Jerimaia 2:20 - Edo Bible (E Baibol Ẹdo) Version 1996

²⁰ E Nọyaẹnmwa ne Udazi khare wẹẹ, “Izrẹl, ọ kpẹre ne uwa ghi he asẹ mwẹ yotọ wa he ne uwa họn ẹmwẹ mẹ ra ne uwa ga mwẹ wa keghi ya gha gho avbe ẹbọ emwiokọ, vbe uhunmwu oke kevbe ototọ erhan ni mwẹ ebe hia.

Jerimaia 2:20 ပူးပေါင်းရင်းမြစ်များ

I Ọba 12:32

E Jeroboam keghi vbe mu emwiukpo ugamwẹ gbọọ ye ikpẹdẹ ekesugie ọghe uki ne ogierẹnrẹn vbe Bẹtẹl zẹ vbene ọ vbe ye vbe Juda, ọ keghi ya zọ ese vbe aka ni rre Bẹtẹl ghe avbe ẹmila igoru ne ọ ru. Ọ keghi viọ avbe ohẹn ne irẹn ma ẹẹn yọ vbe Bẹtẹl.

I Ọba 14:23

Iran keghi họlọ ehe ne iran na gho avbe ẹbọ ohoghe, iran keghi mannọ orre okuta kevbe ọkpọ erhan ni mwẹ irhu emwi ne iran gha ghoo, vbe uhunmwu oke kevbe ototọ erhan ni mwẹ irhu.

Psalm 107:14

Ọ viọ iran ke uwu akhiẹ kevbe ebiebi ladian, ọ keghi bunnọ ọgiọrọ iran hẹ kua.

Psalm 2:3

Iran khare wẹẹ, “Wa gie ima wan egbe ima hin asẹ iran rre, wa gie a mu akhayan ọmwa iran fua.”

Psalm 78:58

Iran ya ehe ne iran na ga ẹbọ ya ohu muẹn iran keghi vbe ya amazẹ iran rhia ẹre ẹko rua.

Ẹksọdọs 19:8

Emwa nii hia keghi ya urhu ọkpa kha wẹẹ, “Ma gha ru emwi hia ne Nọyaẹnmwa tae.” E Mosis na vbe ya khama e Nọyaẹnmwa vbene emwa nii kha hẹ.

Ẹksọdọs 24:3

E Mosis keghi ya gu emwa nii guan vbene Nọyaẹnmwa kha hẹ kevbe iyi ne ọ vbe yi. Emwa nii hia keghi koko wanniẹn wẹẹ, “Ma gha ru emwikemwi ne Nọyaẹnmwa kha re.”

Ẹksọdọs 3:8

“Te I rre na ne I do miẹn iran fan vbe obọ ivbi Igipt, ne I vbe viọ iran kpao vbe Igipt nii gha rrie otọ ne ọ maa emwiokọ kevbe ne ọ vbẹ aro. Otọ esiesi ne ọ maa emwiokọ nọ, emwa ni rre evba ẹghẹ na ọrọre emwa Kenan, Hiti, Amọri, Pẹriz, Hivi kevbe Jebus.

Aizaia 1:21

Ẹvbo ne ọ te ka mwẹ uyinmwẹ ne ọ gbae yi, ọ re ọ ghi yin uyinmwẹ ohọhọ na, vbe ẹghẹ okpa emwa ẹmwata ọ re ọ wa gba re, sokpan, banbanna nian avbe izigha ọ re ọ ghi kẹe.

Aizaia 10:27

Ẹghẹ nii gha sẹ I gha fannọ uwa yotọ hin obọ ẹtin Asiria rre, urọnghọn iran i ghi ra ye dọlegbe gha re ihẹ vbe izabọ uwa.”

Aizaia 14:25

I gha rẹnkhẹn ivbi Asiria ni rre otọe Izrẹl ne ọghomwẹ, I ghi ya owẹ rrilo iran ginna otọe vbe uhunmwu oke mwẹ, I gha fannọ emwa mwẹ yotọ hin urọnghọn Asiria rre kevbe hin ihe ne a wẹ ne iran mu.

