U gha nọ emwi ne ọ si ẹe ne emwi na hia na sunu vbe egbe ruẹ, emwi ne ọ si ẹe ne ukpọn na yanghan ye uwẹ ẹkun, kevbe ne emwa na ye ẹtin mu ẹẹn guẹ gha ru emwi, emwi ne ọ sii ẹe ọrọre wẹ orukhọ ruẹ mu ohan gbe.
Sokpan, te imẹ wa bannọ ivbi Isọ rua fẹẹrẹ, I na vbe kie ehe ne iran lẹre yi hia yotọ sẹrriọ wẹ iran i ghi sẹtin lẹre ọvbehe. A fuẹn ivbi idom hia a fẹẹrẹ. A ma vbe sẹ okpa rae vbọ.
Uyi ne ọ rre ọre egbe fo, te ọ ghi bannuan te a ghi sọnnọẹn. Ọ gha khiẹkhiẹ egbe, te ọ ghi ye ekhue rhie aro lẹre. E Jerusalẹm keghi ya orukhọ dan ya iruẹn wuo egbe.
Rhunmwuda emwi na, I si avbe egbakhian ruẹn nẹdẹ hia koko, iran ne ẹmwẹ ọnrẹn gha yẹ ruẹ kevbe iran ne u ma ho ẹmwẹ ọnrẹn, I gha viọ iran rre ne iran do doga ruẹ, I ghi bannọ ọn ukpọn hẹ kua, ne iran miẹn uwẹ eban ra vbe u rre irhunmwuirhun.
I gha guọghọe rua ighe erhan ne ọ mọ ọmọ ne ọ ya ru ayọn, kevbe erhan ohọ hia, ne ọ khare ighe avbe esiọre ọ re ọ viọ ẹre ne irẹn, rhunmwuda iwinna ne ọ ye ne iran. I gha ya ogba azara ẹre kevbe erhan ohọ ẹre khian ẹgbo, aranmwẹ oha ghi rhia ẹre ua.