Jerimaia 29:8 - Edo Bible (E Baibol Ẹdo) Version 1996

⁸ Mẹ ne Nọyaẹnmwa ne Osanobua Izrẹl tama uwa nian, ne uwa ghẹ gie iran rẹrẹ uwa ighẹ avbe akhasẹ ni rre ehe ne uwa ye, fa avbe iran ni kha ighẹ iran gha sẹtin ta emwi ne ọ gha sunu akhuẹ ma ọmwa. Wa ghẹ vbe zẹdẹ danmwehọ imina ne iran wẹ iran mina.

Jerimaia 29:8 ပူးပေါင်းရင်းမြစ်များ

Jerimaia 14:14

Sokpan, e Nọyaẹnmwa ke wanniẹn wẹẹ, “Te avbe akhasẹ nii ta ohoghe vbe eni mwẹ, I ma gie iran, ama ghi wẹ ne I tama iran wẹ ne iran ta ẹmwẹ okpa ma iran. Umian ne iran kha nii ẹ i re ehe ne I ye ọ re iran ke rre, emwi ne ọ mwa ma ne iran zẹ iro ẹre vbe ekhọe iran, ọ re ẹmwẹ ne iran ta yotọ khin.

Jerimaia 23:16

E Nọyaẹnmwa ne Oghodua tama ivbi e Jerusalẹm, “Wa ghẹ danmwehọ ẹmwẹ ne avbe akhasẹ ta, idaehọ ohoghe ọre iran ya koko uwa. Emwi ne ọrre iran ekhọe ọre iran tama uwa, ẹ i re ẹmwẹ ne imẹ tae.

Jerimaia 23:21

E Nọyaẹnmwa khare wẹẹ, “I ma gie avbe akhasẹ na, sevba, iran keghi ye gha khian, I ma zẹdẹ gie iran uhunmwu sokpan, iran ke ya gha ya eni mwẹ guan.

Jerimaia 23:25

I rẹn vbene iran kha hẹ ighe avbe akhasẹ nii, iran ni ya eni mwẹ ta ohoghe iran ghi do kha wẹ mẹ ọ re ọ gie iran uhunmwu vbe imina.

Jerimaia 23:27

“Iran ro wẹ imina ne iran ta gha ya mwẹ mianmian zẹ vbene avbe erha iran mianmian mwẹ, iran na lele Baal.

Jerimaia 27:9

Wa ghẹ zẹ ye avbe akhasẹ uwa ẹre, ra ọmwaikọmwa ne ọ wẹ rẹn sẹtin rẹn emwi ne ọ gha sunu akhuẹ yotọ vbekpa imina na nọ ra vbekpa ne iran tie orhiọn ọmwa ne ọ wu ke idin ladian ra vbekpa ẹbo awan. Ehia gha tama uwa wẹ ne uwa ghẹ zẹ ye ọba e Babilọn re.

Jerimaia 28:15

Mẹ keghi talọ avbe ẹmwẹ na ma e Hananaia, I keghi vbe rhie te ẹe wẹẹ, “Danmwehọ e Hananaia! E Nọyaẹnmwa ma zẹdẹ gie uẹ, te u ru ẹe ne iran na gha ya ohoghe yi.

Jerimaia 29:1

I keghi gbẹn ebe gie avbe ohẹn avbe akhasẹ avbe ọkaolotu emwa nii, kevbe avbe emwa ọvbehe hia ne Nebukiadneza viọ ẹre oghunmwu ke Jerusalẹm kpao gha rrie Babilọn.

Jerimaia 29:15

“Wa khare wẹ, e Nọyaẹnmwa viọ avbe akhasẹ ne uwa vbe Babilọn.

