I Timoti 5:10 - Edo Bible (E Baibol Ẹdo) Version 1996

¹⁰ A ghi vbe gha so eni ẹnrẹn ẹse ye uyinmwẹ ne ọ maa, okhuo nọ koko ivbi ẹre ẹse, ne ọ miẹn avbe orhunmwuyẹn yi vbe owa ẹre, ne ọ vbe kpe emwa Osanobua owẹ, ne ọ vbe ye iran ni rre uwu ọlọghọmwa obọ, ne ọ vbe rhie egbe ye ne ọ gha winna iwinna ni maa hia.

I Timoti 5:10 ပူးပေါင်းရင်းမြစ်များ

I Timoti 6:18

Tama iran, ne iran gha ru emwi esi, ne iran gha re ni fe vbe emwi esi ne a ru, ne iran gha zẹ emwi obọ, ne iran vbe mu egbe ne iran gha ya ghae ne emwa ọvbehe.

Taitọs 3:8

Ẹmwata ọre ẹmwẹ na khin. I ho ne u kakabọ tua unu mu ẹmwẹ na, ne iran ni ya Osanobua yi miẹn ehe na mu aro ye ẹmwẹ iwinna esi ne a winna. Ena ọrọre emwi ne ọ maa kevbe ne ọ ke ne emwa.

Iwinna 9:36

Okhuo ọkpa ne a tie ẹre Tabita keghi rre Jopa, ọmwa iyayi nọ. (Dọkas ọre a tie ẹre vbe Grik, emwi ne a ya ọnii kha ọrọre ẹrhuẹ.) Ọ lo ẹghẹ ẹre ye iwinna ne ọ maa kevbe ne ọ gha ye avbe ivbiogue obọ.

Taitọs 3:1

Ye avbe emwa ruẹn ẹre rre, ne iran gha gbe uhunmwu ke otọ ne iran ni rre asẹ kevbe ọdakha, ne iran gha họn ẹmwẹ ne iran, ne iran mu egbe ne iran gha ya gha ru emwi ne ọ maa vbe ẹghẹ hia.

Taitọs 2:7

Wẹ tobọ ruẹ gha re igiemwi vbe uwu iwinna esi hia. U ghi mu aro yọ ne u vbe gha ta ẹmwata vbe u a gha ma emwa emwi.

II Timoti 3:17

Ne a miẹn ehe na miẹn wẹ, ọmwa ne ọ ga Osanobua ghi gha re ne a gbalọ ẹre egbe ye otọ, kevbe ne ọ sẹe ne ọ gha winna iwinna ne ọ maa hia.

Ebe ne Pọl gbẹẹn gie emwa Rom 12:13

Wa gha ghae ne etẹn uwa ne ẹ i mwẹ emwi vbe uwu emwi ne uwa mwẹ, wa gha sẹ oyaya mu erhunmwuyẹn.

Iyẹn ne ọ Maan Ọghe Luk 7:44

Rẹn keghi mu aro da okhuo nii, ọ tama Saimọn wẹẹ, “U ma miẹn okhuo na? Vbe I la owa ruẹ, u ma sa amẹ mẹ ya kpe owẹ, sokpan rẹn ye ameve ẹre kpe mwẹ owẹ, ọ keghi ya eto ne uhunmwu ẹnrẹn khiẹn rẹn uan.

Matiu 5:16

Erriọ nọ zẹẹ, wa gie ukpa rua gha ba ẹse vbe odaro agbọn, ne iran miẹn ehe na lekpa uyinmwẹ esi ne uwa yin gha rho erha uwa ne ọ rre ẹrinmwi vbe uyi.

I Pita 2:12

Wa gie uyinmwẹ ne uwa yin maa sẹ rriọ vbe uwu ẹbu avbe eni ma yayi wẹ, iran gha ba uwa ifi ẹzọ wẹ emwi dan ọre uwa ru, iran ghi vbe tobọ iran kha wẹ, wa vbe ru emwi esi, rhunmwuda ọnii, iran ghi rho Osanobua vbe Ẹdẹ ne ọ ra rre.

Hibru 13:21

Osanobua ọfumwegbe ne ọ viọ emwi ni maa hia ne uwa ho ne uwa, vbe ne uwa gha na sẹtin ru vbene irẹn ho, kevbe ne ọ vbe la ekpa Jesu Kristi ru emwi ne ọ yẹ ọre vbe uwu ima. Jesu Kristi ọre uyi gha rrọọ na ẹdẹ kevbe ẹdẹdẹmwẹdẹ! Isẹ.

Hibru 13:2

Wa gha rhie orhunmwuyẹn la owa. Emwa eso rrọọ ni ru vberriọ, iran na viọ, avbe odibo Osa la owa, vbene iran ma na rẹn.

