I Samuẹl 30:6 - Edo Bible (E Baibol Ẹdo) Version 1996

⁶ Uwu ọlọghọmwa nọkhua ọre Devid ghi ye rhunmwuda ẹko ma maa rẹn hiehie rhunmwuda ivbi iran ne iran ma ghi miẹn, iran na gha yan ighẹ iran ra filo okuta gbe ẹe rua, sokpan, e Nọyaẹnmwa ne Osanobua ẹre keghi rhie igiẹudu ne ẹẹn.

I Samuẹl 30:6 ပူးပေါင်းရင်းမြစ်များ

Gẹnẹsis 32:7

Ohan keghi mu e Jekọb ẹsẹse, iro na han rẹn. Ọ keghi wa emwa ni guẹe, ohuan, kevbe ẹwe kevbe ekẹtẹkẹtẹ ye ihe eva.

II Samuẹl 17:8

wẹ rẹnrẹn wẹ erhaa kevbe emwa rẹn, ekpakpasusu iran khin vbe igbinna kevbe wẹ iran khọ sẹ akpakomiza ne a munọ ẹre emọ vbe uwu oha. Erhaa, ovbiyokuo ne ọ kpe agbọn nọ, ẹ i vbe di ehe ne emwa rẹn ye ya vbe asọn.

II Ọba 4:27

sokpan ọ ghi sẹ ehe ne Elaisia ye, ọ keghi vbokho egbe rriotọ ne ẹẹn, ọ na da ẹre owẹ yi. E Gehazi tera sua okhuo nii fua, sokpan, Elaisia keghi tama rẹn wẹẹ, “Sẹ ọe rae. Wẹ ma miẹn wẹ uwu obalọ ekhọe nọkhua ọre ọ ye na? E Nọyaẹnmwa ma vbe zẹdẹ ya ẹmwẹ ha mwẹ ehọ vbe ekpa ẹre hiehiere.”

Job 13:15

Idaehọ mwẹ fo nẹ, rhunmwuda ọnii, ẹ i ghi mwẹ asa a deghẹ Osanobua gbe mwẹ uan. I gha gui ene unumwẹ ma rẹn.

Psalm 116:10

I keghi ye yayi, egbe ne I rhe ya kha wẹẹ, “A rẹnkhẹn mwẹ uan nẹ.”

Psalm 138:3

U zẹ ẹmwẹ wanniẹn mwẹ vbe I kpe tie ruẹ, u keghi ya ẹtin ruẹn, rhie ẹtin yọmwẹ iwu.

Psalm 18:2

Nọyaẹnmwa ọrọre ne ọ degue mwẹ, rẹn ọrọre owa ọkhẹ mwẹ ne ọ wegbe. Osanobua mwẹ ọrọre ne ọ rhie mwẹ lẹre I gha rre ehe ne ọ ye, ẹbe ighi rrọ mẹ. Ọ degue mwẹ zẹ vbe asa. Ọ gbinna mẹ, ọ keghi wan ẹbe yo mẹ.

Psalm 18:6

vbe uwu ibaro mwẹ, I da tie Nọyaẹnmwa, I da tie Nọyaẹnmwa ne ọ do yọmwẹ obọ. Ọ họn urhu mwẹ vbe uwu Ọgua Osa ẹre. Ọ họn ẹn vbe I da tie ẹre ne ọ do yọmwẹ obọ.

Psalm 25:17

Mu ohawa mwẹ hin mwẹ uhunmwu rre. Ne u vbe fan mwẹ vbe ibaro mwẹ hia.

Psalm 27:14

Mu ẹtin yan e Nọyaẹnmwa, gha mwẹ iyayi ghẹ gie ẹtin fo uẹ mu ẹtin yan e Nọyaẹnmwa.

Psalm 31:24

Wa wegbe, ne uwa vbe din, wa hia ni mwẹ idaehọ vbe ehe ne Nọyaẹnmwa ye.

Psalm 42:11

Vbọzẹ yi, ne ekhọe mwẹ na rhia vbenian vbọzẹ ne orhiọn mwẹ ma na sotọ I gha hẹnhẹn idaehọ mwẹ yan Osanobua I gha vbe dọlegbe rho ẹre, ọmiọnmwafan mwẹ kevbe Osanobua mwẹ.

