I Samuẹl 27:12 - Edo Bible (E Baibol Ẹdo) Version 1996

¹² Akis keghi mu ẹtin yan Devid, ọ wẹẹ, “Ivbi Izrẹl ne emwa rẹn khu iwu ẹre sẹrriọ wẹ mẹ ọ re ọ ra gha ga ẹdẹdẹmwẹdẹ.”

I Samuẹl 27:12 ပူးပေါင်းရင်းမြစ်များ

Gẹnẹsis 34:30

E Jekọb keghi khama Simiọn vbe Livai wẹẹ, “Wa si mwẹ fi uwu ẹmwẹ nẹ, banbanna nian, emwa ẹvbo na hia, emwa Kenan, Pẹriz, iran hia khọ ẹko mwẹ. Ikpia ne I mwẹ i bun; iran gha ku obọ gbe mu igbinna gunmwẹ, ke imẹ kevbe ẹgbẹe mwẹ hia, te iran ra miẹn ima uhunmwu.”

II Samuẹl 10:6

Ivbi Amọn wa rẹn wẹ te iran ho e Devid ẹmwẹ, iran na ya viọ ivbiyokuo arriaisẹn ugie (20,000) vbe Siria kevbe Betrehob kevbe Zọba, arriaisẹn iweva (12,000) vbe Tob deba ọba Maaka ke ẹe kevbe ivbiyokuo arriaisẹn (1,000).

Ẹksọdọs 5:21

Iran keghi tama e Mosis kevbe Errọn wẹẹ, “Te Osanobua gha bẹghe emwi ne uwa ru, ne ọ rria uwa ikhi ne uwa na gie ọba kevbe emwa iwinna do gha mu ohu ima, te uwa gie iran miẹn ehe la la ima egbe na, ne iran gha gbele ima an.”

I Samuẹl 13:4

Ivbi Izrẹl hia keghi họn ighẹ e Sọl gbe ọkaokuo ivbi e Filistin kevbe wẹ te ivbi e Filistin ghi khọ ẹko iran. Emwa ni hia keghi wa khuẹnniẹn yọ, iran keghi bu e Sọl gha rrie Gilgal.

I Samuẹl 27:11

E Devid ghi gbele emwa hia ke ikpia kevbe ikhuo, ne a ghẹ miẹn ọmwa ne ọ gha yo ya kha vbe Gat emwi ne irẹn vbe emwa rẹn ru. Erriọ Devid wa gha ru ẹe vbe ẹghẹ ne ọ ya ẹe vbe Filistia hia.

I Samuẹl 28:1

Ọ ghi kpee fua kherhe, ivbi e Filistin keghi si ivbiyokuo iran koko ne iran ya gu Izrẹl khọn, ẹre Akis na tama Devid wẹẹ, “I yayi ghẹ u rẹnrẹn wẹ te uwẹ vbe emwa ruẹn ra lele mwẹ yo igbinna?”