Aizaia 9:4

Rhunmwuda, wẹ bun urọnghọn ne ọ te mianmwẹ iran nẹ! Kevbe ukpokpo ne ọ te gbe iran izabọ wẹ khọn ẹvbo ne ọ te zẹ emwa ruẹn kpokpo ne ọ na vbe do iran ọzuọ ne zẹ vbene u ka khọn ivbiyokuo e Midian vbe ẹghẹ ne ọ kpee fua.

Jerimaia 13:27

Ọ miẹn Vbe uwa ru emwi ne ẹ i ye ọre nẹ. Ọ miẹn ọẹn vbe uwa lele avbe ẹbọ iran ni ma yayi vbe avbe uhunmwu oke kevbe oha, zẹ vbe ọmwa ne ọ fifi lele amwẹ ọsiọre ra ẹsin ọwẹe ne ọ kpe lele ẹsin amwẹ. Ivbi e Jerusalẹm, wa wiri, de ẹghẹ ne uwa gha ya huan?

Jerimaia 17:2

Ehe ne avbe Ogiukpo ye ọ re avbe emwa na ga, kevbe ne a mu gbọ ne Asiẹrra ne ẹbọ ne okhuo, vbe ehe ne erhan ne ọ mwẹ ebe ye, kevbe uhunmwu oke negiẹrẹ.

Jerimaia 2:31

Ivbi Izrẹl, wa danmwehọ ẹmwẹ ne I guan. Mẹ he ye vbe ato ne uwa ẹdẹ ra, zẹ vbe ẹvbo dan ne ọ su ebiebi. Vbe uwa ghi na kha hẹ wẹ emwi ne ọ khọn uwa ọ re uwa ra gha ru ighe wa i dọlegbe bu mwẹ dee.

Jerimaia 3:13

Sokpan, u ghi miẹnkue wẹ, wa rriabe kevbe wẹ wa sẹmwẹ e Nọyaẹnmwa ne Osanobua uwa. Miẹnkue wẹ u rhie aho ruẹ ne avbe ẹbọ ẹrrẹe vbe ototọ erhan ni mwẹ ebe ni bii hia kevbe wẹ u ma ya ẹmwẹ mwẹ ru emwi. Mẹ ne Nọyaẹnmwa ọ re ọ tae.

Jerimaia 30:8

E Nọyaẹnmwa ne Oghodua khare wẹẹ, “Ọ gha sẹ ẹdẹ ne ẹdẹrriọ. I gha bun urọnghọn ne ọ rre iran urhu, I ghi vbe rhan iran ọgiọrọ hẹ kua. Iran i khian ghi vbe gha re eviẹn avbe erhunmwuyẹn ọvbehe.

Jerimaia 5:5

I gha ya iwegbe bu iran na gha khian, ne I ya gu iran guan. Vbe ne ẹmwata, iran rẹn emwi ne Osanobua iran ho. Emwi ne Nọyaẹnmwa ho ne iran ru.” Sokpan iran hia ọ re ọ wa he ne iran gha rre ototọ asẹ e Nọyaẹnmwa, iran he ne iran họn ẹmwẹ ne ẹẹn.

Ezikiẹl 16:28

Rhunmwuda ighe ẹko iran nekpa ma vuọn ọn, u keghi vbe kpe lele ivbi Asiria. U ke gha re igberagia iran sokpan, iran ma sẹtin sẹ uẹ ọkẹn.

Ezikiẹl 16:31

U bọlọ ivbi owa lele idunmwu hia ne u na ru ẹbọ ke ne u na gbe igberagia. Sokpan, wẹ ma gha koko igho zẹ vbene avbe igberagia kẹkan ru ẹe.

