Jerimaia 16:15 - Edo Bible (E Baibol Ẹdo) Version 1996

¹⁵ Sokpan iran ghi ya eni mwẹ gha vẹn ihẹn, zẹvbe Osanobua ne ọ rrọọ ne ọ viọ ivbi Izrẹl ke otọe okuo rre, kevbe avbe ẹvbo ọvbehe, vbe ehe ne I zagha iran kui. I gha viọ iran werriegbe gha die ẹvbo iran, gha die otọe nii ne I mu ne avbe erha iran odede. Mẹ ne Nọyaẹnmwa ọ re ọ taa ẹe.

Jerimaia 16:15 ပူးပေါင်းရင်းမြစ်များ

Gẹnẹsis 28:15

Yẹrẹro, I gha rrọọ yaba ruẹ, I ghi gha degue ruẹ vbe ehe ne u rhirhi a gha rrie, I ghi vbe dọlegbe rhie ruẹ gha die otọ na. Mẹ ira suẹ rae I te do ru avbe emwi ne I tama ruẹn na.”

Psalm 106:47

Miẹn ima fan, Nọyaẹnmwa Osanobua mwa, ne u viọ ima werriegbe ke uwu ẹbu avbe uhunmwu ẹvbo ladian, ne ima miẹn ehe na kpọnmwẹ ẹse ne a rho eni ruẹn ne ọ huanrẹn.

Aizaia 14:1

E Nọyaẹnmwa gha dọlegbe tohan Izrẹl ne emwa rẹn, ọ ghi hannọ iran zẹ ya ru ọghọe. Ọ gha gie iran dọlegbe gha rre otọ ẹvbo iran, avbe orhunmwuyẹn ghi deba iran gha rre evba.

Jerimaia 12:15

Sokpan, I gha viọ iran kpao nẹ, I gha tohan iran, I gha viọ dọmwadẹ uhunmwu ẹvbo dọlegbe gha die otọ ẹre kevbe ẹvbo ẹre.

Jerimaia 23:3

I gha si avbe emwa mwẹ ni dekẹe koko ke ẹvbo ne I zagha iran kui gha dee, I ghi viọ iran werriegbe gha die otọ iran. Iran gha biẹlẹ emọ nibun, iran ghi bun yọ vbe inu.

Jerimaia 23:7

“Ẹghẹ dee,” erriọ Nọyaẹnmwa khare, “Ne emwa i ghi ra na gha ye eni mwẹ vẹn ihẹn zẹ vbe Osanobua ne ọ rrọọ ne ọ viọ ivbi Izrẹl ke Igipt ladian rre.

Jerimaia 23:8

Sokpan iran ghi gha ye eni mwẹ vẹn ihẹn zẹ vbe Nọyaẹnmwa ne ọ viọ ivbi Izrẹl ke odẹ okuọ rre kevbe avbe otọe ọvbehe ne I te zagha iran kui gha dee. Ẹghẹ nii, iran ghi do gha rre otọe iran?”

Jerimaia 24:6

I gha gbearoghe iran, I ghi vbe viọ iran werriegbe gha die otọe na. I gha mu iran kpaegbe, I i ra vbe siẹn iran kua. I gha gbọ iran, I i ra vbe silo iran vbọlọ.

Jerimaia 29:14

Ẹn, erriọ I tae wẹ wa gha gualọ mwẹ miẹn. Mẹ ghi viọ uwa ya ye ihe vbe otọe uwa. I gha si uwa koko ke dọmwadẹ ẹvbo, kevbe dọmwadẹ ehe ne I zagha uwa gha rrie, I ghi viọ uwa gha die otọe nii ne I ke viọ uwa kpao gha rrie iwe. Mẹ ne Nọyaẹnmwa tae nẹ.’

Jerimaia 3:18

Izrẹl gha deba e Juda, iran ghi gba ke iwe gha dee, ke ẹvbo ne ọ rre odẹ okuọ nii gha dee, iran ghi gha die ẹvbo ne I mu ne avbe erha uwa odede ne ọ gha re ọghe iran ẹdẹdẹmwẹdẹ.”

Jerimaia 30:10

“Wa ghẹ gie ohan mu uwa, wa ne emwa mwẹ wa ne ivbi Izrẹl, wa ghẹ fian afianma I gha dẹ uwa werriegbe ke odẹ ne ọ rrei ni rre, ke otọ ne uwa na re oghunmwu rre wa gha rri owa, wa ghi gha rre ọfumwegbe ẹkun gha sẹ uwa otọ, ọmwa rhọkpa ne ọ gha runran uwa i rrọọ.

Jerimaia 30:3

Rhunmwuda ẹghẹ dee ne I gha na viọ emwa mwẹ ighe Izrẹl kevbe Juda. I ghi viọ iran dọlegbe gha di otọe nii ne I mu ne avbe erhan iran odede, iran ghi dọlegbe do yan ẹnrẹn. Mẹ ne Nọyaẹnmwa ọre ọ taa ẹe.”

Jerimaia 31:8

I gha viọ ke odẹ okuọ gha dee, I ghi vbe si iran koko ke ufomwẹ agbọn gha dee, avbe arhuaro kevbe avbe arọe gha lele iran rre, ikhuo ni hanmwa kevbe iran ni gha ra biẹ iran gha werriegbe rre, uhunmwu ẹvbo nọkhua.

Jerimaia 32:37

I ra ya si avbe emwa nii hia koko ke ehe ne I te zagha iran kui vbe ohu mu mwẹ, werriegbe gha die emwa na, I gha gie iran gha rrọ vbe a i mwẹ ẹbe.

Jerimaia 50:19

“I gha viọ ivbi Izrẹl dọlegbe gha die otọ iran. Iran gha re vbe emwiokọ ne ọ zọ vbe Oke Kamẹl, kevbe otọe Basian, iran ghi vbe rri enọrhirhi khọn iran vbe emwiokọ ne a miẹn vbe otọe Ifreim kevbe Giliad.

Ezikiẹl 36:24

I gha viọ uwa ke avbe uhunmwu ẹvbo kevbe agbọn ẹvbo ladian, I ghi viọ uwa werriegbe gha die otọe uwa.

Ezikiẹl 39:28

Ẹghẹ nii, avbe emwa mwẹ ghi do rẹn wẹ mẹ ọrọre Nọyaẹnmwa ne Osanobua iran. Iran gha rẹn ọna rhunmwuda, mẹ ọ re ọ viọ iran gha rrie iwe, eban nian, I keghi vbe si iran koko, I na viọ iran dọlegbe gha die otọ iran vbe ne a i na sẹ ọkpa kẹkan vbe uwu iran rae ye odieke.

Joẹl 3:1

E Nọyaẹnmwa khare wẹẹ, “Ọ gha sẹ ẹghẹ nii, I gha gie agbọn dọlegbe maa e Juda kevbe Jerusalẹm.

Emọs 9:14

I gha viọ emwa mwẹ werriegbe gha die otọ iran, iran gha dọlọ ẹvbo iran ne ọ te guọghọ ua bọ. Iran ghi di ẹe ya. Iran gha gbe ugbo azara iran ghi da ayọn ẹnrẹn. Iran gha mu ugbo, iran ghi rhọ emwi ne iran kọe.

Emọs 9:15

I gha gbe emwa mwẹ ẹkun sẹ otọ vbe otọe ne I mu ne iran, a i ghi dọlegbe werriẹ iran owa ọvbehe.” E Nọyaẹnmwa ne Osanobua rua taa ẹe nẹ.