Psalm 42:5

Vbọzẹ yi ne ekhọe mwẹ na rhia vbenian? Vbọzẹ ne orhiọn mwẹ ma na sẹ otọ? I gha hẹnhẹn idaehọ mwẹ yan Osanobua I gha vbe dọlegbe rho ẹre ọmiọnmwafan mwẹ kevbe Osanobua mwẹ.

Psalm 56:11

Rẹn ọ re I mu ẹtin yan ohan i ra mu mwẹ de emwi ne ọmwa kẹkan gha sẹtin ru mwẹ re?

Psalm 62:1

I hẹko ya izin egbe mudia khẹ Osanobua ne ọ do miẹn mwẹ fan. Rẹn okpa kẹkan ọre I mu ẹtin yan.

Psalm 62:5

Osanobua okpa ọ re I ya egbe yan idaehọ mwẹ vbe rre ọghọe.

Psalm 71:4

Osanobua mwẹ, yuo mwẹ hin obọ emwa dan rre, hin obọ ẹtin emwa ne ekhọe ẹre rri, kevbe emwa dan.

Psalm 71:5

Ọba Nọyaẹnmwa, uwu uwẹ mẹ na mwẹ idaehọ, wẹ ọ re I mu ẹtin yan ke ẹghẹ ọvbokhan mwẹ gha dee.

Ẹksọdọs 17:4

E Mosis keghi kakabọ na erhunmwu ghe Nọyaẹnmwa wẹẹ, “Vbe I a ra ru emwa na hẹ yi? Te iran ghi ra filo okuta ya gbe mwẹ uan.”

Itan 18:10

Te Nọyaẹnmwa ye vbe owa ọkhẹ ne ọ wegbe, ehe ne emwa esi gha lẹ fi, iran ghi vbe miẹn uhunmwu.

Aizaia 25:4

Ivbiogue kevbe iran ne ẹ i mwẹ iyobọ lẹẹ bu ruẹ rre iran kegha rrọ vbe a i mwẹ ẹbe vbe ẹghẹ ibaro. U rhie ehe ne iran lẹre yi vbe ẹghẹ okpẹhoho, kevbe irhu vbe ẹghẹ owowo ne ọ tọn. Emwa dan gbinna zẹ vbe ẹhoho okhuakhua

Jerimaia 16:19

E Nọyaẹnmwa, wẹ ọrọre ọmwa ne ọ degue mwẹ kevbe ne ọ rhie ẹtin mẹ wẹ ọ re ọ yọmwẹ obọ vbe ọghe ibaro. Avbe uhunmwu ẹvbo gha ke ufomwẹ agbọn bu ruẹ rre do kha wẹẹ, “Avbe erha ima odede i mwẹ emwi rhọkpa gberra ẹbọ ohoghe, emwirhọkpa i rrọọ gberra amazẹ ne ẹ i mwẹ asa.

Jona 2:2

“I kpetie ruẹ Nọyaẹnmwa, vbe usẹ, mwẹ, wẹ keghi zẹ mwẹ wanniẹn mwẹ. Ehe ne ọ dinmwi vbe ẹvbo iran ni wulo nẹ I tu nọ iyobọ, u keghi họn ọghomwẹ.

Nọmbas 14:10

Emwa nii ghi te ra filo okuta gbele iran an, sokpan vbe udomwurri, iran keghi ya bẹghe vbe uwanmwẹ ne ẹ i gia ghe nii ne ọ rhie maa we Nọyaẹnmwa re evba, rhie egbe ladian yan Owa Ukpọn Ile.

Matiu 21:9

Avbe emwa ni ke odaro ne Jesu kevbe ni rre ọre odieke keghi tọn urhu mu kha wẹẹ, “Urhomwẹ nọ ne ovbi e Devid. Afiangbe Osanobua nọ ne ọmwa ne ọ dee vbe eni Nọyaẹnmwa, Uyi nọ ne Osanobua.”

Matiu 27:22

Pailet nọ iran wẹẹ, “Vbe uwa ghi wẹ ne I ru Jesu ne a tie ẹre Kristi hẹẹ?” Iran hia keghi wanniẹn wẹẹ, “Kan rẹn mu ugbugbe.”

Iyẹn ne ọ Maan Ọghe Jọn 8:59

Iran keghi mu nọ okuta ne iran filo gbe ẹe, sokpan Jesu rhie egbe lẹre, ọ keghi kpao vbe Ọgua Osa rre.

