I Samuẹl 12:22 - Edo Bible (E Baibol Ẹdo) Version 1996

²² Osanobua wa yan nẹ, rẹn i ra fi iyeke gbe uwa, rhunmwuda, te irẹn yan yọ wẹ rẹn gha ya uwa ru emwa irẹn.

I Samuẹl 12:22 ပူးပေါင်းရင်းမြစ်များ

I Ọba 6:13

I ghi gu ivbi Izrẹl ne emwa mwẹ gha rrọọ vbe uwu Ọgua Osa na ne u bọ khian na, mẹ I ra vbe he iran ye otọ ẹdẹ.”

I Ọba 8:57

Te Nọyaẹnmwa ne Osanobua mwa gha gu ima gha rrọọ, zẹ vbene ọ gu avbe erha mwa odede gha rrọọ. Te ọ gha tohan ivbi Izrẹl kevbe ọba iran ẹghẹ hia, ẹ i gha sẹ mwa rae ra ne ọ fi iyeke gbe mwa.

II Ọba 14:27

sokpan, ẹ i re iho ọghe Nọyaẹnmwa ne ivbi Izrẹl wa gbe ẹro ẹdẹdẹmwẹdẹ, rhunmwuda ọnii, ọ keghi lo e Jeroboam Ne Ogieva ya wọlọ iran ladian vbọ.

II Ọba 21:14

I gha fi iyeke gbe iran ni miẹn uhunmwu vbọ, I ghi viọ iran yan eghian iran obọ, emwa nii ghi khọn iran muotọ, iran ghi fu emwi iran viọ gha rrie.

I Krọnikol 28:9

Rẹn keghi tama Solomọn wẹẹ, “Ovbi mwẹ, I yan tama ruẹn nian ne u rhan obọ miẹn Osanobua erha a, ne u gha ya ekhọe ẹmwata ga ẹe kevbe orhiọn ne ọ ho. Ọ rẹn iziro ekhọe mwa kevbe emwi ne ima gualọ. A dẹghe u bu ẹre gha khian, ọ gha miẹn ruẹn yi, sokpan a dẹghe u fi iyeke gbẹe, ọ gha suẹ rae rhinrin ẹdẹ.

II Krọnikol 15:2

Ọ na bu Asa ne ọba gha khian. Ọ keghi datie ẹre wẹẹ, “Asa ne ọba, kevbe avbe uwa hia ni rre Juda kevbe Bẹnjamin, wa danmwehọ mwẹ. Ẹghẹ hia ne uwa mudia ke Nọyaẹnmwa la, e Nọyaẹnmwa gha vbe mudia ke uwa, a dẹghe wa gualọ ẹe, ọ gha ya egbe ne uwa miẹn, sokpan, dẹghe wa werriegbe, rẹn gha vbe he uwa ye otọ.

Nehimaia 9:17

Iran ma họn ẹmwẹ ne uẹn, iran mianmian emwi hia ne u ru iran mianmian iwinna ọyunnuan, ne u he winna hia. Vbe uwu itengbemu, iran zẹ olotu ọvbehe, ne ọ viọ iran dọlegbe gha rrie Igipt; sokpan, Osanobua ne ọ yabọ ọmwa ọ re uwu khin wẹ vuọn ne ẹsọhẹ kevbe ahoẹmwọmwa itohan ruẹn kpolo, u ma he iran ye otọ.

Psalm 106:8

Sokpan, ọ miẹn iran fan zẹ vbene ọ yan rẹn, ne ọ miẹn ehe na rhie ẹtin ẹnrẹn nọkhua, ne a miẹn.

Psalm 94:14

E Nọyaẹnmwa i ra he emwa rẹn yotọ, rẹn i ra fi iyeke gbe iran ni re ọghọe.

Ẹksọdọs 32:12

Vbọzẹ ne a gha na gie ivbi Igipt gha kha wẹ te ọ viọ iran ke otọe Igipt ladian, vbene ọ na zẹ iro dan wẹ ne irẹn gbele iran ye uhunmwu oke, kevbe ne ọ wa fuẹn iran an fẹẹrẹ? Mu ohu nọ wegbe ne ọ muẹn fua, fi ekhọe werriẹ ne u ghẹ gie ẹbe na sunu vbe egbe emwa ruẹn.

Aizaia 37:35

I gha gbinna ne ẹvbo na, I gha vbe degue ẹre, rhunmwuda uyi mwẹ kevbe rhunmwuda eyan ne I yan ma e Devid ne ọguọmwadia mwẹ.’ ”

Aizaia 41:17

“Ẹghẹ ne avbe emwa mwẹ gha na gualọ amẹ ne iran i mwẹ, ẹghẹ ne ovbamẹ gha na kaka iran ẹho ua, ẹghẹ nii, mẹ ne Nọyaẹnmwa gha họn erhunmwu iran. Mẹ ne Osanobua Izrẹl i ra he iran yotọ.

