Jerimaia 30:13 - Edo Bible (E Baibol Ẹdo) Version 1996

¹³ A i miẹn ọmwa ne ọ ra gbearoghe uwa, ukhunmwu ne a ra ya ye uwa ẹtẹ i rrọọ, idaehọ i rrọ ighe a gha sẹtin sinmwi uwa.

Jerimaia 30:13 ပူးပေါင်းရင်းမြစ်များ

Job 34:29

Osanobua gha kha ighẹ rẹn i zẹdẹ guan yọ, ọmwa ne ọ ra nọ rẹn ẹ i rrọọ. Ọ gha rhie aro ẹre lẹre, ọghe emwa nagbọn fo.

Job 5:18

Osanobua ọ re ọ vbe gba ẹwẹn ne irẹn fiaẹn. Obọ ẹre gha kuan ruẹn, obọ ẹre ọ vbe sinmwi uẹn.

Psalm 106:23

Ugbẹn vbe Osanobua khare ighe rẹn ra fuẹn emwa irẹn uan, e Mosis ne ọguọmwadia ẹre ne ọ hannọ zẹ keghi degbe Osanobua odẹ ọ ma gie ohu ẹre fuẹn iran an.

Psalm 142:4

I gha ghe lẹga egbe mwẹ, I ghi miẹn wẹ, ọmwa ne ọ gha yọmwẹ obọ i rrọọ, ọmwa rhọkpa i zẹ yọmwẹ re.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Aizaia 1:6

Wa ke adesẹ uhunmwu ya sẹ owẹ, ihọkpa ne ọ gbae i ghi rre egbe uwa. Ẹwẹn ivbi ẹtẹ kevbe okobẹtẹ gba uwa egbe hia. A ma kpe uwa ẹwẹn ra ne a gbalọe. A ma rhie ukhunmwu ye rhọkpa.

Aizaia 59:16

Ọ yan irẹn unu uan wẹ a i miẹn ne ọ yi ọmwa ne a wọ ẹre uhunmwu obọ. Rhunmwuda ọnii, ọ gha lo ẹtin ọghọe ne ọ ya miẹn iran fan kevbe ne ọ khọn miotọ.

Jerimaia 14:19

E Nọyaẹnmwa, te uwẹ wa he Juda fo fẹẹrẹ ra? Te uwẹ mu ohu emwa ni rre Zaiọn ra? Vbọzẹ ne u na mu ohu ima sẹ vberriọ yi ne a na miẹn wẹ, a i ghi sẹtin mu ima egbe rran? Ma rhie aro ye ọfumwegbe sokpan, emwi ọma rhọkpa ma sunu, ma rhie aro ye amu ọmwa egbe rran, sokpan, emwi ugborrirri ọ re ọ rre.

Jerimaia 17:14

Nọyaẹnmwa, mu mwẹ egbe rran, egbe gha wa rran mwẹ giẹnrẹn; yuo mwẹ ladian, I gha vbe fe vbe obọ ẹbe fẹẹrẹ, wẹ ọrọre ọmwa ne imẹ rho vbe uyi!

Jerimaia 30:17

I gha ru ẹe ne egbe rran uwa, I gha kpe uwa ẹwẹn rrie, avbe eghian uwa gha rhe gha kha wẹẹ, ‘Evbahe ọ re Zaiọn khin; a i miẹn ọmwa ne ọ zẹye ọre re.’ Mẹ ne Nọyaẹnmwa tae nẹ.”

Jerimaia 33:6

Sokpan, I gha mu ẹvbo na egbe rran, kevbe emwa ni rrọọ, I ghi gie egbe rran iran. I gha rhie ọfumwegbe nọkhua kevbe ẹkun ne ọ sotọ ẹsẹse ne iran.

Jerimaia 46:11

Ivbi Igipt, wa gha rrie Giliad ne uwa ya gualọ ukhunmwu, ukhunmwu uwa rhọkpa i ghi sẹ, emwi ne ọ gha sẹtin sinmwi uwa i ghi rrọọ.

