I Tẹsalonaika 4:7 - Edo Bible (E Baibol Ẹdo) Version 1996

⁷ Osanobua ma tie ima ne a do gha yin uyinmwẹ alama oghẹ, sokpan ne a do gha re ne ọ mwẹ uyinmwẹ ne ọ huanrẹn.

I Tẹsalonaika 4:7 ပူးပေါင်းရင်းမြစ်များ

Levitikọs 11:44

Mẹ ọre Nọyaẹnmwa Osanobua rua, wa ghi ya egbe khian ni huanrẹn rhunmwuda ọmwa ne ọ huanrẹn ọre ime khin.

Levitikọs 19:2

ne ọ tama ivbi Izrẹl wẹẹ, “Wa gha re ni huanrẹn rhunmwuda ọmwa ne ọ huanrẹn mẹ khin. Mẹ ọ re Nọyaẹnmwa Osanobua uwa.

Ebe ne Pọl gbẹẹn gie emwa Rom 1:7

Rhunmwuda ọnii, ọre I na gbẹn ebe gie uwa hia ni rre Rom ne Osanobua ho ẹmwẹ ọnrẹn, ọ na tie uwa ne uwa do gha re emwa irẹn. Te Osanobua ne Erha mwa kevbe Nọyaẹnmwa Jesu Kristi gha rhie ẹsọhẹ kevbe ọfumwegbe ne uwa.

I Kọrinti 1:2

gie esọsi Osanobua ne ọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghọe rhunmwuda ighẹ iran ya egbe ba Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹ vbe Nọyan iran kevbe ima.

Galatia 5:19

Ọwarọkpa ọre a ya rẹn emwi ne egbe ru, ehe ne a na miẹn ọẹn ọrọre uyinmwẹ alama oghẹ, iruẹn kevbe osọnnọ,

Ẹfisọs 1:4

Vbe a te do yi agbọn, Osanobua hannọ ima zẹ nẹ ne ima gha re ọghe ẹe vbe uwu Kristi, ne ima sẹtin gha re ne ọ huanrẹn kevbe ne ẹ i mwẹ abe vbe odaro ẹre. Rhunmwuda aho ẹmwẹ ọmwa rẹn.

Ẹfisọs 2:10

Osanobua ọre ọ yi mwa, vbe uwu a ku egbe kugbe ba Kristi Jesu, ọ keghi yi ima ye ẹdẹ agbọn iwinna esi, ne irẹn mwamwa ye otọ khẹ mwa ne a gha ru.

Ẹfisọs 4:1

Rhunmwuda ọnii, I mobọ yatua uwa, mẹ ne ọre oleghan rhunmwuda ighẹ I ga Nọyaẹnmwa, wa gha ru emwi zẹ vbene ọ sikẹ ukpo ne Osanobua mwa ne uwa, vbe ẹghẹ ne ọ na tie uwa.

Ẹfisọs 4:19

Iran i ghi rẹn emwi ne a tie ẹre ekhue, iran wa fan egbe iran fi uwu iba ne a zẹ, iran keghi vbe yin uyinmwẹ osọnnọ hia vbe ne a i na vbe ghe iyeke.

I Tẹsalonaika 2:3

Rhunmwuda, ẹmwẹ ne ima do gu uwa guan i re ne a ye abakuru muhẹn, ra ne ọ mwẹ emwi ọvbehe ne a gualọ vbọ, erriọ, ma ma vbe ho ne a do ọmwa rhọkpa ọzua.

II Timoti 1:9

Ọ miẹn ima fan, ọ kevbe tie mwa ne a do gha re emwa irẹn, ẹ i re rhunmwuda emwi ne ima ru, sokpan vbe ọghe ekhọe obọ ẹre kevbe ẹsọhẹ. Ọ rhie ẹsọhẹ na ne ima nẹ, vbe uwu Kristi Jesu, ẹghẹ te do suẹn.

Hibru 12:14

Hia ne u gu emwa hia gha rrọọ vbe ọfumwegbe, kevbe ne u vbe yin uyinmwẹ, ne ọ huanrẹn, rhunmwuda vbe ne ọnii i na rrọọ, orhiọnkpa ne ọ gha sẹtin miẹn Nọyaẹnmwa aro, ẹ i rrọọ.

II Pita 2:10

Ibiba avbe emwa ni lele orriarria emwi ohọhọ egbe iran, iran na vbe yagha ẹtin Osanobua. Avbe emamwaemwi ohoghe na keghi re emwa itengbemu, ni vbe ze vbe udu. Iran i ya ọghọ ne emwi ni rrọ ni mwẹ uyi, ni rre odukhunmwu, sokpan, iran ghi gha ya ukpẹ sakan iran.