Aizaia 42:16

“I gha viọ avbe emwa mwẹ ni rhu aro la odẹ ne iran ma he la ẹdẹ. I ghi ya ebiebi iran khian uwanmwẹ I ghi ya ẹvbo ne kpannọkpannọ khian ne kpẹghẹ ne iran. E yan ne I yanrẹn ọ re ena khin. Emwi okpa ne ọ gha wẹ ne I ghẹ mu ẹẹn sẹ i rrọ.

Aizaia 43:25

Vberriọ, mẹ ọrọre Osanobua ne ọ ye orukhọ uwa bọ uwa. Te I ru ọna rhunmwuda egbe ọmwa ne imẹ khin. Mẹ i ra ka orukhọ uwa ye uwa urhu.

Aizaia 43:7

Emwa mwẹ ọ re iran khin. Te I yii iran ne iran gha re ọghomwẹ.”

Aizaia 48:11

Emwi ne I ru, rhunmwuda ekpẹn ne egbe mwẹ ọre I na ruẹe. Mẹ i ho ne a ya iruẹn ye eni mwẹ ra ne ọmwa ọvbehe rhokpa ghae vbe uyi nii ne ọ kere ne ọ gha re ọghomwẹ, ọ ghi mẹ ọkpa.”

Aizaia 49:15

Rhunmwuda ọnii, e Nọyaẹnmwa keghi kha wẹẹ, “Okhuo gha sẹtin mianmian ọmọ ne ọ biẹe ra ne ọ ghẹ ho ẹmwẹ ovbi ẹre ne ọ biẹe? Ọ gha khọn rẹn ne okhuo sẹtin mianmian ovbi ẹre mẹ i ra mianmian uwẹ ẹdẹdẹmwẹdẹ.

Aizaia 63:8

E Nọyaẹnmwa khare wẹẹ, “Emwa mwẹ ọ re iran khin, iran i ra rẹrẹ mwẹ.” Rhunmwuda ọnii, ọ keghi miẹn iran fan

Jerimaia 14:21

Ye eyan ruẹn rre, ne u ghẹ zan mwa, ghẹ gie efa rruan e Jerusalẹm, ehe ne ẹkete ruẹ ne ọ mwẹ uyi ye. Ghẹ mu ile ne u gu ima ta fua.

Jerimaia 14:7

Avbe emwa mwẹ viẹ bu mwẹ gha dee wẹẹ, ‘A gha rhe miẹn ighẹ orukhọ mwa gu ima gui, yi ima obọ vbene u yanrẹn Nọyaẹnmwa. Ẹghẹ nibun ọ re ima ya fi yeke gbe uwẹ, ma ru orukhọ ghe uẹ.

Jerimaia 14:9

Vbọzẹ ne u na ye vbe ọmwa ne emwi yan ẹre unu uan, zẹ vbe ovbiyokuo ne ẹ i mwẹ ẹtin ne ọ gha ya ru iyobọ? Vbe ẹmwata, wẹ rrọọ yaba mwa, Nọyaẹnmwa emwa ruẹn ma khin, ghẹ he mwa yotọ.

Eve Orriara 5:20

Vbu a ghi na fi iyeke gbe mwa kpee sẹrriọ hẹ yi? U gha ye ye ima rre ẹdẹ yi?

Ezikiẹl 20:14

Sokpan, I ma ru vberriọ, rhunmwuda, ọnii gha mu ozan gie eni mwẹ vbe ehe ne avbe uhunmwu ẹvbo nii ye, iran ne aro ẹre se ọe vbe I viọ ivbi Izrẹl ke Igipt ladian.

Ezikiẹl 20:9

Sokpan, I ma ru vberriọ rhunmwuda, ọnii gha mu ozan gie eni mwẹ, rhunmwuda, sirra avbe emwa ne iran gba yin kugbe ọre I na tae ma Izrẹl wẹ, I gha viọ iran ke Igipt ladian.

Malakai 1:2

E Nọyaẹnmwa tama emwa rẹn wẹẹ, “Te I wa ho ẹmwẹ ruẹn ẹdẹdẹmwẹdẹ.” Sokpan, iran wanniẹn wẹẹ, “Vbe u a ghi ya rhiema hẹ ighe u gele ho ẹmwẹ mwa?” E Nọyaẹnmwa wanniẹn wẹẹ, “Etẹn ọkpa ọ re Isọ kevbe Jekọb gha khin, sokpan mẹ keghi hoo ẹmwẹ e Jekọb kevbe ivbi uniẹn ọnrẹn.

Matiu 11:26

Erriọ wa nọ, Evba vba, vbene ọ yẹ ruẹ kevbe vbene ọ ke ekhọe ruẹ rre ọre u ru ẹe.

Iyẹn ne ọ Maan Ọghe Jọn 15:16

Ẹ i re uwa ọre ọ hannọ mwẹ zẹ, mẹ ọre ọ hannọ uwa zẹ, I na vbe wẹ ne uwa ya kakabọ gha mọ, ọmọ ne ẹ i khuọn kua. Emwi ne uwa a rhirhi nọ Erha re vbe eni mwẹ, ọ gha rhie ẹre ne uwa.

