Jerimaia 17:25 - Edo Bible (E Baibol Ẹdo) Version 1996

²⁵ Ẹghẹ nii avbe ọba iran kevbe avbe ivbiọba iran gha la uwu onurho e Jerusalẹm, iran ghi vbe gha mwẹ egbe ẹtin ọha ne Devid gha mwẹ. Ke iran kevbe ivbi e Jerusalẹm kevbe Juda, iran gha hin ikẹkẹ okuo kevbe ẹsin, ore Jerusalẹm ghi gha vuọn ne ẹvbo vbe ẹghẹ hia.

Jerimaia 17:25 ပူးပေါင်းရင်းမြစ်များ

II Samuẹl 7:16

U gha mwẹ uniẹn ruẹn khian rhinrin. I ghi vbe gie arriọba ruẹ gha rrọọ rhinrin ẹdẹ. Akhaemwisẹ arriọba ruẹ ẹ i ra fo ẹdẹ.’ ”

II Samuẹl 8:4

E Devid keghi khọn munọ arhin iyisẹn yan arria erẹnrẹn (1,700) vbe uwu iran ni hin ẹsin ẹnrẹn kevbe arriaisẹn ugie (20,000) vbe ivbiyokuo nii ya owẹ khian, ọ keghi vbe ya ẹsin nii si ikẹkẹ okuo ẹre khian uke, ọ na viọ ẹsin nii gha sẹtin si ikẹkẹ okuo iyisẹn (100) ye otọ vbọ.

Ẹksọdọs 12:14

Ẹdẹ na ghi gha re ẹdẹ ne a gha yerre ne uwa. Wa ghi gha ru emwi ukpo ẹre ne I ya ye emwi ne imẹ ne Nọyaẹnmwa ru rre. Wa ghi gha ru ẹe ke orre ya sẹ orre zẹ vbe emwiukpo ẹdẹdẹmwẹdẹ.

Aizaia 9:7

Te ẹtin arriọba ẹre ra gha muan yọ, ọfumwegbe ọ re otọe arriọba ẹre ra gha ye vbe ẹghẹ hia te irẹn ra rriọba zẹvbe ọmwa ne ọ rriọba lele Devid ne Ọba ẹmwata kevbe uhunmwu ẹmwẹ ọ re irẹn ra ya gha mwẹ ẹtin; ke ẹghẹ na kpao ya sẹ ufomwẹ agbọn. E Nọyaẹnmwa ne Oghodua tae nẹ ighe erriọ rẹn ra ru ehia.

Jerimaia 13:13

U ghi khama iran ẹghẹ nii wẹ, mẹ ne Nọyaẹnmwa ra ye ayọn vuọn emwa otọe na hia a te do miẹn wẹ, te ayọn ghi gbe iran hia, avbe ọba ni re ivbi uniẹn e Devid, avbe ohẹn avbe akhasẹ kevbe ivbi e Jerusalẹm hia.

Jerimaia 22:30

“A bu abe gbe ọmwa na nẹ ne ọ gha re ọmwa ne emọ gha wulo, ne ọ gha re ọmwa ne emwi i ra dunna na. Ẹ i ra gha mwẹ emọ ne ọ gha rriọba vbe Juda zẹ vbe iran ni mudia ye ihe Devid. Mẹ ne Nọyaẹnmwa ọ re ọ taa ẹe.”

Jerimaia 22:4

Wa gha gele ru vbene I tama uwa, ẹghẹ nii ivbi uniẹn e Devid ọ re ọ ra gha rriọba. Debare, iran kevbe avbe ekhaẹmwẹ iran kevbe emwa iran gha vbe gha hin ikẹkẹ okuo kevbe ẹsin la onurho ẹguae na.

Jerimaia 25:5

Iran tama uwa ne uwa fiwerriẹ hin uyinmwẹ dan ne uwa yin rre, kevbe avbe emwi dan ne uwa ru, ne uwa miẹn ehe na gha yin ẹnrẹn khian ighẹ otọe nii ne Nọyaẹnmwa mu ne uwa kevbe avbe erha uwa odede ne ogha re ọghe uwa ẹdẹdẹmwẹdẹ.

Jerimaia 33:15

Ẹghẹ nii, I ghi zẹ ovbi uniẹn e Devid ne ọ maa, zẹ vbe ọba. Ọba nii gha ru emwi ne ọ ghae kevbe ne ọ hẹnhẹn vbe otọe nii hia.

Jerimaia 33:17

Mẹ ne Nọyaẹnmwa yanrẹn wẹ te a gha miẹn ivbi uniẹn Devid ne ọ gha rriọba rhinrin vbe Izrẹl.

Jerimaia 33:21

Erriọ vbe nọ, I gu e Devid ne ọguọmwadia mwẹ taa ile nẹ wẹ, ẹ i mwẹ a ma miẹn ovbi uniẹn ọnrẹn ne ọ gha rriọba. Erriọ I vbe gu avbe ohẹn ta ile, iran ni re ivbi uniẹn e Livai wẹ iran ọ ra gha ga mwẹ, avbe ile na, a i sẹtin rra ẹre.

Jerimaia 7:7

Wa gha fiwerriẹ, I gha gie uwa gha rre otọe na ne I mu ne avbe erha uwa odede ne ọ gha re ọghe iran ẹdẹdẹmwẹdẹ.

Diuteronomi 17:16

Ọ ma kei ne ọba gha mwẹ ẹsin ni bun, ne ọ gha re ọghe ivbiyokuo ẹre, ọ ghẹ vbe gie emwa gha rrie Igipt ya dẹlẹ ẹsin rre, rhunmwuda, e Nọyaẹnmwa ta ẹe wẹ emwa irẹn i ra dọlegbe gha rrie odọ.

Hibru 12:22

Sokpan, uhunmwu Oke Zaiọn ọre uwa gha dee kevbe ẹvbo Osanobua, Jerusalẹm ne ọ rre ẹrinmwi, ke ẹe kevbe odibo Osa ẹre ne ẹgbenuri.

I Samuẹl 8:11

E Samuẹl keghi kha wẹẹ, “Vbene ọba uwa khian ru uwa ọ re ena khin; ọ gha ya ivbi uwa hia khian ivbiyokuo. Eso vbọ gha winna vbe ikẹkẹ okhuae ọghe okuo ẹre, eso vbe uwu iran ni ọ ra gha gbinna ne ẹẹn, eso vbọ ghi vbe gha rhulẹ vbe odaro ikẹkẹ okuo ẹre.