Jerimaia 30:17 - Edo Bible (E Baibol Ẹdo) Version 1996

¹⁷ I gha ru ẹe ne egbe rran uwa, I gha kpe uwa ẹwẹn rrie, avbe eghian uwa gha rhe gha kha wẹẹ, ‘Evbahe ọ re Zaiọn khin; a i miẹn ọmwa ne ọ zẹye ọre re.’ Mẹ ne Nọyaẹnmwa tae nẹ.”

Jerimaia 30:17 ပူးပေါင်းရင်းမြစ်များ

Job 5:18

Osanobua ọ re ọ vbe gba ẹwẹn ne irẹn fiaẹn. Obọ ẹre gha kuan ruẹn, obọ ẹre ọ vbe sinmwi uẹn.

Psalm 103:3

Ọ ya orukhọ mwẹ hia bọ mwẹ, ọ vbe mu mwẹ egbe rran hin emianmwẹ hia.

Psalm 107:20

Ọ kha ẹmwẹ ya mu iran egbe rran, ọ keghi sinmwi iran hin idin rre.

Psalm 12:5

Sokpan, e Nọyaẹnmwa khare wẹẹ, “Eban nian, mẹ dee, rhunmwuda, a zẹ iran ne ẹi mwẹ kpokpo. Iran ne a zẹ kpokpo gha viẹ eve obalọ. I gha do ru ẹe ne ẹkun sẹ iran otọ, ne egbe rọkhọ iran zẹ vbe ne iran ho.”

Psalm 142:4

I gha ghe lẹga egbe mwẹ, I ghi miẹn wẹ, ọmwa ne ọ gha yọmwẹ obọ i rrọọ, ọmwa rhọkpa i zẹ yọmwẹ re.

Psalm 23:3

Ọ fu ekhọe mwẹ egbe rre ọ su mwẹ vbe odẹ ẹmwata, rhunmwuda eni ẹnrẹn.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Aizaia 11:12

E Nọyaẹnmwa gha tọn afiala ama mu ne ọ ya rhie ma avbe uhunmwu ẹvbo wẹẹ te irẹn ra dọlegbe si iran koko ighe avbe ivbi Izrẹl kevbe Juda, kevbe wẹ te irẹn viọ iran ke igienenẹ otọ agbọn dee.

Aizaia 30:26

Uki ghi gha baa vbe owẹn, owẹn ghi rhie ukhukhu ihinrọn ba egbe vbene ọ ya yunmwu de yi, vbene a miẹn wẹ ne ọ gha te yunmwu vbe ikpẹdẹ ihinrọn ọ re ọ ghi wa rhie ye ikpẹdẹ okpa kẹkan. Ọna gha sunu, vbe ẹghẹ ne Nọyaẹnmwa gha na gbalọ, ọ ghi kpee rrie ighe ẹwẹn ne ọ te fian emwa rẹn re.

Aizaia 33:24

A i ghi vbe miẹn orhiọnkpa vbe ẹvbo ima ne ọ gha kha wẹ rẹn khuọnmwi, a gha vbe ya orukhọ hia bọ ọmwa.

Aizaia 54:6

Izrẹl te u ye vbe okhuo ọvbokhan ne ọdọ lẹẹ sẹ rae ekhọe ẹre na rhiaa ẹsẹse. Sokpan, e Nọyaẹnmwa dọlegbe tie ruẹ rriegbe ọ na kha wẹẹ,

Aizaia 56:8

E Nọyaẹnmwa ne Udazi, ne ọ viọ Izrẹl ne emwa rẹn ke iwe gha dee, yan nẹ wẹ rẹn gha ye viọ emwa ọvbehe eso rre do deba iran.

Aizaia 57:18

“I miẹn vbene iran ru hẹ nẹ, sokpan, I gha mu iran egbe rran, I gha su iran gha khian I ghi ru iyobọ ne iran, I gha vbe fu iran ni khiẹ ẹko rre.

Aizaia 57:19

I ya ọfumwegbe ne iran hia, ke iran ni sikẹ emwa na kevbe iran ni rre urria. I gha mu avbe emwa mwẹ egbe rran.

Aizaia 58:8

“Ẹghẹ nii, aro ne ọ maa mwẹ ghi gha wan mu uwa egbe zẹ vbe owẹn owiẹ, ẹwẹn uwa ghi vbe rherhe rrie. Mẹ gha gu uwa gha rrọọ ẹghẹ hia ne I miẹn uwa fan, aro mwẹ ghi degue uwa vbe igie-nenẹ.

Aizaia 60:15

“A i ghi ra he uwẹ yotọ ra ne a gha khu iwu ruẹ, ẹvbo ne a na lẹkua, ne ọ dihoi rua, I gha ya a khian nọkhua kevbe ne ọ mose ehe oghọghọ ẹdẹ kevbe ẹdẹdẹmwẹdẹ.

