Jerimaia 14:7 - Edo Bible (E Baibol Ẹdo) Version 1996

⁷ Avbe emwa mwẹ viẹ bu mwẹ gha dee wẹẹ, ‘A gha rhe miẹn ighẹ orukhọ mwa gu ima gui, yi ima obọ vbene u yanrẹn Nọyaẹnmwa. Ẹghẹ nibun ọ re ima ya fi yeke gbe uwẹ, ma ru orukhọ ghe uẹ.

Jerimaia 14:7 ပူးပေါင်းရင်းမြစ်များ

Ẹzra 9:15

E Nọyaẹnmwa Osanobua Izrẹl, ọmwa ẹmwata ọ re uwẹ khin, u kevbe gie ima miẹn uhunmwu. Ma miẹn orukhọ mwa kue ma ruẹn, ma ma ghi vbe kei ne ọ gha rrie ehe ne uwẹ ye.”

Psalm 115:1

Nọyaẹnmwa, wẹ okpa, awẹ, wẹ okpa kẹkan ọ re a gha rhie uyi na, ighẹ ẹ i re ima, rhunmwuda umamwẹ kevbe ahoẹmwọmwa ruẹn ne ẹ i beghe.

Psalm 25:11

Mu eyan ruẹn sẹ Nọyaẹnmwa, ne u ya orukhọ mwẹ bọ mwẹ rhunmwuda iran wa bun.

Psalm 79:9

Yima obọ Osanobua ne u miẹn ima fan, fannọ ima yotọ ne u vbe ya orukhọ mwa bọ mwa rhunmwuda uyi ruẹ.

Aizaia 48:11

Emwi ne I ru, rhunmwuda ekpẹn ne egbe mwẹ ọre I na ruẹe. Mẹ i ho ne a ya iruẹn ye eni mwẹ ra ne ọmwa ọvbehe rhokpa ghae vbe uyi nii ne ọ kere ne ọ gha re ọghomwẹ, ọ ghi mẹ ọkpa.”

Aizaia 59:12

“E Nọyaẹnmwa, emwi dan ne ima ru ghe ruẹ wa bun. Orukhọ mwa wa gu ima gui. Ma wa rẹn wẹ ehia wa rre evba.

Jerimaia 10:19

Ivbi e Jerusalẹm keghi datu wẹẹ, “A kuan mwa, obọ da mwa ẹsẹse! Ẹwẹn ima i ra rrie! Ma te gha ro ighe emwi ne egbe mwa gha rrọ ọ re ọna khin.

Jerimaia 2:19

Emwi dan uwa ọ re ọ ra rri uwa oya ne uwa na fi iyeke gbe mwẹ ọ re ọ ra bu abe uwa. Wa gha ruẹ vbene ọ rriara hẹ kevbe, vbene ọ ma gba hẹ ne uwa na hee mwẹ yotọ mẹ ne Nọyaẹnmwa ne Osanobua rua; vbene uwa i ghi na vbe ya ọghọ mẹ. Mẹ ne Nọyaẹnmwa ne Udazi, ne Oghodua taa ẹe nẹ.”

Jerimaia 3:25

“Te ọ kere ne ima lovbiẹ ye otọ ne emwiekhue, ne efaa gue mwa. Ẹghẹikẹghẹ ọ re ima vbe avbe erha mwa odede wa ya gha rukhọ ghe Nọyaẹnmwa Osanobua mwa. Ma ma he vbe họn ẹmwẹ ne ẹẹn ẹdẹ.”

Jerimaia 3:6

Ẹghẹ ne Josaia na gha re ọba, e Nọyaẹnmwa keghi tama mwẹ wẹẹ, “Wẹ miẹn emwi ne Izrẹl ne okhuo ne ọ ma guobọ ọdọ ru nian. Ọ fi iyeke gbe mwẹ nẹ, ọ keghi ya gha do ẹki ebabotu vbe uhunmwu oke ni yo hia kevbe ototọ avbe erhan ni mwẹ ebe ni bii.

Jerimaia 5:25

Sokpan, orukhọ uwa ma gie avbe emwi ne ọ maa na sẹ uwa obọ.

Jerimaia 5:6

Onii ọ sii ẹe ne oduma gha na ke uwu ẹgbo rre do gbele iran an. Akpakomiza gha ke uwu ato rre do yanghan iran an, atalakpa ghi do gha ru ohuẹ vbe ore iran. Avbe emwa nii gha ladian, a gha yanghan iran an, rhunmwuda orukhọ iran bun. Iran keghi fi iyeke gbe Osanobua yan egbe yan egbe.