Ebe ne Pọl gbẹẹn gie emwa Rom 11:1

Te I mẹ ghi nọọn nian. Te Osanobua ghi he emwa rẹn ra? Hiehiere, mẹ tobọ mwẹ, ovbi Izrẹl mẹ khin, ovbi uniẹn Ebraham, ẹwae emwa Bẹnjamin.

Ebe ne Pọl gbẹẹn gie emwa Rom 11:29

Rhunmwuda Osanobua i fi ekhọe werriẹ vbekpa ọmwa ne irẹn hannọ zẹ kevbe ne ọ fiangbe.

I Kọrinti 4:7

Gha ọ tama ruẹn yi ighẹ u maa sẹ emwa ọvbehe? Ẹre Osanobua ọre ọ viọ emwi ne u mwẹ hia nuẹn? A deghẹ erriọ nọ, de ne a ghi ghagha baa vbọ, vbene a miẹn wẹẹ ẹ i re te a ya ẹe ru ọmwa ẹse.

Ẹfisọs 1:12

Rhunmwuda ọnii, wa gie ima, ni re emwa ni ka gha mwẹ idaehọ vbe uwu Kristi, rhie urhomwẹ ne uyi Osanobua.

Ẹfisọs 1:6

Wa gie ima rho Osanobua ye ẹsọhẹ nọ mwẹ uyi ọghọe, kevbe emwi ọhẹ ne ọ ya ru ima ẹse, vbe uwu ovbi ẹre ne ọ ghan!

Diuteronomi 14:2

Ọghe Nọyaẹnmwa Osanobua rua ore uwa khin, rhunmwuda te ọ hannọ uwa zẹ vbe uwu ẹbu emwa ni rre otọ agbọn hia ne uwa gha re ọghe irẹn.

Diuteronomi 31:17

Emwi vberriọ gha sunu, ohu iran gha mu mwẹ, I gha he iran ye otọ, a ghi fuẹn iran an. Ọkhọ ni mu ohan hia gha rruan iran, ẹghẹ nii iran ghi do rẹn wẹ emwi na sunu vbe egbe iran rhunmwuda, mẹ ne Osanobua iran i ghi rrọ yaba iran.

Diuteronomi 31:6

Wa gha wegbe ne uwa vbe din. Wa ghẹ gie ohan emwa nii mu uwa, Osanobua uwa ighẹ e Nọyaẹnmwa tobọ ẹre gha yaba uwa, ẹ i ra hiẹ uwa ra ne ọ he uwa ye otọ.”

Diuteronomi 31:8

E Nọyaẹnmwa tobọ ẹre gha ke aro ne uwa, ọ gha vbe gha rrọọ yaba uwa, rẹn i ra hiẹ uwa ra ne ọ he uwa ye otọ, rhunmwuda ọnii, wa ghẹ gie ẹtin fo uwa, wa ghẹ gie ohan mu uwa.”

Diuteronomi 7:6

Wa ghi ru ẹe vberriọ rhunmwuda, ọghe Nọyaẹnmwa Osanobua uwa ọ re uwa khin. Te ọ hannọ uwa zẹ hin uwu ẹbu emwa ne agbọn hia rre ne uwa do gha re emwa ughaẹn ọghe irẹn.

Diuteronomi 9:5

Ẹ i re rhunmwuda ighẹ wa maa, ra te uwa ru emwi ne ọ kere ne ọ ra na gie uwa mu otọe iran. Ọ gha khulo iran ladian rhunmwuda, emwa dan iran khin, kevbe wẹ rẹn gha ho ne ọ mu ile ne ọ gu avbe erha uwa odede Ebraham, Aizik kevbe Jekọb ta sẹ.

Filipai 1:6

Rhunmwuda ọnii, aro mwẹ wa da ọna wẹ, Osanobua nọ suẹn iwinna esi na vbe uwu uwa, gha ru ẹe gha khian rhinrin a te do ru ẹe fo, vbe Ẹdẹ Kristi Jesu.

Hibru 13:5

Fannọ obọ igho ne a ho ẹmwẹ ọnrẹn hin ẹdẹ agbọn ruẹn egbe rre. Vbe gie emwi ne u mwẹ gha suẹ ọkẹn, rhunmwuda Osanobua kha nẹ wẹẹ, “Mẹ i ra sẹ uẹ rae ẹdẹ, mẹ i re he uwẹ ye otọ ẹdẹ.”

Jọsua 7:9

Avbe emwa Kenan, kevbe avbe emwa ọvbehe hia ni rre otọe na gha họn ẹmwẹ na. Iran ghi do lẹga ima, iran ghi gbele ima hia a. De emwi ne u wẹ ghẹ ghi ru ya da uyi eni ruẹn yi?”

I Pita 2:9

Sokpan, wa ọrọre emwa ne a hannọ zẹ, avbe ohẹn Osanobua, agbọn ẹvbo ne ọ huanrẹn, emwa Osanobua tobọ ẹre, emwa ne a hannọ zẹ, ne iran mu iwinna ọyunnuan Osanobua go, ọmwa ne ọ tie uwa ke uwu ebiebi ladian gha rrie uwu uwanmwẹ ọyunnuan.