I Samuẹl 16:1 - Edo Bible (E Baibol Ẹdo) Version 1996

¹ E Nọyaẹnmwa keghi tama e Samuẹl wẹẹ, “Inu ẹghẹ u ra khiẹ e Sọl la yi? Mẹ rhie ẹre hin ọba Izrẹl rre nẹ. Gualọ ẹvbi ọliv eso rhie mwẹ obọ. I gha gie uẹ gha rrie ọghe Jese ne ọ rre Bẹtlẹhẹm, rhunmwuda, I zẹ ọkpa vbe uwu ivbi ẹre nẹ ne ọ rriọba.”

I Samuẹl 16:1 ပူးပေါင်းရင်းမြစ်များ

I Ọba 8:16

‘Ke ẹghẹ ne I ya viọ emwa mwẹ ke Igipt ladian gha dee, I ma he zẹ ẹvbo ọkpa vbe otọ Izrẹl hia wẹ emwana ọ re a gha bọ Ọgua Osa ne a gha na gha ga mwẹ yi, sokpan I keghi zẹ uwẹ ne Devid ne ọ gha khaemwisẹ yan emwa mwẹ.’ ”

II Ọba 9:1

Vbe uwu eghẹ na, ọ re Elaisia na tie akhasẹ igbama ọkpa, ọ tama rẹn wẹẹ, “Mu egbe ne u do gha rrie Ramọt ne Giliad, u ghi rhie ẹluba ori oliv na mwẹ gha khian,

II Ọba 9:3

U ghi tue ori ye ọre uhunmwu ne u kha wẹẹ, ‘E Nọyaẹnmwa ta ẹe i ghẹ rẹn ya a rriọba Izrẹl.’ U ghi zegiẹgiẹ ladian hin evba rre.”

II Ọba 9:6

Ẹre iran eveva na gba la uwu owa, ẹre akhasẹ igbama nii na sa ori oliv yan e Jehu uhunmwu, ọ na kha ma rẹn wẹẹ, “E Nọyaẹnmwa ne Osanobua Izrẹl khare wẹẹ, ‘I ya a rriọba yan ivbi Izrẹl ne emwa mwẹ.

I Krọnikol 11:3

Rhunmwuda ọnii, avbe ekaolotu ivbi Izrẹl hia keghi bu e Devid gha die Hibrọn, ọ na yo ulamwẹ ne iran, iran tue ori ye ọre uhunmwu iran keghi ma ẹre ọba Izrẹl zẹ vbene Nọyaẹnmwa la unu e Samuẹl tae zẹẹ.

I Krọnikol 28:4

E Nọyaẹnmwa ne ọ re Osanobua Izrẹl keghi zẹ mwẹ kevbe ivbi uniẹn mwẹ ne a gha khaemwisẹ yan Izrẹl ẹdẹdẹmwẹdẹ, ọ keghi zẹ ẹwae Juda ne iran gha rhie ọkaolotu ladian rre, ọ keghi zẹ ẹgbẹe erha mwẹ vbe Juda. Ọ kevbe ye ọre ne ọ zẹ mwẹ vbe uwu ẹgbẹe ni hia ne ọ ya mwẹ rriọba Izrẹl hia.

Aizaia 11:1

Uniẹn ọghe Ọba Devid ye vbe erhan ne a tọn gbe otọ nẹ sokpan vbene ẹzi erhan vbe dọlegbe họn, erriọ ọ re ọba ọgbọn gha ke uniẹn e Devid zọ ladian.

Aizaia 11:10

Ẹdẹ dee ne ọba ọgbọn ne ọ zọ ke uniẹn e Devid ladian, gha na gha re ama ne uhunmwu ẹvbo hia. Iran gha si koko vbe ẹvbo ọba ẹre, iran ghi gha rhie ọghọ ne ẹẹn.

Aizaia 55:4

I yae ru ọkaolotu kevbe ne ọkhaemwisẹ yan avbe uhunmwu ẹvbo. Obọ ẹre ọ re I la rhie ẹtinmwẹ ma iran.

Jerimaia 11:14

E Jerusalẹm i ghi na erhunmwu ghe mwẹ ra ne iran vbe rinmwian mwẹ ne emwa nii ọvbehe. Iran gha rre uwu ibaro, iran na tu bu mwẹ rre do nọ iyobọ, I i zẹ ye iran ẹre.”

Jerimaia 15:1

Ẹre Nọyaẹnmwa na tama mwẹ wẹẹ, “Ọ gha khọnrẹn ne a miẹn wẹ e Mosis kevbe Samuẹl ọ re ọ mudia vbe emwa na gha rinmwian mwẹ, I i sẹtin tohan emwa na hiehiere. Wẹ ne iran ladian, wẹ ne iran kpao hin odaro mwẹ rre.

Jerimaia 6:30

Ikpakpa erhan ne ẹ i mwẹ vbe ọ gia ya ru ọ re iran khin rhunmwuda, mẹ ne Nọyaẹnmwa he iran yotọ nẹ.”

Jerimaia 7:16

E Nọyaẹnmwa keghi kha wẹẹ, “Jerimaia, ghẹ na erhunmwu ne iran na, ghẹ viẹ ra ne u na erhunmwu ne iran, ghẹ rinmwian mwẹ rhunmwuda, mẹ i ra zẹ ye uẹ ẹre.

