe otọe e Bẹnjamin, vbe avbe igue ni lẹga e Jerusalẹm, avbe okpẹvbo e Juda, avbe okpẹvbo ni rre avbe ẹvbo uhunmwu oke, ni rre odẹ ototọ oke, kevbe odẹ ekẹn e Juda. I gha dọlegbe viọ avbe emwa na gha rrie ẹvbo iran. Mẹ ne Nọyaẹnmwa tae nẹ.”

Jerimaia 50:7

A vba gbe ọ re iran ghi khin, avbe eghian iran khare wẹẹ, ‘Iran sẹ ẹmwẹ e Nọyaẹnmwa nẹ, rhunmwuda ọnii, ma ma ru a ghẹ i ru. E Nọyaẹnmwa ọ re avbe erha iran odede mu ẹtin yan, te ọ te kei ne iran vbe rhie ekhọe lele ẹe.’

Obedaia 1:17

“Sokpan, eso gha lẹ fe vbe Oke Zaiọn ọ ghi gha re ehe nọhuanrẹn. Ivbi uniẹn e Jekọb gha dọlegbe yan otọe ne ọ re ọghe obọ iran.

Maika 4:1

Ẹdẹ dee ne a gha miẹn wẹ oke nii ne a bọ Ọgua Osa yi ọ re ọ ra yo sẹ ehia fẹẹrẹ, ọ ghi gha ghee ni dekẹe adesẹ uhunmwu. Agbọn ẹvbo nibun gha rre, iran ghi gha vẹ bu ẹre rre.

Zẹkaraia 8:3

I gha dọlegbe gha die Jerusalẹm ne ẹvbo mwẹ nọhuanrẹn ne I do yin ẹnrẹn. A gha rẹn ọnrẹn ye ẹvbo ne ọ mudia ẹse, a ghi vbe gha tie oke Nọyaẹnmwa ne Oghodua oke nọhuanrẹn.

Ebe Rut 2:4

E Boaz tobọ ẹre keghi ke Bẹtlẹhẹm rre, “Ọ keghi tue emwa iwinna wẹ Nọyaẹnmwa deba uwa.” Iran keghi wanniẹn wẹẹ, “Nọyaẹnmwa fiangbe uwẹ.”