Hibru 10:24

Wa gie ima gha zẹ ye ẹmwẹ egbe, ne ima gha ye egbe obọ, ne a gha mwẹ aho ẹmwẹ ọmwa, kevbe ne a gha ru emwi esi.

Taitọs 3:14

Ma emwa ima ẹre ne iran gha lo ẹghẹ iran ya winna iwinna esi, ne iran gha khuan ye emwi ne ọ kere ne a gha mwẹ. Wẹ ne iran ghẹ gha rre agbọn ọ rhiae.

Taitọs 2:14

Rẹn keghi rhie egbe ẹre ne ima, khian emwa ne ẹ i mwẹ iruẹn, ne ọ re ọghe irẹn ọkpa, kevbe ne ho ne iran gha ru emwi esi.

Iyẹn ne ọ Maan Ọghe Luk 7:38

Ọ mudia ye ọkpẹn owẹ Jesu vbe odieke ẹre, ọ kegha viẹ, ọ na gha kharha ameve ye ọre owẹ, ọ ye unu soso ẹre owẹ, ọ keghi tue ori ne ọ winhin nii ye ọre owẹ.

Gẹnẹsis 18:4

Gunmwẹ wẹ ne iran sa amẹ ya kpe uwa owẹ, wa sẹtin hẹwẹ vbe emwana, vbe ototọ erhan na.

III Jọn 1:12

Emwa hia ọre ọ wa na iyẹn Demetriọs ne ọ maa, ẹmwata tobọ ẹre vbe ta ẹmwẹ ọnrẹn ne ọ maa. Ma keghi vbe rhie osẹe ima ba ẹre, wa tobọ uwa rẹnrẹn wẹ, ẹmwẹ ne I ma ta, ẹmwata nọ.

I Pita 4:9

Wa gha khian ẹlẹ tuẹ egbe, vbe ne a i na gui ẹzọ egbe.

II Timoti 3:15

U vbe rẹn wẹ, ke ẹghẹ ọvbokhan ruẹn gha dee, u keghi wa rẹn Ebe nii, ne ọ sẹtin rhie nuẹn ighẹ ẹwaẹn ni ne ọ su ọmwa la imiẹnfan, vbe ekpa ne a na ya Kristi Jesu yi.

II Timoti 2:21

A deghẹ ọmwaikọmwa yuo egbe ẹre hin uwu avbe emwi dan na rre, rẹn ghi gha re ne a lo vbe ẹghẹ kpataki, rhunmwuda rẹn ya egbe fi ohan, ọ keghi vbe guobọ arowa ẹre, ọ mu egbe vbe ẹghẹ hia, ne a ya lo ẹre ye emwi ne ọ maa.

II Timoti 1:5

I ye iyayi ẹmwata ne u mwẹ rre, egbe ne edede ruẹ gha mwẹ ighẹ Luis, kevbe Yunis ne iye uẹ vbe gha mwẹ, mẹ yayi ighẹ wẹ vbe mwẹ ọnrẹn.

I Timoti 5:25

Erriọ vbe nọ zẹ, uyinmwẹ esi, te ọ wa de we aro ua, uhin avbe ne a i rherhe rẹn ni rrọọ, iran i vbe gia rhie lẹre.

I Timoti 2:10

Sokpan, ọ ghe uyinmwẹ ne ọ maa zẹ vbe ne ọkere ne ikhuo ni khare ighẹ emwa iyayi ọre iran khin.

Kọlose 1:10

Ẹghẹ nii, wa ghi sẹtin do gha yin vbene Nọyaẹnmwa ho, wa ghi vbe gha ru emwi ne ọ yẹ ọre. Ẹdẹ agbọn uwa ghi do gha mọ ọmọ iwinna ne ọ maa ughughan hia, wa ghi vbe gha wan yọ vbe uwu vbe ne uwa rẹn Osanobua hẹ.

Ẹfisọs 2:10

Osanobua ọre ọ yi mwa, vbe uwu a ku egbe kugbe ba Kristi Jesu, ọ keghi yi ima ye ẹdẹ agbọn iwinna esi, ne irẹn mwamwa ye otọ khẹ mwa ne a gha ru.

Iwinna 22:12

“Okpia ọkpa ne a tie eni ẹnrẹn Ananaias keghi rrọọ, ọmwa ne ọ mwẹ ekhọe ne a ya ga ẹsẹse, ọ kevbe ya Uhi ima ru emwi, ọ keghi vbe gha re ne ivbi e Ju hia ni rre Damaskọs ya ọghọ na ẹsẹse.

