I Timoti 1:11 - Edo Bible (E Baibol Ẹdo) Version 1996

¹¹ Ọnii nọ wẹ, iruẹmwi ne ọ rre uwu Iyẹn Ne ọ maa ne a mu yọ mwẹ obọ ne I gha kpe orhu ẹre khian, Iyẹn Ne ọ maa nii ne ọ ke obọ Osanobua ne ọ mwẹ uyi kevbe ne a fiangbe rre.

I Timoti 1:11 ပူးပေါင်းရင်းမြစ်များ

Galatia 2:7

Sokpan, iran keghi miẹn wẹ te Osanobua ya ẹe ghae okhuo mẹ wẹ, ne I ya gha kpe orhu iyẹn ne ọ maa ma avbe iran ne ẹ i re Ju, zẹ vbene ọ vbe ghae ẹre ne Pita ne ọ ya gha kpe orhu ma iran ne Ju.

Taitọs 1:3

ọ ghi vbe sẹ ẹghẹ ne ọ kei yi, ọ keghi gie uhunmwu ya ta ẹe ladian ne ima họn. Ọnọna ọre a mu yọ mwẹ obọ, vbene Osanobua Ọmiọnmwafan mwa gie, ọ re I ta ẹe khian.

I Timoti 6:15

Osanobua gha ruẹe ne ọ ye egbe ladian, vbe ẹghẹ ne ọ kei yi, rẹn ne ọ re Nọkhaemwisẹ ọkpa kẹkan, ne a fiangbe. Ọba iran ne ọba kevbe Nọyan iran ne ni yan ẹvbo.

II Kọrinti 4:4

Iran ma yayi, rhunmwuda ẹbọ dan ọghe agbọn na mu ekhọe iran dee ye uwu ebiebi nẹ. Ọ ma gie iran bẹghe uwanmwẹ ne ọ wan mu iran, uwanmwẹ ne ọ ke Iyẹn Ne ọ maa vbe ekpa uyi Kristi rre, ọmwa ne ọ re ama ne a ya gie Osanobua dandaandan.

Ebe ne Pọl gbẹẹn gie emwa Rom 2:16

Zẹ vbene Iyẹn Ne ọ maa ne I kpe orhu ẹre kha re, erriọ ọre ọ khian gha ye vbe Ẹdẹnẹdẹrriọ, ne Osanobua gha la obọ Jesu Kristi bu ohiẹn iro ẹkhokho ni rre ekhọe emwa hia.

II Timoti 2:2

U ghi viọ avbe ẹmwẹ nii ne u họẹn vbe I kpe orhu ẹre vbe odaro osẹe ni bun, u ghi viọ ne emwa ne u gha sẹtin mu ẹtin yan viọ mwẹ, emwa ni gha vbe sẹtin ma emwa ọvbehe re.

II Timoti 1:14

Viọ iran mwẹ ighẹ avbe emwi esi ne a ka yuẹ obọ, vbe ekpa ẹtin ọ ghe Orhiọn Ne Ọ Huanrẹn ne ọ rre uwu ima.

II Timoti 1:11

Osanobua zẹ mwẹ, ne I gha kpe orhu nene Iyẹn Ne ọ maa, zẹ vbe ukọ kevbe ọmaemwaemwi.

I Timoti 6:20

Timoti ye obọ da ẹe yi vbe ne a i na mwẹ ẹbe, ighẹ emwi ne a ka ye uẹ obọ. Ghẹ mwẹ obọ vbe ọta ne ẹ i mwẹ emwi ne ọ khọ ọghe Osanobua, kevbe imuaẹmwẹ ukọnmwẹ, egbe emwi ne emwa ukọnmwẹ tie ẹre “Irẹnmwi.”

I Timoti 2:7

Ọna ọre ọ vbe zẹ ne a na gie mwẹ zẹ vbe ukọ kevbe ọmamwaemwi avbe iran ne ẹ i re Ju, ne I ya gha kpe orhu iyayi kevbe ẹmwata. Ẹ i re ohoghe I ta, ẹmwata I ta.