Ebe ne Pọl gbẹẹn gie emwa Rom 4:18

Ebraham yayi, ọ keghi vbe gha mwẹ idaehọ vbe ẹghẹ ne idaehọ i na rrọọ, rhunmwuda ọnii, ọ keghi do khian erha uhunmwu ẹvbo ni bun. Zẹ vbene ebe ta ẹe wẹ, “Ekhuarha ruẹ gha bun.”

Ebe ne Pọl gbẹẹn gie emwa Rom 4:20

Iyayi ẹre ma sẹ ọe rae, vberriọ, ọ ma vbe bọ iro eva ye emwi ne Osanobua ve, iyayi ẹre keghi rhie orhiọn ye ọre iwu, ọ keghi rho Osanobua vbe uyi.

Ebe ne Pọl gbẹẹn gie emwa Rom 8:31

Ugbẹn vbe a ghi miẹn nian wẹ erriọ ọre emwi hia ye, vbe ima gha ghi kha hẹẹ? Deghẹ ma ọre Osanobua deba, de ọmwa ne ọ gha sẹtin mu aro da ima?

II Kọrinti 1:6

Deghẹ ma rri oya, rhunmwuda iyobọ kevbe imiẹnfan uwa nọ, a deghẹ a ye ima obọ, evba ọre a na vbe ye uwa obọ, a kevbe rhie ẹtin ne uwa ne uwa sẹtin gha ya i ziengbe ya egbe miẹn oya, egbe ne ima vbe ya egbe miẹn.

II Kọrinti 4:8

Ẹghẹ hia ọre a ya rueghe mwa, sokpan a ma rẹnkhẹn mwa an, ma zẹdia bi iro eva, sokpan iro ma han mwa.

II Kọrinti 7:5

Uhin vbe ima sẹ Masidonia nẹ, ma ma ye hẹ wẹ, Orueghe gba ehe hia, ẹzọ ne a gu emwa ọvbehe gui, afianma ne ọ fian ọmwa vbe ekhọe.

Hibru 13:6

Rhunmwuda ọnii, wa gie ima din ne a kha wẹẹ, “Nọyaẹnmwa ọrọre ne ọ yọ mwẹ obọ, ohan ighi mu mwẹ. De emwi ne ọmwa gha sẹtin ru mwẹ re?”

Giọgis 18:25

Emwa e Dan nii keghi tama rẹn wẹẹ, “Ghẹ ghi guan gberra evba ne a ghẹ miẹn wẹ ohu mu emwa na, iran ghi do guẹ gbinna. Wẹ kevbe ẹgbẹe ruẹ hia ghi wulo.”

Giọgis 20:22

Ivbi izrẹl kegha rrie owa ugamwẹ, iran na ya khiẹ vbe odaro e Nọyaẹnmwa rhinrin ya sẹ ota. Iran nọ rẹn wẹẹ, “Ne ima ye ya gu etẹn mwa ighẹ ivbi e Bẹnjamin gbinna ra?” E Nọyaẹnmwa keghi wanniẹn, “Ẹn.” Ẹre ẹtin ghi na la ivbi Izrẹl iwu, iran na dọlegbe mwamwa ivbi iyokuo iran ye ihe enẹ ne iran ka vbe gha ye vbe ikpẹdẹ enẹ ne ọ gberra.

I Samuẹl 23:16

E Jonatan keghi ya vba ẹre vbe evba, ọ na rhie igiẹdu ne ẹẹn wẹ, ẹ i mwẹ Osanobua ma degue ẹre.

I Samuẹl 28:15

E Samuẹl keghi tama e Sọl wẹẹ, “Vbọzẹ ne u na kpokpo mwẹ yi? Demwi ne u tie mwẹ werriegbe rre ba?” E Sọl keghi wanniẹn wẹẹ, “Uwu ọlọghọmwa nọkhua ọ re I ye na! Avbe Filistin gun mwẹ gbinna, Osanobua vbe fi iyeke gbe mwẹ. Ọ ma ghi rhie ewanniẹn mẹ ọvbehe deghẹ la obọ avbe akhasẹ rre nọ ra imina, ọnii ọ sii ẹe ne I na tie ruẹ, ne u tama mwẹ emwi ne I gha ru.”