I Timoti 5:6 - Edo Bible (E Baibol Ẹdo) Version 1996

⁶ Sokpan, okhuo ẹgbẹ ne ọ rhie egbe ẹre ye ne ọ gha zẹ ọwọbu, ọ wu nẹ, egbe ne ọ he rhe ya rre agbọn.

I Timoti 5:6 ပူးပေါင်းရင်းမြစ်များ

Gẹnẹsis 2:17

Sokpan ọnii ne ọ rhie ẹwaẹn ne a ya rẹn emwi ne ọ maa kevbe ne ẹ i maa ne ọmwa, ghe rri ọmọ rẹn. U gha rriọe, u gha wu ẹdẹ nẹdẹrriọ zẹẹ.”

Itan 29:21

Adeghẹ u wa viọ emwi ne ọguọmwadia a rhirhi nọ ne ẹn ke ẹghẹ ọvbokhan kpao, ẹdẹ ọkpa, ọ gha miẹn ruẹn emwi ruẹn hia.

Aizaia 22:13

Sokpan, ne uwa gha na te ru vberriọ, wa keghi gha giẹ, wa na gha gbe iza-bọbọ, wa na gha gbele ẹmila kevbe ohuan re, wa kegha da ayọn wa keghi kha wẹẹ, “Ma sẹtin gha re ne a vbe gha da! Akhuẹ, ma gha wulo.”

Aizaia 47:1

E Nọyaẹnmwa khare wẹẹ, “E Babilọn, tuorre vbe ẹkete ruẹ ne u do tota ye ebubẹ vbe otọ. Vbe ẹghẹ ọkpa, te u te yevbe ovbialeke, ẹvbo ne a ma khọn miẹn ẹre otọ sokpan, u i ghi re ne vbukhẹ kevbe ne sọguọsọguọ ọvbehe, ọviẹn ọ re u ghi khin na.

Jerimaia 6:2

Ore nọkhua ighe Zaiọn wa mose sokpan a gha dunmwu ẹẹn ruan.

Eve Orriara 4:5

Avbe emwa ni te ka rri evbare ni maa sẹẹ yi khian ne ohanmwẹ ghi gbele ye adesẹ ore. Avbe emwa ne a koko vbe uwu ọkpọkua khian ne ọ ghi zọ iku re vbe otiku.

Matiu 8:22

Jesu wanniẹn tama rẹn wẹẹ, “Lele mwẹ ne u gie avbe orinmwi gha re e emwa ni wulo iran.”

Iyẹn ne ọ Maan Ọghe Luk 12:19

I ghi tama egbe mwẹ wẹẹ, Uhunmwu ne ọ maa! Emwi esi ne ọ gha tọ la ukpo ni bun rre uẹ otọ nẹ nian, si orhiọn koko, gha re, gha da ne u gha zọmọ!’

Iyẹn ne ọ Maan Ọghe Luk 15:13

Vbe iyeke ikpẹdẹ eso, nekherhe ne ọ rrọọ keghi khiẹn emwi ne ọ se ọre obọ, ọ na mu igho ẹre, ọ na kpao vbe owa. Ọ na gha rrie ẹvbo ne ọ rrei ẹsẹse, ọ na ya ye uyinmwẹ ọpakharha lo ehia rhia.

Iyẹn ne ọ Maan Ọghe Luk 15:24

Rhunmwuda, ovbi mwẹ na te wu, ghe ighẹ ọ ye rre agbọn, ọ te wii, a miẹn ọẹn nian.’ Iran keghi gele suẹn gha rrie evbare.

Iyẹn ne ọ Maan Ọghe Luk 15:32

Sokpan ọ kere ne ima gha re ne a gha ghọghọ, rhunmwuda ọtuẹn na te wu, sokpan, ọ rre agbọn nian, ọ te wii, sokpan a dọlọ miẹn ọẹn.’ ”

Iyẹn ne ọ Maan Ọghe Luk 16:19

“Okpia ne ọ fe ọkpa kegha rrọọ, ogiukpọn ọre ọ ya haan vbe ẹghẹ hia, ọ ghi vbe gha lo emwi hia wọrhọwọrhọ ẹdẹgbegbe.

Iyẹn ne ọ Maan Ọghe Luk 7:25

De emwi ne uwa ladian ya ghee? Ọmwa ne ọ viọ ukpọn ni mose ye egbe? Sokpan emwa ni mu egbe vberriọ, ni vbe zẹ ọwọbu, ẹguae a na miẹn iran.

Ẹfisọs 2:1

Vbe ẹghẹ ne ọ gberra, wa kegha re ne ọ wulo vbe orhiọn, rhunmwuda a i họn ẹmwẹ kevbe orukhọ uwa.