Iwinna 10:22

Iran wanniẹn wẹẹ, “Kọniliọs ne ọka okuo ọre ọ gie ima gha dee. ọmwa esi ne ọ ga Osanobua ọre nọ, emwa Ju hia wa ya ọghọ nẹẹn ẹsẹse. Odibo Osanobua ọkpa ọre ọ tama rẹn ne ọ gie ne a tie ruẹ gha die owa ẹre, ne ọ miẹn ehe na họn ẹmwẹ ne u mwẹ ne u gha ta ma rẹn.”

Iwinna 9:39

Rhunmwuda ọnii, Pita mu egbe ọ keghi lele iran gha khian. Ọ ghi sẹ evba, iran keghi rhie ẹre gha rrie nene ughugha vbe egedege. Avbe ẹgbẹe hia keghi mama rhuẹe, iran gha viẹ, iran kegha viọ ẹwu ọkotọ kevbe ọkodukhunmwu ne a sele vbe ẹghẹ ne ọ na rre agbọn ma emwa.

Iwinna 6:3

Rhunmwuda ọnii, etẹn mwẹ, wa viọ arhin ihinrọn ladian vbe uwu uwa, emwa n a rẹnrẹn ighe iran vuọn ne Orhiọn Ne Ọ Huanrẹn kevbe ẹwaẹn, ne a mu iwinna na ye iran obọ.

Aizaia 1:17

ne uwa ruẹ vbene a ru emwi esi hẹ. Wa miẹn wẹ a ru emwi vbene ọ kei yi, wa gha ru iyobọ ne iran ne a zẹ kpokpo, rhie emwi ne ọ khẹke avbe ne ẹ i mwẹ erha ne iran, wa rria ikhi ne avbe ẹgbẹ.”

Psalm 119:4

Nọyaẹnmwa, wẹ rhie uhi ruẹ ne ima nẹ, u na wẹ ne ima gha ya ẹe ru emwi ekhọe kekhọe.

Levitikọs 25:35

“A deghẹ ovbi Izrẹl ne ihua ne ọ yin diake uẹ khian ovbiogue ighẹ ẹ i ghi sẹtin koko egbe ẹre, u ghi gha koko ẹe zẹ vbe ne u gha koko ọmwa ne u rhie vbe iwinna ne ọ miẹn ehe na sẹtin gha yin diake uẹ.

Gẹnẹsis 24:32

Ẹre okpia nii na la owa, e Leban keghi bannọ ihẹ hin egbe avbe ekẹtẹkẹtẹ rre, ọ keghi viọ irunmwu kevbe evbare ne iran, ọ kevbe sa amẹ gie ọguọmwadia Ebraham kevbe emwa rẹn ya kpe owẹ.

Gẹnẹsis 19:2

Ọ na kha wẹẹ, “Adazẹ, te I rre do mu ọghọ ye uwa egbe, lahọ wa gha die owa mwẹ, wa sẹtin kpe owẹ ne uwa gbe asọn na mwa. Wa sẹtin rhiọ vbe owiẹ ne uwa gha rrie ehe ne uwa rrie.” Sokpan iran wanniẹn wẹẹ, “Ẹn o, adesẹ ore vbe ihuada ẹvbo na ma ra vbiẹ.”

I Timoti 5:16

Sokpan, adeghẹ okhuo iyayi mwẹ ẹgbẹ eso vbe uwu avbe etẹn ọnrẹn, wẹ ne ọ gha gbe aro ghe iran, ne ọ ghẹ vbe ya ye esọsi egbe, ne ọ miẹn ehe na miotọ ya gha gbe aro ghe avbe ẹgbẹ ni re rẹn ọkpa vbe ẹhi ẹre.

I Timoti 3:7

Ọ kere ne ọ gha re ọmwa ne emwa hia nii yo esọsi ya ọghọ na, ne a ghẹ ya fa ẹre ua ne ọ ya de ye ifi Esu.

Gẹnẹsis 43:24

Ọguọmwadia nii keghi viọ emwa nii gha die owa e Josẹf, ọ keghi sa amẹ ne iran ya kpe owẹ, Ọ na rhie evbare ne ekẹtẹkẹtẹ iran.

I Timoti 3:2

Ọ kere ne Ọkaolotu esọsi gha re ọmwa ne ẹ i mwẹ abaku ru, ọ ghi gha mwẹ okhuo ọkpa kẹkan, ọ ghi gha re ọmwa ne aro hianrẹn, kevbe ne ọ rẹn enegbe, kevbe ne ọ ru emwi uhẹn uhẹn, ọ ghi gha miẹn avbe erhunmwuyẹn yi vbe owa ẹre, ọ ghi sẹtin gha ma emwa emwi.

Matiu 25:17

Erriọ zẹẹ, ne a mu enaira arriaisẹn eva na, keghi vbe miẹn enaira arriaisẹn eva vbe ere.