Jerimaia 29:21

“E Nọyaẹnmwa ne Oghodua, Osanobua Izrẹl guaan nẹ, vbekpa Ehab ne ovbi Kolaia kevbe Zedekaia ne ovbi e Manasẹ emwa ni ya eni ẹnrẹn ta ohoghe ma uwa. Ọ khare wẹ rẹn gha viọ iran ye obọ ẹtin e Nebukiadneza ọba ọghe Babilọn, ọmwa ne ọ gha sirra uwa gbele iran an.

Jerimaia 29:23

Emwi ne ọ ra rruan iran ọ re ọnii khin rhunmwuda, iran ru orukhọ ne ọ mu ọmwa ohan, iran rhie amwẹ ẹrrẹe, iran kevbe ye eni e Nọyaẹnmwa ta ohoghe. Emwi ne Nọyaẹnmwa i zẹdẹ ho ọ re ọna khin, ọ rẹn emwi ne iran ru, rẹn ọ re ọ vbe re ne ọ ra sẹ osẹe gbe iran. E Nọyaẹnmwa tae nẹ.’ ”

Jerimaia 37:9

Mẹ ne Nọyaẹnmwa ọ re ọ tama uwa nian ne uwa ghẹ ya gha rẹrẹ egbe uwa, ne uwa gha ro ighe avbe ivbi e Babilọn i ghi dọlegbe dee rhunmwuda, iran gha rre.

Jerimaia 5:31

Avbe akhasẹ i ta ẹmwẹ ọvbehe gberra ohoghe, vbene avbe akhasẹ khare ọ re avbe ohẹn ya khaemwisẹ yan emwa, emwa mwẹ i vbe wẹ hẹn. Sokpan, ena hia ghẹ ghi fo nia, vbe iran gha ru hẹ?”

Eve Orriara 2:14

Avbe akhasẹ, ruẹ i miẹn ẹmwẹ tama ruẹn gberra ohoghe, orhu ne iran kpe keghi de ruẹ odẹ rhunmwuda, iran ma vẹ orukhọ ruẹ uhe ua iran keghi ya uwẹ gha ro ighe orukhọ ne u gha rhunmwuda ẹre fiwerriẹ, irrọ.

Ezikiẹl 13:6

Imamase ọ re umian iran khin, ohoghe ọ re ẹmwẹ ne iran guan yotọ vbe khin. Iran ghi kha wẹ uhunmwu ne I gie ọ re iran ta, vberriọ, I ma zẹdẹ gie iran. Iran ghi ye vbe gha kha wẹ ẹmwẹ iran gha sẹ!

Maika 2:11

“Egbe akhasẹ ne iran na ho ọrọre ne ọ talọ ohoghe kevbe ne ọ rẹrẹ emwa, ne ọ vbe kha wẹẹ, ‘I ta ẹe zẹ vbe akhasẹ wẹ ayọn kevbe emwi ne a da gha kpọkua ne uwa!’

Zẹkaraia 13:4

Ọ gha sẹ ẹghẹ nii, akhasẹ ne ọ gha ye ẹmwẹ umian ẹnrẹn gha hio i rrọọ ra na ọ gha ru emwi akhasẹ ra ne ọ silo iba ukpọn ye egbe ya gha mu emwa ru.

Matiu 24:24

Rhunmwuda, avbe akhasẹ kevbe Mẹzaia ohoghe gha rre. Iran gha winna iwinna ama kevbe iwinna ọyunnuan ni bun ne iran ya rẹrẹ emwa ne Osanobua hannọ zẹ re deghẹ ẹtin iran sọe.

Iyẹn ne ọ Maan Ọghe Luk 21:8

Jesu wanniẹn wẹẹ, “Wa gha ba egbe, wa ghẹ gie ọmwarhọkpa do uwa ọgboi rua. Rhunmwuda emwa ni bun ọre ọ gha rre vbe eni mwẹ do kha wẹẹ, ‘Mẹ nọ’ kevbe wẹ ‘Ẹghẹ sẹ nẹ!’ Sokpan wa ghẹ lele iran.