Ezikiẹl 16:41

Iran gha gien owa ruẹ sẹ otọ, iran ghi vbe gie avbe ikhuo do gha bi ghe oya ne a rri ọ re. I gha da ruẹ obọ igberagia ne u gbe yi, I ghi vbe ru ẹe ne u ghẹ ghi ya emwi ne avbe egbakhian ruẹn.

Ezikiẹl 20:28

I viọ iran gha die otọ ne I wẹ I gha mu ne iran. Iran ghi miẹn avbe oke ni yo kevbe avbe erhan ni mwẹ ebe nunuunu, iran kegha zọ ese vbe ehe ne ehia ye.

Ezikiẹl 23:5

A gha rhe miẹn wẹ ọghomwẹ nọ, Ohola ne ọ rrọ keghi ye gha gbe ebabotu, ẹmwẹ avbe ọse ne ọ zẹẹ ye Asiria kegha ru ẹre ne rriorriorrio.

Hozia 1:2

Ẹghẹ ne Nọyaẹnmwa na gie Hozia uhunmwu gie ivbi Izrẹl vbe okaro, ọ tama Hozia wẹẹ, “Ya rhie okhuo; amwọn gha wa gha ghẹẹ, te emọ ne u ra biẹlẹ ra wa vbe yevbe irẹn. Erriọ wa vbe nọ, emwa mwẹ sẹ mwẹ rae, iran ma ghi guobọ mwẹ.”

Hozia 3:3

I keghi tama rẹn wẹ, ẹghẹ ne ọ taẹn o re ọ gha ya diakhẹ mwẹ vbene ẹi na gbe ebabotu ra ne ọ vbe gha ghẹ. Vbe uwu ẹghẹ ne a kha na, mẹ gha vbe diakhẹ ọre.

Hozia 4:13

Iran zọ ese vbe ehe ne iran na gho iran vbe uhunmwu oke nekhua. Iran keghi vbe giẹn eturari vbe uhunmwu oke negiẹrẹ, vbe ototọ avbe erhan ni taẹn kevbe ni zẹlẹ abọ ẹsẹse, rhunmwuda, irhu iran wa fu ọmwa egbe ẹsẹse. “Rhunmwuda ọnii, avbe ivbi uwa nikhuo gha gbe ebabotu, kevbe ivbi amwẹ uwa nikhuo gha vbe ru oghẹ.

Hozia 9:1

Wa ne ivbi Izrẹl, wa dobọ ne uwa na ru emwi ukpo uwa zẹ vbe emwa ni ga ẹbọ yi, wa fi iyeke gbe Osanobua uwa nẹ, ekhọe uwa ma vbe lelẹe. Ehe ne otọe nii sẹe ehe ne ọ rhanmwẹ, ọ re uwa na khiẹnnẹ egbe uwa ne Baal zẹ vbe ebabotu, avbe ọka ne uwa ro ighe rẹn ọ re ọ ya ẹe ha uwa osa keghi yẹ uwa.

Levitikọs 26:13

Mẹ ne Nọyaẹnmwa Osanobua rua ọ re ọ viọ uwa ke Igipt ladian ne uwa ghẹ ghi gha re eviẹn ọvbehe. I guọghọ ẹtin ne ọ te de uwa ginna otọ, I na gie uwa gha khian vbe ne uwa na tọn uhunmwu uwa mu ẹsẹse.”

Nahum 1:13

I gha dobọ ẹtin ne Asiria mwẹ vbe uhunmwu uwa yi, I ghi vbe bunnọ ọgiọrọ ne ọ ya munọ uwa gbalọ.”

Diuteronomi 12:2

Ẹre ena khin. Vbe otọ ne uwa ra mu nii, wa dunmwu ehe hia ne emwa nii na gho ẹbọ, vbe oke ni yo, oke ne giẹrẹ kevbe ototọ avbe erhan ni mwẹ ebe ọgbọn.

Diuteronomi 15:15

Wa ghi yerre wẹ, eviẹn wa gha a khin vbe Igipt, e Nọyaẹnmwa ne Osanobua uwa keghi fannọ uwa kua, ọna ọ si ẹe ne I na rhie uhi na ne uwa.