Zẹkaraia 4:14

Ẹre irẹn ghi na kha wẹẹ, “Iran na ọrọre avbe ikpia eva ne Osanobua zẹe, ọ na vbe nọnọ ori ye iran uhunmwu ne iran gha ga irẹn, ne e Nọyaẹnmwa ne ọ yan otọ agbọn hia.”

Ebe ne Pọl gbẹẹn gie emwa Rom 15:12

Deba ẹre Aizaia vbe ta ẹe wẹ, “Ọmọ ọkpa gha la uniẹn Jese rre. A gha tọn ẹn mu ne ọ gha khaemwisẹ ya iran ne ẹ i re Ju.”

Hibru 11:32

Ne I ye gha kọ ẹre khian ra? Ẹghẹ i ghi sẹ mwẹ ya kpa itan ọghe Gidiọn, Barak, Samsin, Jẹfta, Devid, Samuẹl kevbe avbe akhasẹ.

I Jọn 5:16

A deghẹ orhiọnkpa mu ọtiọnrẹn vbe ọ ru orukhọ ne ẹ i si uwu, wẹ ne ọ na erhunmwu ghe Osanobua, ne ọ gha rhie arrọọ nẹẹn. Ọghe iran ne orukhọ iran i re ne ọ si uwu ọre a kha. Sokpan orukhọ ne ọ si uwu rrọọ. I ma wẹ ne uwa na erhunmwu ghe Osanobua ye ọnii.

I Samuẹl 10:1

Ẹre Samuẹl na mu ovbi ẹluba ori, ọ na hihiẹe yan e Sọl uhunmwu, ọ mu ẹre unu hiẹnhiẹn, ọ wẹẹ, “E Nọyaẹnmwa nọnọ ori yan ruẹn, ne u gha re ne ọ khaemwisẹ yan emwa Izrẹl ne emwa rẹn. U gha khaemwisẹ yan avbe emwa rẹn, u ghi fannọ iran ye otọ hin obọ iran ne eghian iran hia rre. Emwi ne a gha ya yi ama yọ wẹ te Nọyaẹnmwa gele zẹ ruẹ ne u gha khaemwisẹ yan iran ne emwa rẹn ọ re ọna khin.

I Samuẹl 15:11

“Ọ da mwẹ ne I na ma e Sọl ọba, ọ fi iyeke gbe mwẹ nẹ, te ọ ghi rra uhi mwẹ.” Ohu keghi mu e Samuẹl, ọ na ye asọn ni hia rinmwian e Nọyaẹnmwa.

I Samuẹl 15:23

Ne a sọtẹ ọre vbe rhia vba azẹn, kevbe ne gha tọn egbe mu, te ọ vbe ye vbe orukhọ ẹbọ ne a gho. Rhunmwuda ighẹ wẹ ma rhie ẹmwẹ e nọyaẹnmwa, rẹn vbe rhie ruẹ hin ọba rre.”

I Samuẹl 15:26

E Samuẹl keghi wanniẹn wẹẹ, “I i lele uẹ werriegbe rrie evba, u he iyi e Nọyaẹnmwa, rẹn vbe he uwẹ nẹ zẹ vbe ọba ivbi Izrẹl.”

I Samuẹl 15:35

E Samuẹl ma ghi dọlegbe miẹn ọba vbe ẹghẹ ne ọ ghi ya vbe agbọn, sokpan, ọ keghi khiẹ ọre. Ọ keghi da e Nọyaẹnmwa wẹ rẹn ma e Sọl ọba Izrẹl.

I Samuẹl 16:15

Eguọmwadia ẹre keghi tama rẹn wẹẹ, “Ma rẹnrẹn wẹ orhiọn dan ne Nọyaẹnmwa gie rre wa mu uẹn rueghe nian.

I Samuẹl 16:23

Ke ẹghẹ nii kpao, ẹghẹikẹghẹ ne orhiọn dan ne Osanobua gie rre ghi ya hin yan e Sọl, e Devid ghi mu akpata ẹre gha kpee. Orhiọn dan nii ghi sẹ ọc rae, egbe ghi do rran e Sọl, ọ ghi do werriegbe gha ye ẹe ẹse.

I Samuẹl 17:12

E Devid kegha re ovbi e Jese ne ovbi Ifreim vbe Bẹtlẹhẹm ne Juda. Emọ erẹnrẹn ọre Jese gha mwẹ, ẹghẹ ne Sọl na gha re ọba, e Jese wa khian ọmaẹn nẹ ẹsẹse.

I Samuẹl 9:16

“Vbe odẹ ẹghẹ na akhuẹ, I gha gie okpia ọkpa ke uniẹn e Bẹnjamin bu ruẹ rre, u ghi nọnọ ori ye ọre uhunmwu zẹ vbe ne ọkhaemwisẹ yan avbe emwa mwẹ, rẹn ọ ra sinmwi iran hin obọ emwa Filistin rre. I miẹn usẹ ne emwa mwẹ sẹ, I vbe họn eve ne iran viẹ ye ẹmwẹ iyobọ.”