Iyẹn ne ọ Maan Ọghe Luk 6:26

“Ọ sẹ uwa vbe emwa hia gha tian uwa, rhunmwuda erriọ avbe erha iran ka vbe tian avbe akhasẹ ohoghe.

Ebe ne Pọl gbẹẹn gie emwa Rom 16:18

Rhunmwuda iran ni ru emwi vbe nian, ẹ i re Kristi Nọyaẹnmwa ọre iran ga, gberra evbare ne ọ khọn iran. Iran ghi ya ẹmwẹ ne ọ rhiẹnrhiẹn kevbe aranmwẹ erẹrẹ iran gha ye iran ni ma rẹn ọkpa ọ ma rẹn eva de odẹ.

Ẹfisọs 4:14

Ẹghẹ nii, ma i ghi ra gha re emọ obọ ne ulẹmwẹ ẹzẹ mu yo mu rre, kevbe ne ẹhoho ẹziza, ọghe iruẹmwi emwa erẹrẹ, bi yo bi rre, emwa ni ya ero ne ọ ke ẹko iran zọ rre de emwa ọvbehe odẹ.

Ẹfisọs 5:6

Wa ghẹ gie ọmwa rhọkpa ya ẹmwẹ ọzuọ mu uwa rẹrẹ, usun emwi ne ọ si ẹe ne izohu Osanobua gha na rhurhẹ yan iran ne ẹ i họn ẹmwẹ nẹẹn, ọre ena khin.

II Tẹsalonaika 2:3

Wa ghẹ gie ọmwa rhọkpa la odẹikodẹ do uwa ọzuọ. Rhunmwuda Ẹdẹ ni i khian rre vbe ẹ i re te Isọtẹ ne okiekie sunu nẹ, ne Ọmwa Dan nii ya egbe ladian, ọmwa ne a khare ighẹ ẹrinmwi erhẹn ọrọre ọghọe.

II Timoti 3:13

Sokpan avbe emwa dan kevbe ayunukpaegbe ghi gha rhia yọ rhia yọ, iran ghi gha mu emwa ọvbehe rẹrẹ, a ghi vbe gha mu iran tobọ iran rẹrẹ.

I Jọn 4:1

Wa ne ọse mwẹ ni ghaan, wa ghẹ gha ya iran hia ni kha ighẹ iran mwẹ nene Orhiọn yi, sokpan wa ghi ka danmwẹ ọẹn ghe nẹ ne uwa miẹn ehe na rẹn a deghẹ obọ Osanobua ọre nene orhiọn ne iran mwẹ ke rre. Rhunmwuda avbe akhasẹ ohoghe ni bun wa vẹ gba ehe hia.

Arhie Maan 13:14

Ọ keghi ye iwinna ọyunnuan ne a rhie ẹghẹ nẹẹn ya winna mu emwa hia ni rre agbọn rẹrẹ vbe sirra aranmwẹ oha ne okaro nii. Aranmwẹ oha na keghi wẹ ne emwa ne agbọn hia ma amazẹ ọkpa ne a ya ya ọghọ nẹẹn ighẹ aranmwẹ oha nii ne a ya umozo kuan rẹn egbe ne ọ ma wu.

Arhie Maan 19:20

A keghi mu aranmwẹ oha nii oghunmwu ke ẹe kevbe akhasẹ ohoghe nii ne ọ winna iwinna ọyunnuan vbe odaro ẹre. (Ama ọyunnuan nii ọre ọ ya rẹrẹ iran re ighẹ iran ni vin ama aranmwẹ oha ni ye egbe, ne iran na vbe gha ye uhunmwu rhanmwẹ otọ ne amazẹ ọre.) Aranmwẹ oha nii ke ẹe kevbe akhasẹ ohoghe nii, a keghi munọ iran ke ẹmwẹ ne unu fi lo ku uwu odighi erhẹn ne ọ giẹn emwi ne ọ ye vbe ugbofi ladian.