Jerimaia 10:20

Owa ukpọn mwa rhiae, irri ne ọ da ẹe yi giagiae. Ivbi mwa hia kpao. Emwa ne ọ ghaghi mu owa ukpọn mwa kpaegbe i ghi rrọọ, ọmwa i ghi rrọ ne ọ gha tan ukpọn onurho ẹre.”

Jerimaia 17:14

Nọyaẹnmwa, mu mwẹ egbe rran, egbe gha wa rran mwẹ giẹnrẹn; yuo mwẹ ladian, I gha vbe fe vbe obọ ẹbe fẹẹrẹ, wẹ ọrọre ọmwa ne imẹ rho vbe uyi!

Jerimaia 3:22

Wa werriegbe rre, wa hia ni fi iyeke gbe Nọyaẹnmwa ọ gha mu uwa egbe rran, ọ ghi ru ee ne uwa do gha re ne ọ mudia ẹse.

Jerimaia 30:13

A i miẹn ọmwa ne ọ ra gbearoghe uwa, ukhunmwu ne a ra ya ye uwa ẹtẹ i rrọọ, idaehọ i rrọ ighe a gha sẹtin sinmwi uwa.

Jerimaia 33:24

“U ma miẹn vbene emwa tae khian hẹ wẹ mẹ he Izrẹl kevbe Juda yotọ nẹ, ẹgbẹe eva ne imẹ hannọ zẹ. Iran keghi rhunmwuda ọnii, gha ye aro gbe emwa mwẹ re, iran i ghi vbe ka iran ye uhunmwu ẹvbo.

Jerimaia 33:6

Sokpan, I gha mu ẹvbo na egbe rran, kevbe emwa ni rrọọ, I ghi gie egbe rran iran. I gha rhie ọfumwegbe nọkhua kevbe ẹkun ne ọ sotọ ẹsẹse ne iran.

Jerimaia 8:22

Ukhunmwu ighi rre Giliad ra? Avbe ọbo i ghi rre evba ra? Vbọ ghi zẹ ne a ma na ye mu avbe emwa mwẹ egbe rran khekherriọ?

Eve Orriara 2:15

Emwa ni la ore ẹvbo nii gberra ghi gha ghe ruẹ sọnnọsọnnọ iran ghi fieghe uhunmwu iran ghi gha giẹ udemwẹ e Jerusalẹm wẹẹ, “Ẹvbo olose nii ọna gele khin ra? Emwi ne otagbọn hia ya ghan ọna khin ra?”

Ezikiẹl 34:16

“I gha gualọ ni wiri vbọ, I ghi viọ iran ni bibi odẹ vbọ werriegbe rre, I gha gbalọ ẹwẹn iran ni kuan egbe vbọ, I ghi vbe sinmwi iran ni khuọnmwi, sokpan, I gha fuẹn ni ti ye egbe kevbe ni wegbe vbọ hin rre, rhunmwuda, ọsuohuan ne ọ ru emwi ne ọ gbae mẹ khin.

Ezikiẹl 35:12

Ẹghẹ nii wẹ gha na rẹn wẹ I họn ọẹn vbe u ye a i zama ọmwa tae wẹ avbe oke Izrẹl dihoi rua nẹ kevbe wẹ te obọ ruẹ vba ẹre nian ne u rhie gbe re.

Ezikiẹl 36:20

Ehe ne iran a rhirhi yo, iran kegha fa eni mwẹ nọhuanrẹn uan, rhunmwuda, emwa ghi gha kha wẹẹ, ‘Iran si kpao vbe otọe ne Osanobua iran mu ne iran.’

Hozia 11:3

Vberriọ, mẹ ọ re ọ ma Izrẹl okhian I mu emwa mwẹ vbe ekuabọ, sokpan, iran ma miẹnkue ighe mẹ ọ re ọ gbearoghe iran.

Hozia 6:1

Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ?

Malakai 4:2

Wa ghi gha re ne ẹ i mwẹ idobo, ẹko ghi vbe gha sẹ uwa ọyẹnmwẹ zẹ vbe ivbi ẹmila ne a viọ ke uwu ogba ladian.

I Pita 2:24

Kristi tobọ ẹre, ọre ọ ye egbe miẹn orukhọ mwa, ọ keghi ye egbe ẹre muẹn gha rrie ugbugbe, ne ima miẹn ehe na wulo hin orukhọ rre, ne a miẹn ehe na gha yin uyinmwẹ ẹmwata. Ẹwẹn ọghọe, ọre a ya mu uwa egbe rran.

Arhie Maan 22:2

Ọ keghi lẹ la adesẹneva ukpo ọghe ẹvbo ni. Vbe obọ eva ọghe ẹzẹ nii, erhan ẹfe keghi rrọọ, igba iweva ọre ọ mọ vbe ukpo, uhukpukpa vbe uki, ebe ẹre keghi re ne a ya mu agbọn ẹvbo egbe rran.