Jerimaia 10:5 - Edo Bible (E Baibol Ẹdo) Version 1996

⁵ Te avbe amazẹ vberriọ yevbe emuẹn muẹn ne a mu ye ugbo ogi, iran i sẹtin guan, te a dada iran khian, rhunmwuda, iran i sẹtin khian, wa ghẹ, gie ohan iran mu uwa, iran i mwẹ emwi okpa ne iran gha ru uwa ẹre iran i vbe sẹtin ru emwi okpa ne uwa.”

Jerimaia 10:5 ပူးပေါင်းရင်းမြစ်များ

I Ọba 18:26

Iran keghi mu ẹmila ne a mu gie iran, iran na mwamwa ẹẹn, iran na gha na erhunmwu ghe e Bal ya sẹ ẹghẹ ogiavan. Iran kegha go kha wẹẹ, “E Bal zẹ ẹmwẹ wanniẹn ima.” Iran na gha ku lẹga aka ne iran gba ẹe nii. Sokpan, ewanniẹn ma rre.

II Krọnikol 25:15

Emwi na keghi ya ohu mu e Nọyaẹnmwa, ọ na gie akhasẹ ọkpa bu Amezaia gha khian. Akhasẹ nii keghi nọ wẹẹ, “Vbọzẹ yi ne u na gha gho ẹbọ ẹrrẹe ne ọ ma kue sẹtin miẹn emwa rẹn fan vbe obọ ruẹ?”

Aizaia 16:12

Ivbi e Moab gha miẹn ẹsọn a gha wu a rrie, ne iran ya hin uhunmwu oke, ne iran na ya gha yo aro ẹbọ kevbe ẹgbo ẹbọ ni rrọ, ya gha na erhunmwu sokpan, ọ maa rhọkpa i ra ke ọe ladian ne iran.

Aizaia 45:20

E Nọyaẹnmwa khare wẹẹ, “Wa do si egbe koko, wa ne emwa ni rre uhunmwu ẹvbo, wa hia ni miẹn uhunmwu vbe arriọba nọkhua ni de. Wa ladian ne a do gui ẹzọ uwa. Iran ni gha mu amazẹ erhan, hẹ yo hẹ rre iran na gha na erhunmwu ghe ẹbọ ne ẹ i ra sẹtin miẹn iran fan, emwa nii ma zẹdẹ rẹn emwi rhọkpa hiehiere.

Aizaia 46:1

“Ufomwẹ avbe ẹbọ e Babilọn ọ re ọna khin! A te ka gha gho Bẹl kevbe Nebo yi, banbanna nian, te a ghi kun iran yan ekẹtẹkẹtẹ ihẹ Vbe iyeke aranmwẹ ne egbe wọre.

Aizaia 46:7

Iran ghi tọn ẹẹn mu yan izabọ iran, iran ghi ya ẹe kpao iran ghi mu ẹẹn ye ihe ẹre, ọ ghi gha rre evba, ẹ i sẹtin zẹ owẹ hin ehe ne ọ ye rre. Ọmwa gha na erhunmwu ghe ẹre, ẹ i sẹtin wanniẹn, ra ne ọ miẹn rẹn fan vbe obọ emwi dan.

Jerimaia 10:14

Emwa nagbọn gha miẹn ọna, iran ghi khian ni ọ zurọ ni i mwẹ ẹwaẹn, iran ni mannọ amazẹ ma rẹn emwi ne iran ru, rhunmwuda, ẹbọ nii, iran i mwẹ arrọọ, ohoghe vbe nọ.

Habakọk 2:19

Ọwuẹ fo! U gha khama ike erhan wẹẹ, “Rhiọrre!” kevbe ovbi okuta wẹẹ, “Kpaegbe!” Amazẹ gha sẹtin rhie emwi ne a ma rẹn rhọkpa ma ruẹn ra? A sẹtin ya esiliva kevbe igoru rhu ẹe, sokpan, orhiọn i rre uwu ẹre.

I Kọrinti 12:2

Wa rẹnrẹn wẹ, ẹghẹ ne uwa na gha re emwa ni ga ẹbọ kẹkan, avbe amazẹ ọre ọ gha ye uwa ru enegbe iran, iran na vbe gha ye uwa ba odẹ ku vbe ẹghẹ hia.

I Kọrinti 8:4

Vbe ekpa ọghe wẹ deghẹ ọ kere ne a gha rri emwi ne a ya ru ẹbọ, ma rẹnrẹn wẹ, emwi ne ẹbọ mudia ye ihe ẹre keghi re emwi ne ẹ i zẹdẹ rrọọ hiehiere. Ma rẹnrẹn wẹ, Osanobua ọkpa kẹkan ọre ọ rrọọ.

Diuteronomi 4:28

Wa ghi vbe gha ga ẹbọ ne a ye obọ emwa ne agbọn ma, ẹbọ ne a ya erhan kevbe okuta ma, ẹbọ nẹ ẹ sẹtin bẹghe ra ne ẹ họn ẹmwẹ, nẹ ẹ i sẹtin rri evbare ra ne ọ hẹn ẹwia.