Jerimaia 29:13 - Edo Bible (E Baibol Ẹdo) Version 1996

¹³ Wa gha gualọ mwẹ, wa ghi vbe miẹn mwẹ. Wa gha miẹn mwẹ rhunmwuda, wa gha ye ekhọe hia gualọ mwẹ.

Jerimaia 29:13 ပူးပေါင်းရင်းမြစ်များ

I Ọba 2:4

U gha ru vberriọ, e Nọyaẹnmwa gha mu eyan ne ọ yan rẹn sẹ vbe ọ tama mwẹ wẹẹ: ‘Ivbi uẹ ọ re ọ ra rriọba yan Izrẹl vbe ẹghẹ hia, zẹ vbe ne iran vbe ya mu aro yọ ne iran ye ekhọekekhọe gha mu uhi mwẹ sẹ.’

II Ọba 23:3

Rẹn keghi mudia ye ọkpẹn orrẹ ọba, ọ na gu e Nọyaẹnmwa ta ile wẹ rẹn gha họn ẹmwẹ ne ẹẹn, kevbe ne ọ ya orhiọn kevbe ekhọe ẹre hia gha rhie uhi kevbe iyi ẹre mwẹ, kevbe ne ọ vbe gha ru zẹ vbe ne a mwamwa emwi ye otọ vbe uwu ile ne a gbẹnnẹ ye ebe ni. Emwa nii hia keghi yan wẹ iran gha rhie ile ni ya gha yin.

I Krọnikol 22:19

Banbanna nian, wa ya ẹtin uwa kevbe orhiọn uwa hia ga e Nọyaẹnmwa. Wa suẹn gha bọ Ọgua Osa ne uwa miẹn ehe na mu Ẹkpẹti Ile ọghe Nọyaẹnmwa ye uwu ẹre deba avbe emwi nihuanrẹn ni dekẹe hia ne a ya ga ẹe.”

I Krọnikol 28:9

Rẹn keghi tama Solomọn wẹẹ, “Ovbi mwẹ, I yan tama ruẹn nian ne u rhan obọ miẹn Osanobua erha a, ne u gha ya ekhọe ẹmwata ga ẹe kevbe orhiọn ne ọ ho. Ọ rẹn iziro ekhọe mwa kevbe emwi ne ima gualọ. A dẹghe u bu ẹre gha khian, ọ gha miẹn ruẹn yi, sokpan a dẹghe u fi iyeke gbẹe, ọ gha suẹ rae rhinrin ẹdẹ.

II Krọnikol 22:9

A na gualọ Ahazaia, a keghi miẹn ọẹn vbe ọ lẹre vbe Sameria. Iran keghi mu ẹẹn gie Jehu, ọ na gbe ẹe rua. Sokpan, iran re orinmwi ẹnrẹn rhunmwuda erha ẹe nọkhua ighẹ Jehosiafat, ne ọ wa lo ẹtin ẹnrẹn hia ya ga e Nọyaẹnmwa. A ma ghi zẹdẹ sẹ orhiọnkpa ne ọ gha sẹtin rriọba yan otọe nii rae vbe ẹgbẹe Ahazaia.

II Krọnikol 31:21

Emwi kegha dinnodẹ ne ẹẹn rhunmwuda emwi hia ne ọ ru ne Ọgua Osa ne zẹ vbene uhi khare, orhiọn ẹmwata kevbe ekhọe ne ọ mudia ẹse vbe odaro Osanobua ẹre ọ ya gha ru ẹe.

Psalm 119:10

Mẹ hia ne I ye ekhọe mwẹ hia gha ga a; ghẹ gun mwẹ de iyi ruẹ.

Psalm 119:145

Ekhọe mwẹ hia ọ re I ya kpe tie ruẹ, Nọyaẹnmwa, zẹ ẹmwẹ wanniẹn mwẹ, mẹ gha rhie iyi ruẹ mwẹ.

Psalm 119:2

Afiangbe ọrọre ọghe iran ni lele iyi ẹre ni họn ẹmwẹ ne ẹẹn kekhọekekhọe.