Jerimaia 8:14

Emwa Osanobua keghi nọ wẹẹ, “Vbọzẹ ne ima na tota hẹkpẹẹ yi? Wa larre, wa gie ima lẹ gha rrie avbe ẹvbo ne a gbe odin gaa nii, ne ima ya wulo vbe odọ. Osanobua bu ohiẹn uwu gbe ima nẹ, ọ mu eruan ne ima wọn ne, rhunmwuda ne ima na ru orukhọ ghe ẹre.

Jerimaia 8:5

Emwa mwẹ vbọzẹ yi ne uwa na fi iyeke gbe mwẹ wa i ghi dọlegbe werriegbe? Wa rhikhan mu ẹbọ uwa, wa ma ghi dọlegbe bu mwẹ gha dee.

Ezikiẹl 20:14

Sokpan, I ma ru vberriọ, rhunmwuda, ọnii gha mu ozan gie eni mwẹ vbe ehe ne avbe uhunmwu ẹvbo nii ye, iran ne aro ẹre se ọe vbe I viọ ivbi Izrẹl ke Igipt ladian.

Ezikiẹl 20:22

Sokpan, I ma ru vberriọ, rhunmwuda, te ọnii gha mu ozan gie eni mwẹ vbe ẹbu uhunmwu ẹvbo ni miẹn mwẹ vbe I viọ ivbi Izrẹl ke Igipt ladian.

Ezikiẹl 20:9

Sokpan, I ma ru vberriọ rhunmwuda, ọnii gha mu ozan gie eni mwẹ, rhunmwuda, sirra avbe emwa ne iran gba yin kugbe ọre I na tae ma Izrẹl wẹ, I gha viọ iran ke Igipt ladian.

Hozia 5:5

Uhiomwẹ ivbi Izrẹl ya iran rrie. Orukhọ iran ọ re ọ ye iran rrua owẹ ne iran na dele. Ivbi e Juda keghi dele ba iran.

Hozia 7:10

Uhiomwẹ ivbi Izrẹl wa ba iran ifi ẹzọ. Vbene a rhe ru emwi ye iran aro sẹ, iran ma dọlegbe bu mwẹ gha dee, mẹ ne ọ re Nọyaẹnmwa ne Osanobua iran.

Emọs 7:2

Vbe uwu umian nii, I keghi bẹghe vbe avbe irhiso wa rri irunmwu ni ghi bi nunuunu hia vbe otọe nii, ọre imẹ na kha wẹẹ, “E Nọyaẹnmwa ne Udazi, yabọ emwa ruẹn, vbe iran ra ya miẹn uhunmwu hẹ vbe ọna? Iran wa kanmwa, iran ma vbe wegbe!”

Maika 7:9

Ma ru orukhọ ghe Nọyaẹnmwa nẹ, rhunmwuda ọnii, te ọ kere ne ima ziengbe ohu ẹre vbe omwa ẹghẹ eso, sokpan, vbe okiekie, ọ gha mu ẹzọ ima gui, ọ ghi kpe ima oya emwi ne a ya ru ima khọ ua.

Ẹfisọs 1:12

Rhunmwuda ọnii, wa gie ima, ni re emwa ni ka gha mwẹ idaehọ vbe uwu Kristi, rhie urhomwẹ ne uyi Osanobua.

Ẹfisọs 1:6

Wa gie ima rho Osanobua ye ẹsọhẹ nọ mwẹ uyi ọghọe, kevbe emwi ọhẹ ne ọ ya ru ima ẹse, vbe uwu ovbi ẹre ne ọ ghan!

Diuteronomi 32:27

Sokpan, mẹ i ra rhie otọ ne eghian iran ya gha rhuọ, wẹ iran khọn emwa mwẹ miotọ, vbe imẹ tobọ mwẹ dunmwu iran an nẹ.’

Jọsua 7:9

Avbe emwa Kenan, kevbe avbe emwa ọvbehe hia ni rre otọe na gha họn ẹmwẹ na. Iran ghi do lẹga ima, iran ghi gbele ima hia a. De emwi ne u wẹ ghẹ ghi ru ya da uyi eni ruẹn yi?”