Ẹfisọs 2:5

Wẹ ẹghẹ ne ima na re emwa ni wulo vbe ekpa ọghe orhiọn, vbe uwu iyin ehọ mwa, ọ keghi huẹn ima ye agbọn ba Kristi, ẹsọhẹ Osanobua ọre a ya miẹn uwa fan.

Ẹfisọs 5:14

Rhunmwuda emwi ne a ghi rhie ladian ne aro gba nẹ, uwanmwẹ ghi nọ, ọnii ọ si ẹe ne a na tae wẹẹ, “Rhiọrre, olovbe. Rhiọrre vbe orinmwi, Kristi gha wan uwanmwẹ muẹn.”

Diuteronomi 28:54

Uhin ya sẹ egbe adazẹ ne ọ ghi ru ọkhae ọmwa sẹ, ọ gha ba so ẹe sẹ vberriọ vbe a ghẹ ghi gha dunmwu ẹvbo ẹre wẹ, ọ ghi gbe ọkpa vbe uwu ivbi ẹre re rhunmwuda, ẹ i ghi mwẹ evbare ọvbehe, ẹ i vbe fian ne ọtiọnrẹn nọkpa vbọ, ra ne amwẹ ọnrẹn ne ọ hoẹmwẹ ọnrẹn, ra ne erhọkpa vbe uwu ivbi ẹre nii ghi ke ẹe.

Diuteronomi 28:56

Uhin ya sẹ egbe okpokhuo ne ohọnmi, ne ọ ghi mwẹ igho sẹrriọ wẹ ọ ma he ya owẹ khian yo ehe rhọkpa ẹdẹ. Erriọ ọ ra vbe ru. Eghian gha ghi dekun ẹvbo ẹre, obọ ohanmwẹ gha da ẹe sẹrriọ wẹ, ọ ghi lẹre rri ọmọ ne ọ da biẹ kevbe eru. Ẹ i vbe fian ne ọdọ ne ọ ho ẹmwẹ ọnrẹn ra ne erhọkpa vbe uwu avbe ivbi ẹre.

Kọlose 2:13

Vbe ẹghẹ ọkpa, wa hia keghi wulo vbe ekpa ọghe orhiọn, rhunmwuda orukhọ ne uwa ru, kevbe rhunmwuda wẹ, wa kegha re emwa ne ẹ i re Ju ni vbe lahin uwu nene Uhi rre. Sokpan, banbanna nian, Osanobua viọ uwa gha die arrọọ nẹ vbe uwu Kristi. Osanobua ye orukhọ ima hia bọ ima.

II Timoti 3:6

Eso vbe uwu iran ghi gha la owa, iran ghi ya gha lo iran vbene ọ khọn iran, ighẹ avbe ikhuo ne emitan, ne abe oghẹ orukhọ ne iran ru, yẹnyẹn ginna otọ, kevbe ne aho ughughan khu khian,

Jems 5:5

Ẹdẹ agbọn uwa vbe agbọn na keghi re ne ọ vuọn ne uyinmwẹ ọmọ ne ọ fuẹn ukhu kevbe uwa sẹ mwẹ obọ nẹ. Wa keghi ya egbe uwa khian ni kpọlọ khẹ ẹdẹ ne a gha gbe emwi.

Arhie Maan 18:7

Wa rhie oya kevbe irhia ẹko nẹẹn zẹ vbe uyi kevbe uyinmwẹ ọmọ ne ọ fuẹn ukhu, ne ọ rhie ne egbe ẹre, rhunmwuda, te irẹn wa gha tama egbe ẹre wẹẹ, ‘I tota vbe emwa, vbe ọba ne okhuo I i re okhuo ne ẹ i mwẹ ọdọ I i ra rẹn irhia ẹko ẹdẹ.’

Arhie Maan 3:1

“Gbẹn ebe gie odibosa esọsi ne ọ rre Sadis wẹ: “Uhunmwu ne ọ gie rre ọ na khin ighẹ ọmwa ne ọ mwẹ Orhiọn Ihinrọn ọghe Osanobua kevbe avbe orhọnmwẹ ihinrọn. I rẹn emwi ne u ru: I rẹnrẹn ighẹ te a wa kpe ọbọbọ nuẹn ighẹ u rre agbọn, vberriọ, u wu nẹ.

I Samuẹl 15:32

E Samuẹl keghi kha wẹẹ, “Wa mu Agag ne ọba bu mwẹ gha die emwa na.” Agag kegha dee vbene ọ na guọ vbe ọ dee. Ọ keghi kha wẹẹ, “Uwu mianmwẹ gbe!”

I Samuẹl 25:6

Ọna tama iran wẹ ne iran tama e Nabal wẹẹ, “E Devid wẹ do, ọse mwẹ, ọ na erhunmwu guẹ ẹsẹse, kevbe ẹgbẹe ruẹ kevbe emwi ruẹn hia.