Diuteronomi 26:17

Vbe ẹdẹnẹrẹ na, wa miẹn e Nọyaẹnmwa kue nẹ zẹ vbe Osanobua rua, wa yan rẹn ighẹ wa gha họn ẹmwẹ kevbe ne uwa gha rhie uhi ẹre mwẹ, kevbe ne uwa vbe gha ru vbene ọ khare hia.

Diuteronomi 4:20

Sokpan wa ọrọre emwa ne irẹn viọ ke Igipt ladian, uwu ogidi erhẹn nii. Te ọ viọ uwa ladian ne uwa do gha re ọghọe vbene uwa ye ẹrẹna.

Diuteronomi 4:34

A he miẹn ẹbọ ọkpa ne ohan gie ẹe la uwu okpẹvbo ọvbehe ya viọ emwa ladian ya khian ọghe ọe zẹ vbene Osanobua Nọyaẹnmwa uwa ru ne uwa vbe Igipt? Sirra uwa ọ re, ọ na lo ẹtin kevbe iwegbe ẹre nọkhua, ọ keghi si egboghogbogho kevbe okuo ye otọ, ọ keghi winna iwinna ọyunnuan kevbe ọghe ama, ọ na gie emwi ohan gha sunu.

Diuteronomi 5:27

Dọlegbe gha khian e Mosis, ne u danmwẹ ehọ ẹmwẹ hia ne Nọyaẹnmwa Osanobua mwa gha ta. U ghi dọlegbe bu mwa gha dee do tama mwa, ma gha danmwehọ ne a vbe ya ẹe gha ru emwi.’

Jọsua 1:16

Iran keghi wanniẹn tama e Jọsua wẹẹ, “Ma gha ru emwi hia ne u tama mwa, ma gha vbe yo ehe ne u rhirhi a gie ima re.

Jọsua 24:24

Emwa nii keghi khama e Jọsua wẹẹ, “Ma gha ga e Nọyaẹnmwa Osanobua mwa, ma gha vbe ya uhi ẹre gha ru emwi.”

Jọsua 24:26

E Jọsua keghi gbẹnnẹ uhi na ye ebe uhi ọghe Nọyaẹnmwa. Ọ keghi mu okuta nọkhua, ọ na muẹn yotọ vbe evba vbe ototọ okan vbe ehe Ne ọ huanrẹn ọghe Nọyaẹnmwa,

Arhie Maan 17:1

Ọkpa vbe uwu avbe odibosa ihinrọn, ne egboghogbogho gha gue nii, keghi bu mwẹ gha dee do tama mwẹ wẹẹ, “Larre, ne I do rhie maa ruẹn vbene a ra ya rri ọre oya hẹ ighẹ ogiete ebabotu nii, ẹvbo nọkhua nii ne a bọ ye ọkpẹn avbe ẹzẹ ni bun.

Giọgis 10:6

Ivbi Izrẹl keghi vbe dọlegbe rukhọ ghe e Nọyaẹnmwa. Iran na gha gho e Bal kevbe Astat deba avbe ẹbọ e Siria, e Saidọn, e Moab, Amọn kevbe Filistia. Iran keghi fi iyeke gbe e Nọyaẹnmwa, iran ma gha gae.

Giọgis 2:11

Ẹghẹ nii ivbi Izrẹl keghi ru orukhọ ghe Nọyaẹnmwa, iran na ya gha gho e Bal.

Giọgis 2:13

Iran fi iyeke gbe ugamwẹ e Nọyaẹnmwa, iran na ya gha gho avbe Bal kevbe Astat.

I Samuẹl 12:10

Iran keghi dọlegbe tu tie Nọyaẹnmwa ne ọ yi iran obọ wẹẹ, ‘Ma rukhọ nẹ, rhunmwuda, ma fi iyeke gbe uwẹ, ma keghi ya gha ga e Baal kevbe Astat. Miẹn ima fan hin obọ eghian ima rre, ma gha ga aa!’