Psalm 119:58

Ekhọekekhọe mwẹ hia ọ re I ya rinmwian an, wẹ ne u tohan mwẹ, zẹ vbene u yan rẹn!

Psalm 119:69

Iran ni tọn egbe mu ba mwẹ ohoghe, sokpan, ekhọekekhọe mwẹ hia, ọ re I ya ru vbene u khare.

Psalm 145:18

Ọ sikẹ iran ni kpe tie ẹre, iran ni ya ẹko ata kpe tie ẹre.

Psalm 32:6

Erriọ ọ re emwa ruẹn ni mudia ẹse hia, gha na erhunmwu ghe ruẹ vbe ẹghẹ a i mwẹ, ẹghẹ ne amẹ orueghe ne ọ bun, gha na gha vẹ rre ẹ i ghi sẹ ehe ne iran ye.

Psalm 91:15

Iran gha kpe tie mwẹ, I gha yaba iran vbe iran a gha rre uwu ibaro. I gha miẹn iran fan I gha vbe ye ọghọ ne iran.

Aizaia 45:19

I ma ta ẹmwẹ rhọkpa vbe ẹkhokho ra ne I rhie emwi ne I ra ru lẹre I ma kha wẹ ne ivbi Izrẹl, ya gha gualọ mwẹ vbe ehe ne ọ dihoi rua. Mẹ ọrọre Nọyaẹnmwa, ẹmwata ọ re I vbe ta; I ghi vbe gie emwa rẹn emwi ne ọ re ẹmwata.”

Aizaia 65:10

Iran gha ga mwẹ, iran ghi vbe gha viọ ohuan kevbe ẹmila iran ya gha rria vbe Otọe Nọrriẹe ọghe Siarọn vbe odẹ orrie kevbe vbe Iya Orueghe vbe odẹ ahọ.

Jerimaia 24:7

I gha rhie ye iran ekhọe aho ne iran rẹn wẹ mẹ ọrọre Nọyaẹnmwa. Ẹghẹ nii iran ghi gha re emwa mwẹ, mẹ ghi vbe gha re Osanobua iran, rhunmwuda, iran gha werriegbe bu mwẹ rre, ekhọekekhọe iran hia.

Jerimaia 3:10

Vbe iyeke ena hia, e Juda ne okhuo ne ọ ma guobọ ọdọ ne ọtẹn Izrẹl keghi ye ọvọvo bu mwẹ gha dee, ọ ma sẹ ọ re otọ ẹko hiehiere. Mẹ ne Nọyaẹnmwa ọ re ọ tae.”

Jerimaia 50:4

E Nọyaẹnmwa khare wẹẹ, “Ọ gha sẹ ẹghẹ nii, ke ivbi Izrẹl, ke ivbi e Juda gha ye eve gha dee, iran ghi gha gualọ imẹ ne Osanobua iran.

Hozia 5:15

“I gha he emwa mwẹ yotọ a te do miẹn wẹ iran rri oya ye orukhọ iran sẹ nẹ, kevbe wẹ te iran ghi vbe gualọ mwẹ. Ogha kẹe, usẹ gha sẹ iran nẹ, iran gha gualọ mwẹ rre.”

Joẹl 2:12

“Sokpan, vbene emwi hia ye ye na, wa fiwerriẹ ne uwa bu mwẹ gha dee, ekhọekekhọe hia, deba aguẹ, kevbe eve kevbe akhiẹ.” Erriọ Nọyaẹnmwa khare:

Matiu 7:7

“Nọọn, ọ gha suọ obọ, gualọ, u gha miẹn, sobọ, a gha kie nuẹn.

Iwinna 8:36

Vbene iran khian vbe odẹ nii, iran keghi do sẹ ihe ọkpa ne amẹ ye, ọka iwinna ni keghi kha wẹẹ, “Ghe amẹ vbe emwa na, de emwi ne ọ gha zẹ ne a i ra na sa amẹ mẹ nian?” [