Jerimaia 6:7

Zẹ vbene uhae ya amẹ ọnrẹn ru ọgbọngbọn, erriọ ọ re Jerusalẹm ye orukhọ ẹre ru ọgbọngbọn. I họn ẹmwẹ ọkhọ ọfuan vbe ore ẹvbo nii. Emianmwẹ kevbe ẹwẹn okpa ọ re I bẹghe vbọ.

Jerimaia 8:22

Ukhunmwu ighi rre Giliad ra? Avbe ọbo i ghi rre evba ra? Vbọ ghi zẹ ne a ma na ye mu avbe emwa mwẹ egbe rran khekherriọ?

Eve Orriara 2:13

Eu, e Jerusalẹm, ẹvbo ne a ho ẹmwẹ ọnrẹn, e Jerusalẹm, vbe i a ghi ra miẹn ta? Vbe i a ra ya fu ruẹ ẹko rre hẹ? A ma miẹn ọmwa ne ọ he rri egbe oya ne uwẹ re na ẹdẹ. Ọkhọ ne ọ rruan ruẹn yevbe okun ne ẹ i mwẹ okhiẹ, idaehọ ighi zẹdẹ rrọ hiehiere.

Ezikiẹl 22:30

I gualọ ọmwa ne ọ gha sẹtin gbe ekẹn, iran ni gha sẹtin mudia ye ehe ne ekẹn na de, ne ọ gbinna ne ẹvbo nii vbe ohu mwẹ a ra fuẹn ọnrẹn uan sokpan, I ma miẹn ọmwa rhọkpa Rhunmwuda ọnii, I hihiẹ ohu mwẹ yan iran,

Ezikiẹl 30:21

“Ovbi ọmwa, I bun ọba Igipt obọ nẹ. a ma miẹn ọmwa ne ọ gba ẹe ra ne ọ ya irri daeyi ne ọ miẹn ehe na rrie, ne ọ miẹn ehe na vbe wegbe sẹ ne ọ gha dọlegbe mu umozo.

Hozia 14:4

E Nọyaẹnmwa khare wẹẹ, “I gha dọlegbe si emwa mwẹ kẹ egbe. I gha ya ekhọe mwẹ hia hoẹmwẹ iran, ohu iran i ghi mu mwẹ ọvbehe.

Hozia 6:1

Emwa ni khare wẹẹ, “Wa gie ima werriegbe bu e Nọyaẹnmwa. Ọ ru ima emwi nẹ, sokpan ẹ i mwẹ ọ ma mu ima egbe rran, ọ kuan ima nẹ, sokpan ọ gha gbalọ ima ẹwẹn ra u ma ro vberriọ?

Nahum 3:19

Ẹwẹn ruẹn i mwẹ ukhunmwu, a i vbe sẹtin kpe ẹwẹn ruẹn ne ọ rrie. Emwa hia ni họẹn ighe a fuẹn ruẹn uan, gha kpe obọ ne oghọghọ, ọmwa ne uyinmwẹ ekhọe dan ruẹn ne ẹ i fo la ban rrọ ra?

Diuteronomi 32:39

“ ‘Mẹ, mẹ ọkpa kẹkan ọrọre Osanobua, Osanobua ẹmwata ọvbehe i ghi rrọọ. I gbe; I vbe huẹn, I fian ẹwẹn, I vbe kpe ẹwẹn rrie, ne ọ gha sẹtin gbe odan ye emwi ne I ru, ẹ i rrọọ.

I Pita 2:24

Kristi tobọ ẹre, ọre ọ ye egbe miẹn orukhọ mwa, ọ keghi ye egbe ẹre muẹn gha rrie ugbugbe, ne ima miẹn ehe na wulo hin orukhọ rre, ne a miẹn ehe na gha yin uyinmwẹ ẹmwata. Ẹwẹn ọghọe, ọre a ya mu uwa egbe rran.

I Jọn 2:1

Ivbi mwẹ, te I gbẹn ebe na gie uwa ne uwa ghẹ miẹn ehe na rukhọ, sokpan, a deghẹ ọmwaikọmwa ghi vbe ru orukhọ, ma mwẹ ọmwa ne ọ rinmwian ne ima vbe ehe ne Evbavba ye, ọnii ọre Jesu Kristi ne ọmwata.