I Tẹsalonaika 2:4

Vberriọ, vbe ne Osanobua wẹ ne ima gha guan, ọre ima ya guan, rhunmwuda, Osanobua gba ẹko ima, ọre ọna mu ẹmwẹ Iyẹn Ne ọ maa ye ima obọ. Ẹ i re ne ọ gha yẹ emwa ne agbọn ma ru, vbe ẹ i re ne ọ gha yẹ Osanobua ọmwa nọ danmwẹ emwi ne ọ rre ima ekhọe ghe.

Kọlose 1:25

Osanobua vbe ya mwẹ ru ọguọmwadia esọsi nẹ, ọmwa ne ọ mu iwinna na mẹ winna, ne umamwẹ uwa. Ne iwinna ọrọre ne a gha ta ẹmwẹ nene iyẹn ne ọ maa ọta fo.

Ẹfisọs 3:10

Ne a miẹn ehe na miẹn wẹ, ọ gha ghi sẹ ẹghẹ na, avbe ọdakha, odibosa, kevbe avbe ẹtin ni rre ẹrinmwi, ghi la ekpa esọsi do rẹn ẹwaẹn Osanobua vbe dọmwadẹ ihe ne ọ wa egbe yi.

Ẹfisọs 2:7

Te irẹn ru ọna, ne aro ẹvbo miẹn ehe na sẹ ọe rhinrin do sẹ ẹghẹ ne ọ dee ighẹ ọwọrhọwọrhọ ọghe ẹsọhẹ ọghọe, vbe uwu aho ẹmwẹ ọmwa ne irẹn mwẹ ghe mwa vbe uwu Kristi Jesu.

Ẹfisọs 1:12

Rhunmwuda ọnii, wa gie ima, ni re emwa ni ka gha mwẹ idaehọ vbe uwu Kristi, rhie urhomwẹ ne uyi Osanobua.

Ẹfisọs 1:6

Wa gie ima rho Osanobua ye ẹsọhẹ nọ mwẹ uyi ọghọe, kevbe emwi ọhẹ ne ọ ya ru ima ẹse, vbe uwu ovbi ẹre ne ọ ghan!

II Kọrinti 4:6

Osanobua ne ọ kha re wẹẹ, “Uwanmwẹ gha wan ke uwu ebiebi ladian,” ọre ọ vbe wan uwanmwẹ ọnrẹn ye ima ekhọe, ne ọ rhie uwanmwẹ ọghe a rẹn uyi Osanobua ne ima, zẹ vbe ne ọ wan ladian vbe ugbaro Kristi.

I Kọrinti 9:17

A deghẹ ekhọe obọ mwẹ ọre I ya winna, I sẹtin rhie aro yọ wẹ a gha ha mwẹ osa, sokpan ugbẹn vbe a miẹn wẹ iwinna ne ọ khẹ ke mwẹ nọ, ọnii rhie maa wẹ te I ru ẹe zẹ vbe okhuo ne a fian mẹ.

Iyẹn ne ọ Maan Ọghe Luk 2:14

“Uyi nọ ne Osanobua vbe ẹrinmwi ne ọ yo sẹ. Kevbe ọfumwegbe ne emwa ne ẹko ẹre rhiẹnrhiẹn ghe vbe agbọn!”

Psalm 138:2

Mẹ werriẹ aro da Ọgua Osa ruẹ ne ọ huanrẹn, I vbokho egbe rriotọ, I kevbe rho eni ruẹn, rhunmwuda ahoẹmwọmwa ruẹn ne ẹ i beghe, kevbe ẹmwata ruẹ, rhunmwuda, we rhie maa nẹ wẹ, eni ruẹn kevbe iyi ruẹ, ne ẹ i mwẹ ihegbe nọ.